மொழிபெயர்ப்பின் மூலக் கட்டுரையை இங்கே காணலாம்.

2021 ஜனவரி 6 ஆட்சிக்கவிழ்ப்பு முயற்சிக்கு இரண்டு வாரங்களுக்குப் பிறகு, ஜனவரி 20, அன்று ஜோ பைடென் பதவியேற்றபோது, ஜனநாயகக் கட்சியின் புதிய ஜனாதிபதி “ஜனநாயகம் வென்றுள்ளது” என்றும், தேர்தலை மாற்றுவதற்கான ட்ரம்பின் முயற்சி “ஒருபோதும் நடக்காது, இன்று அல்ல, நாளை, எப்போதும் நடக்காது” என்றும் அறிவித்தார்.

நான்கு ஆண்டுகளுக்குப் பின்னர், ட்ரம்ப் மற்றும் குடியரசுக் கட்சியின் ஆட்சிக்கவிழ்ப்பு சதி நடந்து கொண்டிருக்கிறது என்பது மட்டுமல்ல, அதற்கான தயாரிப்புகள் 2020-21 ஐ விட இன்னும் அதிகமாக முன்னேறி வருகின்றன. ட்ரம்பும் அவரது படைகளும், அவர்களின் முதல் சதி முயற்சியின் தந்திரோபாய தோல்விகளில் இருந்து பாடம் கற்றுக் கொண்டுள்ளனர். ஜனவரி 6 சதிகாரர்களுக்கு நடைமுறையில் பொது மன்னிப்பு வழங்கும் ஜனநாயகக் கட்சியின் கொள்கையை அவர்கள் சாதகமாகப் பயன்படுத்தி, வரவிருக்கும் வாரங்களில் நடக்கக்கூடிய சதித்திட்டத்தைத் திட்டமிடுகின்றனர்.

கமலா ஹாரிஸிடம் ட்ரம்ப் தேர்தலில் தோற்றால், அவர் தேர்தல் நடந்த இரவில் வெற்றியை அறிவிக்கவும், குடியேற்றவாசிகள் பாரிய வாக்காளர் மோசடியில் ஈடுபட்டதாக குற்றம் சாட்டவும், தேர்தல் கல்லூரியின் வாக்கெடுப்பை சீர்குலைக்கவும், ஜனவரி 6, 2025 அன்று கப்பிட்டோல், காங்கிரஸ் கட்டிடத்துக்குள் குடியரசுக் கட்சியினர் மற்றும் வெளியே பாசிசவாத குண்டர்களின் ஒருங்கிணைந்த முயற்சிகள் மூலமாக காங்கிரஸால் வாக்களிக்கப்படுவதைத் தடுக்க தயாரிப்பு செய்தும் வருகிறார். இதன் விளைவு அமெரிக்க மக்களின் வாக்குகளால் தொடர்ந்து மூன்று தேர்தல்களில் நிராகரிக்கப்பட்ட ஒரு பாசிச ஜனாதிபதி சர்வாதிகாரியாக பதவியில் அமர்த்தப்படலாம்.

தேர்தலுக்கு முன்னதாக ஜனநாயகத்திற்கு எதிரான தனது அச்சுறுத்தல்களை மிதப்படுத்தாமல், ட்ரம்ப் இவற்றை தீவிரப்படுத்தியுள்ளார். கடந்த வாரம் சிக்காகோவில் பெருநிறுவன தலைமை செயலதிகாரிகளுக்கு முன்னால் ட்ரம்ப் அளித்த ஒரு நேர்காணலில், ஜனவரி 6 ஆட்சிக்கவிழ்ப்பு முயற்சி “அன்பு மற்றும் அமைதி” பற்றியது என்றும், தேர்தல் “100 சதவீதம் மோசமானது” என்றும் தெரிவித்தார். செப்டம்பரில், தபால் மூலம் வாக்குச் சீட்டுகள் தொலைந்து வருவதாகவும், தபால் சேவை “மோசமாக இயங்கி வருவதாகவும்”, அவர் 2020ல் இருந்து கூறிய பொய்களை திரும்பத் திரும்ப கூறினார்.

