மொழிபெயர்ப்பின் மூலக் கட்டுரையை இங்கே காணலாம்

கோவிட்-19 இன் ஓமிக்ரோன் மாறுபாட்டின் இந்தியாவின் முதல் உறுதிப்படுத்தப்பட்ட தொற்று தென்னிந்திய மாநிலமான கர்நாடகாவின் தலைநகரான பெங்களூரில் கண்டறியப்பட்டுள்ளது. 'ஓமிக்ரோன் மாறுபாடு மரபணு வரிசைப்படுத்தல் மூலம் உறுதிப்படுத்தப்பட்டது' என்று மத்திய உள்துறை அமைச்சகத்தின் இணைச் செயலாளர் லாவ் அகர்வால் தெரிவித்தார்.

அப்போதிருந்து, டெல்லி மற்றும் பிற நகரங்களில் ஓமிக்ரோன் மாறுபாடு உறுதிப்படுத்தப்பட்டுள்ளது. ஓமிக்ரோன் மாறுபாட்டால் பாதிக்கப்பட்ட 12 நோயாளிகள் டெல்லியில் உள்ள லோக் நாயக் ஜெய் பிரகாஷ் நாராயண் (LNJP) மருத்துவமனையில் அனுமதிக்கப்பட்டுள்ளனர். மூத்த அரசாங்க அதிகாரி ஒருவர் இந்தியன் எக்ஸ்பிரஸ்ஸிடம் கூறியதாவது: “புதன்கிழமை இரவு 10 மணி முதல் வியாழன் காலை 6 மணி வரை மொத்தம் ஆறு முக்கியமான விமானங்கள் டெல்லியில் தரையிறக்கப்பட்டன. பயணிகள் பாரிஸ், பிராங்ஃபேர்ட், இலண்டன் மற்றும் மாஸ்கோவில் இருந்து வந்திருந்தனர். அவர்களில் 4 பேருக்கு கோவிட்-19 தொற்று இருப்பது உறுதி செய்யப்பட்டு சிகிச்சைக்காக அனுப்பப்பட்டுள்ளனர். அவர்கள் ஓமிக்ரோனுக்காக பரிசோதிக்கப்படுவார்கள்.

ஓமிக்ரோன் வெடிப்பின் மையமான தென்னாபிரிக்காவிலிருந்து பெங்களூருக்கு வந்த பின்னர் குறைந்தது 10 விமானப் பயணிகள் தவறான கைதொலைபேசி எண்களைக் கொடுத்துவிட்டு தப்பிச் சென்றதாக கர்நாடக அரசாங்கம் தெரிவித்துள்ளது.

புதிய மாறுபாட்டின் தோற்றம், சர்வதேச அளவில் அரசாங்கங்கள் வைரஸின் பரவலை அகற்ற நடவடிக்கை எடுக்காத சூழ்நிலையில், பேரழிவு தரும் புதிய அலை தொற்றுகளை அச்சுறுத்துகிறது. ஏற்கனவே, உத்தியோகபூர்வ சுகாதார அமைச்சக தரவு, இந்தியா முழுவதும் மொத்த கோவிட்-19 தொற்றுகளின் எண்ணிக்கை 34.65 மில்லியனாக உயர்ந்துள்ளது, அதே நேரத்தில் இறப்பு எண்ணிக்கை கிட்டத்தட்ட 474,000 ஆகும். இந்த மொத்த எண்ணிக்கைகள் பாரியளவில் குறைத்து மதிப்பிடப்பட்டுள்ளன, இருப்பினும், இந்தியாவில் 4 மில்லியனுக்கும் அதிகமான மக்கள் கோவிட்-19 காரணமாக இறந்துள்ளதாக தொற்றுநோயியல் பகுப்பாய்வுகள் தெரிவிக்கின்றன. அவசர நடவடிக்கை எடுக்கப்படாவிட்டால், இந்த எண்ணிக்கை மீண்டும் பெருமளவில் உயரும் என்கிறது.

