மொழிபெயர்ப்பின் மூலக் கட்டுரையை இங்கே காணலாம்

ஐரோப்பா முழுவதிலும் உள்ள தொழிலாளர்கள், மாணவர்கள் மற்றும் பள்ளி மாணவர்கள் உக்ரேனில் போர் வெடித்ததால் அதிர்ச்சியும் கவலையும் அடைந்துள்ளனர். ரஷ்ய ஜனாதிபதி விளாடிமிர் புட்டினின் கொள்கைகள் மீது அவர்கள் அவமதிப்பை கொண்டிருந்தாலும், அரசாங்கங்கள், அனைத்து உத்தியோகபூர்வ அரசியல் கட்சிகள் மற்றும் முக்கிய செய்தி மற்றும் காட்சி ஊடகங்களில் இருந்து கொட்டப்படும் வெறித்தனமான போர் பிரச்சாரத்தை பலர் நிராகரிக்கின்றனர்.

பொருளாதாரத் தடைகள், இராணுவ பதிலடி மற்றும் அணுசக்தி தடுப்புக்கான காதை செவிடாக்கும் அழைப்புகள் என்பன பொதுமக்களின் உணர்வைப் பிரதிநிதித்துவப்படுத்தவில்லை. 'புட்டின் அரசாங்கத்தின் உக்ரேன் மீதான படையெடுப்பையும் அமெரிக்க-நேட்டோ போர்வெறிக் கூச்சலையும் எதிர்ப்போம்! ரஷ்ய, உக்ரேன் தொழிலாளர்களின் ஐக்கியத்திற்காக நிற்போம்! என்ற நான்காம் அகிலத்தின் அனைத்துலகக் குழுவின் (ICFI) அறிக்கையில் பின்வருமாறு விளக்கப்பட்டிருக்கின்றது. 'கடந்த மூன்று தசாப்தங்களாக முடிவில்லா போரின் அனுபவத்தை ஏராளமான மக்கள் கடந்து வந்துள்ளனர். உலகெங்கிலும் உள்ள தொழிலாள வர்க்கத்தின் பெரும் உணர்வு போருக்கு எதிராக உள்ளது.'

உலக சோசலிச வலைத் தளத்திற்கு எழுதிய கடிதங்கள் மற்றும் ஜேர்மனியில் உள்ள தொழிலாளர்கள் நமது செய்தியாளர்களுக்கு அளித்த அறிக்கைகள் என்பன இந்த எதிர்ப்பை வெளிப்படுத்துகின்றன.

பிரவுண்ஸ்வைக் (Braunschweig) ஐ சேர்ந்த ஒரு வோக்ஸ்வாகன் தொழிலாளி பின்வருமாறு எழுதினார், “உக்ரேனில் நடந்துவரும் சம்பவங்களை நான் ஆழ்ந்த கவலையுடன் பார்க்கிறேன். நான் பயந்தேன், ஆனால் புட்டின் உக்ரேனுக்கு படைகளை அனுப்பமாட்டார் என நம்பினேன். புட்டினின் தேசியவாத பேச்சை நான் திகிலுடன் பார்த்தேன். நேட்டோ, ஐரோப்பிய ஒன்றியம் மற்றும் பிற அனைத்து நாடுகளுக்கும் எதிரான அச்சுறுத்தல்கள் ஒரு பேரழிவாகும்.

'முழு சூழ்நிலையும் மிகவும் ஆபத்தானது என்று நான் நினைக்கிறேன். இது உண்மையில் கட்டுப்பாட்டை இழக்கலாம். மிகப் பெரிய சக்திகள், மிகப்பெரிய அணு ஆயுத சக்திகள் இப்போது ஈடுபட்டுள்ளன.