“சட்டவிரோத” புலம்பெயர்ந்தவர்கள் வாக்களிப்பதாக அவர் மீண்டும் மீண்டும் குற்றஞ்சாட்டி வந்துள்ளார். மேலும், Gallup கருத்துக்கணிப்பின்படி, குடியரசுக் கட்சியினரில் 74 சதவீதத்தினரும் சுயேட்சை வேட்பாளர்களில் 44 சதவீதத்தினரும் வாக்காளர் மோசடி குறித்த அவரது பொய்களுக்கு எளிதில் ஆட்பட்டுள்ளனர்.

பெரும் பொய்யால் களத்தில் உரமிட்ட ட்ரம்ப், அவரது வழக்கறிஞர்கள் வலையமைப்பு, காங்கிரஸ் மற்றும் மாநில சட்டமன்றங்களில் உள்ள அவரது கூட்டாளிகள் ஆகியோர், உள்ளூர், மாநில மற்றும் மத்திய மட்டங்களில் வாக்குகள் சான்றிதழை தாமதப்படுத்தவும், அதனை தடுக்கவும் தயாராகி வருகின்றனர். ஜனவரி 6 ஆட்சிக் கவிழ்ப்பு முயற்சியை விசாரித்த பிரதிநிதிகள் சபைக்கான வழக்கறிஞர் மார்க் ஹாரிஸ் பின்வருமாறு கூறினார்:

2024 தேர்தலைப் பொறுத்தமட்டில் பேரழிவை ஏற்படுத்த முயல்பவர்கள், தேர்தல் முடிவுகளை சவால் செய்ய அவர்கள் பயன்படுத்தும் கோட்பாடுகள், பேசும் புள்ளிகள் மற்றும் பொய்களின் அடித்தளத்தை அமைப்பது மற்றும் பரவலாக பரப்புவது ஆகியவற்றின் அடிப்படையில் 2020 இல் இருந்த இடத்தை விட மிகவும் முன்னேறியிருக்கிறார்கள்.

மொத்தத்தில், 2020 தேர்தலுக்கு முன்பு இருந்ததை விட, வாக்காளர்கள் மோசடி செய்ததாகக் கூறி குடியரசுக் கட்சியினரால் 180 வழக்குகள் தாக்கல் செய்யப்பட்டுள்ளன. குடியரசுக் கட்சியின் தேசியக் குழு, தேர்தல் நாளில் “தேர்தல் கண்காணிப்பு இராணுவத்தை” அனுப்புவதாகக் கூறுகிறது. மோசடி குற்றச்சாட்டுகளை முன்வைத்து அவற்றை குடியரசுக் கட்சியின் தலைமையகத்திற்கு புகாரளிக்கவும், மேலும் இது போன்ற குழுக்கள் வாக்காளர்களை அச்சுறுத்தவும் பயன்படுத்தப்படும் என்று கூறுகிறது.

வாஷிங்டனில் உள்ள பொறுப்பு மற்றும் நெறிமுறைகளுக்கான குடிமக்களின் நிர்வாக இயக்குனர் டொனால்ட் ஷெர்மன் தி அட்லாண்டிக் பத்திரிகைக்கு அளித்த பேட்டியில் கூறியதாவது:

இப்போது தெளிவாகத் தெரிகிறது என்னவென்றால், இதுவரை நடக்காத தேர்தல் முடிவுகளைக் கேள்விக்குள்ளாக்கும் அதிகமான தேர்தல் மறுப்பாளர்கள் தேர்தல் பார்வையாளர்களாக பணியாற்றுவதற்கும், மேலும் அந்த வகையான சதிக் கோட்பாட்டை எளிதாக்கும் வகையில், பாரபட்சமான கருத்துக்கணிப்பு பார்வையாளர்கள் குழப்பத்தையும் இடையூறுகளையும் உருவாக்குவதை எளிதாக்குவதற்கு ஒரு ஒருங்கிணைந்த மூலோபாயம் உள்ளது.