இந்தியாவில், மருத்துவ பீடங்கள், மருத்துவப் பணியாளர்கள் பற்றாக்குறைக்கு எதிராகப் போராடி வருகின்றன. டஜன் கணக்கான அரசு மருத்துவமனைகளை பிரதிநிதித்துவப்படுத்தும் இந்திய ரெசிடென்ட் டாக்டர்கள் சங்கம், சுகாதார அமைச்சருக்கு ஒரு கடிதம் அனுப்பியது: “நாடு முழுவதும் உள்ள சுகாதாரப் பாதுகாப்பு நிறுவனங்களில், போதுமான பணியாளர்கள் இல்லாத நிலையிலும், நடப்பு ஆண்டில் இன்னும் புதிய சேர்க்கை இல்லை' என அதில் குறிப்பிட்டது.

அந்தக் கடிதம் மேலும்: 'எதிர்கால கோவிட்-19 தொற்றுநோய் அலை பெரிதாகத் தோன்றுவதற்கான சாத்தியக்கூறுகள் இருப்பதால், நிலைமை சுகாதார பாதுகாப்பு துறைக்கு பேரழிவை ஏற்படுத்தும்' என எச்சரித்தது.

இந்தியாவின் மத்திய மற்றும் மாநில அரசாங்கங்கள் தங்கள் பதில் 'வழமை போல்' இருக்கும் என்று சுட்டிக்காட்டுகின்றன. சமூக விலகல், அவசியமற்ற தொழில்கள் மற்றும் நேரில் பள்ளிப்படிப்பை நிறுத்துதல் மற்றும் வைரஸ் பரவுவதைத் தடுக்கக்கூடிய தொற்றுக்களை அடையாளம் கண்டுபிடிப்பது போன்ற அனைத்து அத்தியாவசிய கொள்கைகளையும் அவர்கள் நிராகரிக்கின்றனர்.

டிசம்பர் 3 அன்று, எகனாமிக் டைம்ஸ் ஓமிக்ரோன் மாறுபாடு குறித்த இந்திய சுகாதார அமைச்சக அறிக்கையை வெளியிட்டது. “என்ன முன்னெச்சரிக்கை நடவடிக்கைகளை எடுக்க வேண்டும்?” என்ற கேள்விக்கு அது பதிலளித்தது: “முகக்கவசங்கள், தடுப்பூசிகள், சமூக விலகல் மற்றும் நல்ல காற்றோட்டத்தை பராமரித்தல் ஆகியவற்றை உள்ளடக்கிய முந்தைய அதே கோவிட்-பொருத்தமான நடத்தை.' உண்மையில், இந்த அடிப்படை அத்தியாவசியமான நடவடிக்கைகள் கூட தகுதியான தீவிரத்துடன் செயல்படுத்தப்படவில்லை.

சுருக்கமாகச் சொன்னால், மோடி அரசாங்கமும் பல்வேறு அரசியல் பூச்சுக்களை கொண்ட மாநில அரசாங்கங்களும் ஏற்கனவே மில்லியன் கணக்கானவர்களின் மரணத்திற்கு வழிவகுத்துள்ள கொள்கைகளைப் பேணுவதில் உறுதியாக உள்ளன. சமூக இடைவெளியைக் கடைப்பிடிக்கச் சொல்லும் அதே வேளையில், மக்கள் கூட்டங்கள், தேவையற்ற தொழில்கள் நடத்துதல், பள்ளிகள் மற்றும் கல்லூரிகளை மீண்டும் திறப்பது, சினிமா மற்றும் மக்கள் போக்குவரத்தை 100 சதவீத முழு இருக்கைகளுடன் இயக்குதல், நெரிசலான சந்தைகள் மற்றும் உணவகங்கள் ஆகியவற்றை ஊக்குவித்துள்ளனர். அதிக மக்கள் கூடும் கிரிக்கெட் போட்டிகள் போன்ற விளையாட்டு நிகழ்வுகள் அனுமதிக்கப்படுகின்றன. அத்துடன் பருவமழையும் இந்த நிலையை மோசமாக்குகிறது.