'புட்டின் என்ன செய்கிறார் என்பதை முற்றிலும் ஏற்றுக்கொள்ள முடியாது. ஆனால் அதே நேரத்தில், நேட்டோ, அமெரிக்கா மற்றும் ஐரோப்பிய ஒன்றிய சக்திகள் முறித்த வாக்குறுதிகளை ஒதுக்கி விட முடியாது. அவர்கள் ரஷ்யாவின் எல்லை வரை சென்றார்கள், புட்டினால் அதை ஏற்க முடியாது.

“அமெரிக்கா, போர்கள் தீர்ந்துபோயுள்ளது, ஆப்கானிஸ்தானில் முடிந்துவிட்டது, அவர்கள் அங்கிருந்து குதிக்காலில் வெளியேற வேண்டியிருந்தது. ஆனால், அமெரிக்கப் பொருளாதாரம் போரினால் செழிக்கிறது. அவர்களின் உறைந்த எரிவாயு மூலம், இப்போது அவர்கள் பயனடைகிறார்கள் ஏனெனில் அவர்கள் அதை ஐரோப்பிய ஒன்றியத்துக்கு விற்கலாம்.

'அமெரிக்காவின் உத்தரவின் பேரில், நோர்ட் ஸ்ட்ரீம் 2 எரிவாயு குழாயை நிறுத்த (ஜேர்மன் சான்சிலர் ஓலாஃப்) ஷோல்ஸால் அறிவிக்கப்பட்டது. அவர் தனக்காக ஒரு பின் கதவைத் திறந்து வைத்தது உண்மைதான், எல்லாவற்றிற்கும் மேலாக, ஜேர்மனிக்கும் அதன் சொந்த நலன்கள் உள்ளன. உக்ரேனில் எட்டு ஆண்டுகளாக உள்நாட்டுப் போர் நடந்து வந்தாலும், மத்திய அரசிடம் வெளிப்படையாக எந்த மாற்றுத் திட்டமும் இல்லை.

'ஏனென்றால் இதில் ஒன்று நிச்சயம்: நேரடியாக போரில் இல்லையென்றாலும் மறைமுகமாக, சாதாரண மக்கள் இதற்கு விலை செலுத்துவார்கள். எல்லாவற்றுக்கும் மேலாக, ஐரோப்பிய ஒன்றியம் ரஷ்யாவிலிருந்து எண்ணெய் மற்றும் எரிவாயுவைச் சார்ந்துள்ளது. அதைச் சார்ந்து ஒரு முழுத் தொடர் விஷயங்கள் நடக்கின்றன. நாம் எரிசக்திக்கு அதிக கட்டணம் செலுத்த வேண்டியிருந்தால், பணம் பொருளாதாரத்தில் வேறு இடத்திற்குச் செல்லும். ஆகையால் நாம் பணத்தை ஒன்றாக வைத்திருக்க வேண்டும். நாம் உருவாக்கும் எங்கள் கார்கள் விலை உயர்ந்ததாக மாறும். நாம் அதனை குறைவாக விற்றால், நமது வேலைகள் என்னவாகும்?

“கோவிட் உடன் போராடி உயிர்களைக் காப்பாற்றுங்கள்! மூன்றாம் உலகப் போருக்கான உந்துதலை நிறுத்துங்கள்!” என்ற தலைப்பில் இந்த சனிக்கிழமை நடக்கவிருக்கும் WSWS இணையவழி கூட்டத்தில், இங்கு போரை யாரும் விரும்பவில்லை என்பதை தெளிவுபடுத்துவது முக்கியமானது.

கொலோனைச் சேர்ந்த ஃபோர்டு தொழிலாளி ஜாஃபர், 'நான் முற்றிலும் போருக்கு எதிரானவன், இது ஒரு முழுமையான பேரழிவு. இந்த நூற்றாண்டில் இனி போர்கள் வரக்கூடாது. இப்படி வந்தது மிகவும் வருத்தமாக இருக்கிறது.