இந்த திட்டம் வன்முறையை அடிப்படையாகக் கொண்டது. ட்ரம்பின் உத்தரவின் பேரில், ஆதரவாளர்கள் உள்ளூர் தேர்தல் அதிகாரிகளுக்கு எதிராக அச்சுறுத்தல்களின் ஒரு அலையைத் தொடங்கியுள்ளனர். மேலும், இதுதொடர்பாக பொலிடிகோ செய்தி வெளியிட்டுள்ளது

இந்த ஆண்டு, அனைத்து மட்டங்களிலும் சட்ட அமலாக்கம் செயல்முறையின் ஒவ்வொரு கட்டத்தையும் குறிவைத்து முன்னெப்போதும் இல்லாத அளவிலான அச்சுறுத்தல்களை விவரித்துள்ளனர். இந்த நாட்களில், சட்டமியற்றுபவர்கள், தேர்தல் அதிகாரிகள் மற்றும் நீதிபதிகளுக்கு மோசமான செய்திகளை அனுப்பும் நபர்களை கைது செய்வதை நீதித்துறை வழக்கமாக அறிவிக்கிறது.

அத்தகைய முயற்சிகளைத் தடுக்கும் நோக்கில் கூட்டாட்சி சட்டத்தில் மாற்றங்கள் இருந்தபோதிலும், கமலா ஹாரிஸ் வெற்றி பெறும் மாநிலங்களில் வாக்காளர்களின் மாற்று பட்டியல்களை முன்வைக்க மாநில சட்டமன்றங்கள் மீண்டும் தயாராகி வருகின்றன. மேலும், 2000, 2004, 2016 அல்லது 2020 இல் கிடைத்த வெற்றியின் வித்தியாசத்தை விட, 53 தேர்தல் கல்லூரி வாக்குகளை ஒருங்கிணைக்கும் ஊசலாட்ட மாநிலங்களான அரிசோனா, ஜார்ஜியா, வட கரோலினா மற்றும் விஸ்கான்சின் ஆகிய மாநில சட்டமன்றத்தின் இரு அவைகளையும் குடியரசுக் கட்சியினர் கட்டுப்படுத்துகின்றனர். மிச்சிகன் மற்றும் பென்சில்வேனியாவைப் போலவே, இந்த நான்கு மாநிலங்களில் மூன்றில் ஜனநாயகக் கட்சி ஆளுநர்கள் உள்ளனர். இந்த மாநிலங்கள் அனைத்தும் ஒரு நேரடி மற்றும் உருவக அர்த்தத்தில் “போர்க்களங்கள்” ஆகலாம்.

காங்கிரசின் ஒவ்வொரு பிரிவின் மீதும் கட்டுப்பாடு உறுதியற்றது என்ற உண்மையால் நெருக்கடிச் சூழல் தீவிரமடைந்துள்ளது. மேலும், புதிய பிரதிநிதிகள் சபை ஜனவரி 3 அன்று, காங்கிரஸின் கூட்டு அமர்வில் தேர்தல் கல்லூரி சான்றிதழ் செயல்முறைக்கு மூன்று நாட்களுக்கு முன்பு அமர்த்தப்படும். அமெரிக்க துணை ஜனாதிபதியாக, ஹாரிஸ் செனட் தலைவராக சான்றிதழுக்கு தலைமை தாங்குவார். ஹாரிஸ் வெற்றி பெற்றால் மற்றும் ஜனவரி 6 அன்று கேபிட்டலில் ஒரு புதிய கும்பல் கூடினால், அவர் உடல் ரீதியாக பாதிக்கப்படக்கூடிய இலக்காக இருப்பார்.

ஜனவரி 6, 2025 எவ்வாறு சரியாக இருக்கும் என்பது யாராலும் கணிக்க முடியாத ஒரு கேள்வியாகும். ஆனால், இது அரசுக்குள் இடம்பெறும் தீவிர விவாதத்திற்குரிய விஷயமாகும். இந்த கோடையின் தொடக்கத்தில், முக்கியமான முன்னாள் தேசிய பாதுகாப்பு ஆலோசகர்கள், ஜெனரல்கள், காங்கிரஸ் உறுப்பினர்கள், கவர்னர்கள் மற்றும் செனட்டர்கள் அடங்கிய வலையமைப்பு, ஜனவரி 6, 2021 இன் அடிப்படையில் அனுமானத் தூண்டுதல்களைப் பயன்படுத்தி, அன்றைய நிகழ்வுகளை உண்மையான நேரத்தில் வெளிப்படுத்த ரகசியமாகச் சந்தித்தனர்.