பிஜேபி இந்த தொற்றுநோயைக் கையாண்டதன் பேரழிவுத் தாக்கத்தின் ஒரு சிலிர்க்க வைக்கும் அறிகுறி, அவர்கள் இறந்து 15 மாதங்களுக்குப் பிறகு, பெங்களூரு மருத்துவமனையில் அழுகிய சடலங்கள் கடந்த மாதம் கண்டுபிடிக்கப்பட்டது. Deccan Chronicle பத்திரிகையின்படி, 'இரண்டு நோயாளிகளும் ஜூன் 2020 இல் கொரோனா வைரஸுடன் ராஜாஜிநகரில் உள்ள மருத்துவமனையில் அனுமதிக்கப்பட்டு, அடுத்த மாதத்தில் சில நாட்களுக்குப் பின்னர் இறந்தனர்.' நவம்பர் 26-ம் தேதி பழைய பிணவறையை சுத்தம் செய்வதற்காக தொழிலாளர்கள் உள்ளே சென்றபோது இறந்த உடல்கள் கவனிக்கப்பட்டன. குளிர்சாதன பெட்டியில் இருந்து துர்நாற்றம் வீசுவதை அவதானித்த அவர்கள் அந்த சடலங்களை கண்டெடுத்தனர்.

அதிக தடுப்பூசியை எதிர்த்து நிற்கும் ஓமிக்ரோன் மாறுபாட்டின் தோற்றம், தடுப்பூசிகள் மட்டும் தொற்றுநோயை இல்லாமல் செய்துவிடும் என்ற பிரதமர் நரேந்திர மோடியின் பாரதிய ஜனதா கட்சி (BJP) மற்றும் பல்வேறு மாநில அரசியல் கட்சிகளின் மோசடி வாதங்களை அம்பலப்படுத்துகிறது. கோவிட்-19 தொற்றுநோய்க்கு 'தடுப்பூசி மட்டுமே அணுகுமுறையை' பரிந்துரைக்கும் முதலாளித்துவ அரசாங்கங்கள் முன்வைத்த 'மூன்று மோசமான காரணங்களை' WSWS குறிப்பிட்டது.

முதலாவதாக, பெருநிறுவன இலாபங்களுக்கு இடையூறாக இருக்கும் கடுமையான பொது சுகாதார நடவடிக்கைகளை அவசியமற்றதாக ஆக்குதவன் மூலம் அது முற்றிலுமாக பெருநிறுவன மற்றும் நிதிய உயரடுக்கின் பொருளாதார நலன்களுடன் ஒத்துப்போகிறது.

இரண்டாவதாக, இது அடிப்படையில் ஒரு தேசியவாத தீர்வாகும், அமெரிக்க ஆளும் வர்க்கத்தின் பிரதான புவிசார் மூலோபாய போட்டியாளர்களுடன் அதன் நிலைப்பாட்டைப் பலப்படுத்துவதற்கான ஒரு கருவியாக இறுதியில் இதைப் பயன்படுத்த முடியும்.

மூன்றாவதாக, இந்த பெருந்தொற்றுக்குப் பரந்த விதத்தில் ஒருங்கிணைந்த சமூக விடையிறுப்பு அவசியமில்லை என்ற எளிமையான ஒரு நடைமுறைவாத தனிப்பட்ட அணுகுமுறையாக உள்ளது.

மோடி அரசாங்கம் 2021 ஆம் ஆண்டின் தொடக்கத்தில் மில்லியன் கணக்கான மக்களை இறக்க அனுமதித்தது, அதேவேளை தடுப்பூசிகளின் உற்பத்தி துன்பத்தை முடிவுக்குக் கொண்டுவரும் என்று பொதுமக்களுக்கு உறுதியளித்தது. இது Covaxin மற்றும் covidSHIELD தடுப்பூசிகளை ஊக்குவித்து, உலகம் முழுவதும் 1.25 பில்லியன் தடுப்பூசி டோஸ்களை கொடுத்ததாக பெருமையடிக்கிறது.