'ஆனால் அமெரிக்கா எப்போதுமே போர்களைத் தொடங்கவும், துணை நிற்கவும், பின்பு தலையிடவும் தயாராக உள்ளது. யூகோஸ்லாவியா, ஆப்கானிஸ்தான், சிரியா, ஆனால் துருக்கிக்கும் PKK க்கும் இடையிலான போரிலும் அவர்கள் ஈடுபட்டிருந்தனர், இப்போதும் ஈடுபட்டுள்ளனர். நான் 2016 இல் இஸ்தான்புல்லில் இருந்தபோது எர்டோகனுக்கு எதிரான ஆட்சிக்கவிழ்ப்பை நான் கண்டேன். இதற்கு அமெரிக்காவும் ஆதரவு தெரிவித்தது. அவர்கள் எல்லா இடங்களிலும் தலையிடுகிறார்கள்.

“அவர்கள் ஆயுதங்களை விற்பதன் மூலம் மோதல்கள் மற்றும் போர்களில் இருந்து பணம் சம்பாதிக்கிறார்கள். இப்போது ரஷ்யா உக்ரைனை ஆக்கிரமிக்கும் என்று அவர்கள் எல்லா நேரங்களிலும் கூறி வருகின்றனர். அமெரிக்கா நடைமுறையில் போரை உருவாக்கப் பேசியது என்ற எண்ணம் எனக்கு இருந்தது, அவர்கள் அதை விரும்பினர். அமெரிக்கா தங்கள் ஆயுதங்களைப் பயன்படுத்த விரும்புகிறது, அவர்கள் அதில் பணம் சம்பாதிக்கிறார்கள்.

'ரஷ்யா இப்போது எரிவாயு குழாயை மூடினால், என்ன நடக்கும்? அது நடக்காது என நம்புகிறேன், ஆனால் அது மிகவும் ஆபத்தானது.

'மீண்டும்: நான் போருக்கு எதிரானவன். எனவே ஒரு சர்வதேச போர்-எதிர்ப்பு இயக்கத்தை கட்டியெழுப்பும் WSWS இன் முன்முயற்சி ஆதரிக்கப்பட வேண்டும்.'

முற்கூட்டியே ஓய்வுபெற்ற முன்னாள் சமூக சேவகரான கரின், 'தற்போதைய உக்ரேன் போரின் விரிவான மற்றும் அறிவூட்டும் அரசியல் பகுப்பாய்வை WSWS வழங்குகிறது. ரஷ்யாவின் இராணுவ ஆக்கிரமிப்பை சந்தேகத்திற்கு இடமின்றி கண்டனம் செய்வதில் எந்த முரண்பாடும் இல்லை, அதே நேரத்தில் அது, அதன் இராணுவ மேலாதிக்கத்தை பாதுகாப்பதற்கான அமெரிக்க புவிசார் அரசியல் மூலோபாயத்தின் விளைவு என்றும் அமெரிக்க தலைமையிலான நேட்டோ சக்திகள் முக்கிய ஆக்கிரமிப்பாளர்கள் என்றும் சுட்டிக்காட்டுகிறது.

'நேட்டோவின் படிப்படியான விரிவாக்கத்துடன், ரஷ்யாவின் எல்லைகள் வரை முன்னாள் கிழக்கு கூட்டு நாடுகளை உள்ளடக்கியதன் மூலம், புட்டின் கிட்டத்தட்ட சூழப்பட்டுள்ளார். 2014 இல் மேற்கத்திய சக்திகளால் உக்ரேனில் நிறுவப்பட்ட ரஷ்ய-விரோத ஆட்சியால் தீவிரப்படுத்தப்பட்ட இந்த சுற்றிவளைப்புக் கொள்கை, 1990 களின் இறுதியில் இருந்து சேர்பியா, சோமாலியா, ஆப்கானிஸ்தான், ஈராக், லிபியா மற்றும் சிரியாவில் அமெரிக்கா தலைமையிலான (பினாமி) போர் நடவடிக்கைகளின் பின்னணிக்கு எதிராக, விரைவிலோ அல்லது தாமதமாகவோ புட்டினை ஒரு முன்கூட்டிய தாக்குதலுக்கு தூண்டியிருந்தது.