அவர்கள் தங்கள் முடிவுகளை போர் விளையாட்டு என்ற தலைப்பில் ஒரு ஆவணப்படத்தில் வெளியிட்டனர். இந்த ஆவணப்படம், நெருக்கடியில் இராணுவம் தலையிடுவதற்கான சாத்தியக்கூறு மீது கவனம் செலுத்துகிறது. அந்த சூழ்நிலையில், ஜனநாயகக் கட்சி வேட்பாளர் தேர்தலில் குறுகிய வாக்கு வித்தியாசத்தில் வெற்றி பெறுகிறார். ஆனால், வாஷிங்டன் டி.சி. தேசிய காவலரின் கூறுபாடுகள் பாசிசவாத போராட்டக்காரர்களுடன் சகோதரத்துவம் பாராட்டி, சான்றிதழைத் தடுக்க அவர்களை கேபிடோலுக்குள் அனுமதிக்கின்றன.

ஒரு சிறிய எண்ணிக்கையிலான செயலூக்கமான ஜெனரல்கள் அணிகளை உடைத்து ஆட்சிக்கவிழ்ப்பு முயற்சியை ஆதரிக்கின்றனர். “அரசியலமைப்பு ஷெரிப்கள்” மற்றும் பாசிச-ஆதரவு பொலிஸ் துறைகளின் ஆதரவுடன், ஜனநாயக-சார்பு வேட்பாளர்களின் சான்றிதழை இரத்து செய்வதற்கு மாநில சட்டமன்றங்கள் வாக்களிக்க வேண்டுமென கோரி விரல்விட்டு எண்ணக்கூடிய மாநில தலைநகரங்களில் கூட்டம் கூடுகிறது. சிப்பாய்கள் உத்தரவுகளைப் பின்பற்றுவார்களா அல்லது அந்த வேண்டுகோள் கட்டுப்படுத்த முடியாத சமூக வெடிப்பை உருவாக்குமா என்பது தெளிவாக இல்லை என்பதால் கிளர்ச்சி சட்டத்தை கையிலெடுக்க நிர்வாகம் அஞ்சுகிறது.

ஜனவரி 6ம் தேதி காங்கிரசில் எந்த வேட்பாளரும் 270 தேர்தல் குழு வாக்குகளை பெறவில்லை என்றால், பிரதிநிதிகள் சபை தேர்தலின் முடிவை நிர்ணயிக்கும், மாநில பிரதிநிதிகள் குழுவிற்கு ஒரு வாக்கு வீதம் இருக்கும். சபை மீது எவர் கட்டுப்பாட்டை வென்றாலும், குடியரசுக் கட்சியினர் அரச பிரதிநிதிகள் எண்ணிக்கையில் தங்கள் அனுகூலத்தை ஏறத்தாழ நிச்சயமாக தக்க வைத்துக் கொள்வர். இரண்டு முகாம்களிலிருந்தும் வரும் சட்ட சவால்கள் மேல்முறையீட்டு நீதிமன்றங்கள் வழியாக, குறிப்பாக உச்ச நீதிமன்றத்தில் முடிவடையும், அங்கு அதிவலது பெரும்பான்மையே இறுதி முடிவெடுக்கும்.

ட்ரம்ப் மற்றும் குடியரசுக் கட்சியின் பாசிசவாத சதித்திட்டங்கள் நிதியியல் செல்வந்த தட்டுக்களின் இரக்கமற்ற பிரிவுகளின் நலன்களை வெளிப்படுத்துகின்றன. ட்ரம்ப் “உள்ளே இருக்கும் எதிரி” என்று குறிப்பிடுகையில், அவர் அனைத்திற்கும் மேலாக தொழிலாள வர்க்கம் மற்றும் அமெரிக்காவில் முதலாளித்துவ ஆளும் உயரடுக்கின் கொள்கைகளுக்கு எழும் அனைத்து எதிர்ப்பையும் அர்த்தப்படுத்துகிறார்.

இந்த நிலைமைகளின் கீழ், ஹாரிஸ் மற்றும் ட்ரம்புக்கு இடையிலான போட்டி ஒரு மரண வெப்பமாக உள்ளது என்ற உண்மை, அனைத்திற்கும் மேலாக ஜனநாயகக் கட்சி மற்றும் பைடென்-ஹாரிஸ் நிர்வாகம் மீதான ஒரு பேரழிவுகரமான குற்றப்பத்திரிகையாகும். கோவிட்-19 இலிருந்து நூறாயிரக்கணக்கான இறப்புகளுக்கும் மற்றும் அவரது மிகவும் தீவிர ஆதரவாளர்களிடையே மட்டுமே பிரபலமாக இருந்த ஒரு திருடப்பட்ட தேர்தல் முயற்சிக்கும் பொறுப்பானவராக பரவலாக பார்க்கப்பட்ட ஒரு தோற்கடிக்கப்பட்ட அரசியல் பிரமுகராக ட்ரம்ப் பதவியை விட்டு விலகினார்.