எவ்வாறாயினும், இந்த தடுப்பூசி மூலோபாயம் பெருமளவில் குறுகியதாகிவிட்டது. மருத்துவ நிபுணர்களின் கூற்றுப்படி, 2021 ஆம் ஆண்டின் இறுதிக்குள் தகுதியான அனைத்து பெரியவர்களுக்கும் முழுமையாக தடுப்பூசி போடுவதற்கு இந்தியாவிற்கு ஒரு நாளைக்கு 12 மில்லியனுக்கும் அதிகமான டோஸ் தேவைப்படுகிறது. சுகாதாரப் பொருளாதார நிபுணர் டாக்டர் ரிஜோ எம். ஜான் பிபிசியிடம் 45 வயதிற்கு மேற்பட்ட 70 மில்லியன் 'பாதிக்கப்படக்கூடிய' பெரியவர்கள் இன்னும் ஒரு டோஸ் கூட பெறவில்லை என்று கூறினார். புளூம்பேர்க்கின் தடுப்பூசி கண்காணிப்பாளரின் படி, இந்தியாவின் 1.4 பில்லியன் மக்களில் 32 சதவீதம் பேர் மட்டுமே இரண்டு தடுப்பூசிகளைப் பெற்றுள்ளனர்.

ஓமிக்ரோன் மாறுபாட்டின் தோற்றம், தற்போதுள்ள அனைத்து தடுப்பூசிகளிலிருந்தும் தப்பிக்கும் அச்சுறுத்தல், மோடியின் மூலோபாயத்தின் திவால்நிலையை திட்டவட்டமாக அம்பலப்படுத்தியுள்ளது. தடுப்பூசி பெறுவதில் மந்தநிலையும் வைரஸின் பரந்த சுழற்சியும், ஆபத்தான, தடுப்பூசிக்கு எதிர்ப்புக் காட்டும் மாறுபாடுகளை உருவாக்கும் என விஞ்ஞானிகளின் தொடர்ச்சியான எச்சரிக்கைகளை இது உறுதிப்படுத்துகிறது.

ஆக்ஸ்போர்டு பல்கலைக்கழகத்தின் கிரீன் டெம்பிள்டன் கல்லூரியின் முன்னணி வைராலஜிஸ்ட், டாக்டர். ஷாஹித் ஜமீல் கூறினார்: 'மோசமாக தடுப்பூசி போடப்பட்ட உலகின் பிராந்தியங்கள் புதிய வகைகளுக்கு இனப்பெருக்கம் செய்யும் இடங்களாக இருக்கலாம். தேவையான வளங்கள் இல்லாத நாடுகளை ஆதரிக்க வேண்டும். உலகிற்கு சிறந்த தடுப்பூசி அணுகல் மற்றும் சமபங்கு தேவை. இது உலகிற்கு, குறிப்பாக வளர்ந்த நாடுகளுக்கு ஒரு எச்சரிக்கை மணியாக இருக்க வேண்டும்.

புனேயல் உள்ள இந்திய விஞ்ஞான கல்வி மற்றும் ஆராய்ச்சி நிறுவனத்தின் நோயெதிர்ப்பு நிபுணர் சத்யஜித் ராத் கூறியதாவது: 'வைரஸில் உள்ள பிறழ்வுகள் தொடர்ந்து உருவாகி மற்றும் தமக்கு பொருத்தமான சூழ்நிலையை அவை தேர்ந்தெடுத்துக்கொள்ளும் போது, மனசாட்சியற்ற தடுப்பூசி சமத்துவமின்மை பாரியளவு வைரஸ்கள் தங்கியிருப்பதற்கு உண்மையில் பங்களிக்கிறது.'