'வேறு வார்த்தைகளில் கூறுவதானால், புட்டின் ஆட்சியும் முதலாளித்துவ நலன்களை பிரதிநிதித்துவப்படுத்துகிறது மற்றும் தேசியவாதம், இராணுவவாதத்தின் மூலம் அவற்றை செயல்படுத்த முயல்கிறது என்ற உண்மையை ஒருவர் நியாயப்படுத்தாமல் அல்லது புறக்கணிக்காமல், நேட்டோவின் ஏகாதிபத்திய இலக்குகளின் உண்மையான அச்சுறுத்தலுக்கான எதிர்வினையாக, அவரது தற்போதைய நடவடிக்கைகளை அரசியல் ரீதியாக விளக்கப்படலாம்.

'ஒரு பொதுவான வெளிப்புற எதிரிக்கு எதிராக ஒரு செயற்கையான உள் ஐக்கியத்தை உருவாக்குவதற்கும், அதன் மூலம் உள் நெருக்கடிகள் மற்றும் மோதல்களிலிருந்து கவனத்தைத் திசைதிருப்புவதற்கும், அவற்றை வெளிப்புறமாக மாற்றுவதற்கும் போர்வெறியும் போர்களும் ஒரு வழிமுறையாக செயல்படுகின்றன என்பதை எப்போதும் நினைவில் கொள்ள வேண்டும். தற்போது, இலாபத்திற்கு பின்னரே வாழ்க்கை என்ற பேரழிவு கொள்கையின் (COVID-19 தொற்றுநோய்களில்) விளைவுகளிலிருந்து திசைதிருப்ப முயற்சி செய்வதில் முக்கிய கவனம் செலுத்தப்படுகிறது.

'போர் அணிதிரட்டலைப் போலவே, நிரந்தரம் (endemic) என்று கூறப்படும் வீரியம் குறையும் கோவிட் தொற்றுநோய் (pandemic) ஏற்றுக்கொள்ளப்பட வேண்டிய 'புதிய இயல்பு' என்று அறிவிக்கப்படுகிறது. இதன்படி ‘நாம்’ காலங்காலமாக சிக்கன நடவடிக்கைக்கு முகம்கொடுத்து வாழ்வது போல், போர், தொற்றுநோய்களுடன் வாழக் கற்றுக் கொள்ள வேண்டும்.

'போர் மற்றும் தொற்றுநோய்க்கு எதிராக தொழிலாள வர்க்கத்தை அணிதிரட்ட ஒரு அரசியல் வேலைத்திட்டத்தை வகுப்பதற்காக WSWS இன்று சர்வதேச இணைய கருத்தரங்கை நடத்துவதை நான் வரவேற்கிறேன். இந்த நிகழ்வை நான் மிகுந்த ஆர்வத்துடன் எதிர்நோக்குகிறேன், மேலும் இது தொடர்பாக பரவலான சர்வதேச கவனத்தை ஈர்க்க விரும்புகிறேன்.

டூயிஸ்பேர்க்கின் ஆசிரியர் ஹரால்ட் எழுதினார்: 'நீண்ட காலமாக வளர்ந்து வரும் நேட்டோ சக்திகளின் நலன்கள் மற்றும் இலக்குகளையும் கணக்கில் எடுத்துக் கொண்டால் மட்டுமே ரஷ்யாவிற்கும் உக்ரேனுக்கும் இடையிலான போரை சரியாக மதிப்பிட முடியும்: மூலோபாய நலன்கள் பாரிய ஜேர்மன் நிறுவனங்கள் மற்றும் அமெரிக்க நிறுவனங்கள், எடுத்துக்காட்டாக, கிழக்கு ஐரோப்பா, ரஷ்யா மற்றும் சீனா முழுவதும் வளங்களை (கனிம வளங்கள், தொழிலாளர் மற்றும் விற்பனை சந்தைகள்) மிகப் பெரிய கட்டுப்பாடு மற்றும் பொருளாதார சுரண்டலை அடிப்படையாகக் கொண்டவை. இது முதலாளித்துவத்தின் இயல்பில் உள்ளது..