எவ்வாறிருப்பினும், அவர் பெரும் விரக்தியின் பயனாளியாக இருக்கிறார். பிப்ரவரி 2022 இல் தொடங்கிய உக்ரேனில் ரஷ்யாவுக்கு எதிரான அமெரிக்க-நேட்டோ போர், மற்றும் ஒரு வருடத்திற்கும் மேலாக நீடித்து இப்போது மத்திய கிழக்கு எங்கிலும் ஒரு பிராந்திய போராக அபிவிருத்தி அடைந்து வரும் காஸா இனப்படுகொலை உட்பட வெளிநாடுகளில் போரைத் தீவிரப்படுத்துவதில் ஜனநாயகக் கட்சியினர் கடந்த நான்கு ஆண்டுகளைச் செலவிட்டுள்ளனர்.

அமெரிக்காவில் ஏற்பட்டுள்ள பாரிய சமூக நெருக்கடியைத் தீர்க்க ஜனநாயகக் கட்சியினரிடம் முன்மொழிவதற்கு ஒன்றும் இல்லை. நேற்று பைனான்சியல் டைம்ஸில் வெளியான ஒரு கட்டுரை, பொருளாதார கொள்கைக்கு அவர் பொறுப்பாக வைக்கவிருக்கும் புள்ளிவிபரங்கள் குறித்து, “துணை ஜனாதிபதி அவரது திட்டங்களை ஜனாதிபதி பைடெனின் திட்டங்களில் இருந்து வேறுபடுத்திக் காட்டியுள்ளார். அவர் இன்னும் கூடுதலாக மையத்திற்கு நகர்வார் என்பதுடன், பெருநிறுவன அமெரிக்காவின் கவலைகளுக்கு செவிமடுக்கவும் மற்றும் அவர்களிடம் இருந்து கருத்துக்களைக் கேட்கவும் அதிக விருப்பத்துடன் இருப்பார் என்று அறிவுறுத்துகிறது,” என்று குறிப்பிட்டது.

ஹாரிஸும் அவரது பிரதிநிதிகளும் குடியரசுக் கட்சிக்கு, குறிப்பாக லிஸ் செனி போன்ற போர்வெறியர்களுக்கு வேண்டுகோள் விடுக்கின்றனர். மேலும், அவர்கள் ஹாரிஸை அமெரிக்க ஏகாதிபத்தியம் மற்றும் முதலாளித்துவ அரசின் மணிமகுடங்களுக்குப் பொறுப்பான பாதுகாவலராகக் சித்தரிக்க முயன்று வருகின்றனர்.

இந்த ஜனாதிபதி தேர்தலும் அதன் பின்விளைவுகளும் எப்படி நடந்தாலும், முதலாளித்துவ ஜனநாயக ஆட்சி வடிவங்களின் முறிவின் அடித்தளத்தில் உள்ள நெருக்கடி தீவிரமடைய மட்டுமே செய்யும். மேலும், எஞ்சியிருக்கும் அமெரிக்க “ஜனநாயகம்” பிரமாண்டமான சமூக சமத்துவமின்மையின் அழுத்தத்தின் கீழ், உலக மேலாதிக்கம் மற்றும் உலகளாவிய போர் என்ற அமெரிக்க ஏகாதிபத்தியத்தின் நிலையை இழந்து நொறுங்கி வருகிறது.