தடுப்பூசி விநியோகத்தில் உலகளாவிய பற்றாக்குறையை உருவாக்குவதிலும், தடுப்பூசிகளுக்கான முன்னாள் காலனித்துவ நாடுகளின் அணுகலைத் தடுப்பதிலும் ஏகாதிபத்திய சக்திகளின் பங்கிற்காக ராத் கடுமையாக விமர்சித்தார். தடுப்பூசி ஏற்றத்தாழ்வு, 'உலகளாவிய உற்பத்திப் பற்றாக்குறை மற்றும் தடுப்பூசி தேசியவாதத்தால் இயக்கப்படுகிறது, இது சமச்சீரற்ற உலகளாவிய தடுப்பூசி விநியோகத்திற்கு வழிவகுக்கிறது. முதலாவது, ஒரு பகுதி, இலாப நோக்கங்களால் இயக்கப்படுகிறது, இரண்டாவது இனவெறி சித்தாந்தங்களால் இயக்கப்படுகிறது.

இந்திய முதலாளித்துவத்தின் 'உயிர்களுக்கு முன் இலாபம்' என்ற கொள்கையால் வெளிப்படுத்தப்பட்ட மில்லியன் கணக்கான மக்களின் வாழ்வின் மீதான அவமதிப்பு, தொழிலாளர்கள், விஞ்ஞானிகள் மற்றும் மருத்துவ நிபுணர்களிடமிருந்து பெருகிய எதிர்ப்பை தூண்டுகிறது.

ஏப்ரலில், முன்னணி இந்திய விஞ்ஞானிகள், தொற்றுநோய்களின் போது இந்தியாவின் பேரழிவுகரமான நிலையை 'தொற்றுநோயியல் தரவு முறையாக சேகரித்து வெளியிடப்படவில்லை' என குற்றம்சாட்டி கையெழுத்திட்டு மோடிக்கு ஒரு திறந்த கடிதத்தை அனுப்பினர். மேலும், அவர்கள் வாதிட்டனர், தொற்றுநோயின் ஆரம்பத்திலிருந்தே இந்திய மருத்துவ ஆராய்ச்சி குழு கோவிட்-19 கண்டறியும் சோதனைகளில் இருந்து தரவுகளை சேகரித்திருந்தாலும், ஒரு சில அரசாங்க அதிகாரிகளைத் தவிர இந்தத் தரவை அணுக மறுக்கிறது.

இந்தியாவின் தேசிய கிராமப்புற சுகாதார இயக்கத்தின் அங்கீகாரம் பெற்ற சமூக சுகாதார ஆர்வலர் (ASHA) தொழிலாளர்கள் இந்த மாதம் நாடு தழுவிய வேலைநிறுத்தத்திற்கு அச்சுறுத்துகின்றனர். கோவிட்-19 தொற்றுநோய் முழுவதும் நாட்டின் தொலைதூரப் பகுதிகளில் ASHA பணியாளர்கள் வீடு வீடாகச் சென்று தடுப்பூசி போடுமாறு மக்களுக்கு அறிவுறுத்தினர். இந்த வறிய தொழிலாளர்களில் பெரும்பாலோர், மாதத்திற்கு 40 டாலர்கள் ஊதியம் பெறுகிறார்கள், கையுறைகள், முகமூடிகள் மற்றும் சுத்தம்செய்யும் மருந்துகள் உட்பட முக்கியமான தனிப்பட்ட பாதுகாப்பு உபகரணங்கள் (PPE) இல்லாதுள்ளனர்.

இந்தியா முழுவதும் தொழிலாள வர்க்கத்தில் ஒரு இயக்கத்தைக் கட்டியெழுப்புவதும், சர்வதேச அளவில் கோவிட்-19 இன் அனைத்து வகைகளின் பரவலையும் அகற்றும் விஞ்ஞானரீதியான வழிகாட்டுதல் கொள்கைக்காகப் போராடுவதுமே முக்கியமான பணியாக உள்ளது.