அமெரிக்காவின் புரட்சிகர எழுச்சிக் காலகட்டத்தில், முதலாளித்துவம் சமத்துவம் மற்றும் அடிப்படை ஜனநாயக உரிமைகளைப் பாதுகாப்பதற்கு வெகுஜன அழைப்பை எடுக்கும் திறனைக் கொண்டிருந்தது. பெப்ருவரி 11, 1861 அன்று, வாஷிங்டனில் பதவியேற்பதற்கான தனது நீண்ட பயணத்தில் இல்லிநோய்ஸின் ஸ்பிரிங்பீல்டை விட்டு வெளியேறிய நாளில், ஜனாதிபதியாக தேர்ந்தெடுக்கப்பட்ட ஆபிரகாம் லிங்கன், இந்தியானாவில் உள்ள இண்டியானாபோலிஸில் அவரை வரவேற்க கூடியிருந்த கூட்டத்தில் உரையாற்றினார். பரவசமான கரவொலிக்கிடையே அவர் அவர்களிடம் பின்வருமாறு கூறினார்:

இந்த ஒன்றியத்தை காப்பாற்ற ஒரே ஒரு விஷயம் மட்டுமே தேவை -உங்களைப் போன்ற மக்களின் இதயங்கள். ஒன்றியத்துக்காகவும், தங்கள் நாட்டின் சுதந்திரத்திற்காகவும் மக்கள் திரளாக கிளர்ந்தெழும்போது, “நரகத்தின் வாயில்கள் அவர்களை வெல்லாது” என்று உண்மையிலேயே சொல்லலாம்.... எழுச்சி பெறுவதும், ஒன்றியத்தையும் சுதந்திரத்தையும் பாதுகாப்பதும் உங்களது கடமை, உங்களுக்காக, எனக்காக அல்ல.

இதற்கு மாறாக, ஜனவரி 6, 2021 அன்று, ஜனநாயகக் கட்சி “மக்கள் எழுச்சியின்” ஆபத்தை விட நரகத்தின் கதவுகளைத் திறப்பதை ஏற்கத் தயாராக இருந்தது. தேர்தல் பிரச்சார பாதையில், ஹாரிஸும் ஜனநாயகக் கட்சியினரும் சமூக போராட்டங்களைத் தூண்டிவிடும் என்ற அச்சத்தில், ட்ரம்ப் தேர்தலைத் திருட திட்டமிட்டு வருகிறார் என்பதை அரிதாகவே குறிப்பிட்டு வருகின்றனர். அமெரிக்க ஏகாதிபத்தியத்தின் போர் நோக்கங்களைப் பாதிக்காத ஒரு முடிவுக்கு உத்தரவாதம் அளிப்பதே ஜனநாயகக் கட்சியினரின் இன்றைய ஒரே கவலையாக உள்ளது.

அமெரிக்க ஜனநாயகம் மரணத்தின் வாசலில் நிற்கிறது. பாசிசவாதம் மற்றும் சர்வாதிகாரத்தை நோக்கிய திருப்பத்தை இப்போதைய அரசியல் மற்றும் பொருளாதார அமைப்புமுறைக்குள்ளாக எதிர்க்க முடியாது.

ஜனநாயகக் கட்சியினர் மற்றும் குடியரசுக் கட்சியினரிடம் இருந்து முறித்துக் கொள்ள, தொழிலாள வர்க்கத்தின் அரசியல் சுயாதீனத்தை ஸ்தாபிக்க சோசலிச சமத்துவக் கட்சி போராடி வருகிறது. தீவிர வலதுசாரிகளின் வளர்ச்சிக்கு எதிரான போராட்டம், ஒரு வேலைத்திட்டம் தொழிலாள வர்க்கத்தின், பெரும்பான்மையான மக்களின் உண்மையான நலன்களை வெளிப்படுத்தும் அளவிற்கு மட்டுமே சாத்தியமாகும்.

தொழிலாள வர்க்கத்தின் சமூக மற்றும் ஜனநாயக உரிமைகளுக்கான போராட்டத்திற்கு பெருநிறுவன மற்றும் நிதிய தன்னலக்குழுவின் மேலாதிக்கத்தின் மீது ஒரு முன்னணி தாக்குதல் தேவைப்படுகிறது. செல்வந்தர்களின் செல்வவளத்தைப் பறிமுதல் செய்தல், மற்றும் அமெரிக்காவிலும் சர்வதேச அளவிலும் உள்ள பிரமாண்டமான வங்கிகள் மற்றும் பெருநிறுவனங்களின் பொருளாதாரத்தின் “கட்டளையிடும் உயரங்கள்” மீது ஜனநாயகக் கட்டுப்பாட்டை நிறுவுதல், ஆகியவற்றுக்கு முதலாளித்துவ அமைப்புமுறைக்கு எதிரான புரட்சிகரப் போராட்டம் தேவைப்படுகிறது.