“The interest of the Putin regime lies in defending its dreamed-of ‘independent’ political existence as a quasi-neo-czarist superpower, after the main Russian successor state to the USSR has rapidly opened up to the capitalist world market since the 1990s.

புட்டின் ஆட்சியின் ஆர்வம், சோவியத் ஒன்றியத்தின் முக்கிய ரஷ்ய வாரிசு அரசு, 1990 களில் இருந்து முதலாளித்துவ உலகச் சந்தைக்கு விரைவாகத் திறந்துவிட்ட பின்னர், ஒரு அரை-நவ-ஜாரிச வல்லரசாக அது கனவு கண்ட 'சுதந்திர' அரசியல் இருப்பைப் பாதுகாப்பதில் உள்ளது.

'வேகமாக வளர்ந்துவரும் இந்த உலகப் போர் சூழ்நிலைக்கு ஒரு தீர்வு, சர்வதேச தொழிலாள வர்க்கத்தை சோசலிச போர்-எதிர்ப்பு இயக்கத்தில் ஐக்கியப்படுத்துவதன் மூலம் மட்டுமே சாத்தியமாகும். உலகெங்கிலும் உள்ள உழைக்கும் மக்களுக்கு அறிவூட்டுவதிலும் கல்வி கற்பதிலும் WSWS தீர்க்கமான பாத்திரத்தை வகிக்கிறது. இன்று இரவு 10 மணிக்கு WSWS இன் இணையவழி கருத்தரங்கில் கலந்து கொள்ளுங்கள். (பேர்லின் நேரம்)!'

வடக்கு ஹெஸ்ஸைச் சேர்ந்த செவிலியரும் மூன்று பிள்ளைகளின் தாயுமான தாட்டியானா கருத்துத் தெரிவிக்கையில், “குழந்தைகள் காரணமாக மட்டுமே போர் தடுக்கப்படும் என்று நான் நம்பினேன். கொரோனா வைரஸைப் பற்றியும், பணவீக்கம் மற்றும் காலநிலை பற்றியும் எங்களுக்கு ஏற்கனவே போதுமான கவலைகள் இல்லை என்பது போல. இந்தப் போர் எல்லாவற்றிலும் முதலிடம் வகிக்கிறது மற்றும் அதை மோசமாக்குகிறது, மேலும் மூன்றாம் உலகப் போரின் அச்சுறுத்தல் இப்போது மிகவும் உண்மையானதாகி வருகிறது.

'உலக வல்லரசான அமெரிக்கா உலகில் எல்லா இடங்களிலும் தலையிட்டு, பூகோள அரசியல் ரீதியாக அனைத்தையும் கட்டுப்படுத்த விரும்புவதற்கு யாரும் இறக்கக்கூடாது. பல ஆண்டுகளாக அவர்கள் ஆயுதம் ஏந்தியிருக்கிறார்கள், ரஷ்யாவைச் சுற்றியுள்ள நாடுகளான போலந்து, பால்டிக் நாடுகள், ஹங்கேரி, செக் குடியரசு, பல்கேரியா, ருமேனியா ஆகிய நாடுகளுக்கு நேட்டோ ஆயுதம் கொடுத்து வருகிறது. அதற்கு புட்டினிடம் முற்போக்கான பதில் இல்லை. ரஷ்ய இரகசிய சேவையில் பல ஆண்டுகளாக பணியாற்றியவர், இப்போது மகாரஷ்ய தேசியவாதம் மற்றும் போருடன் எதிர்வினையாற்றுகிறார்.

'ரஷ்யர்களுக்கும் உக்ரேனியர்களுக்கும் பொதுவான வரலாறு உள்ளது. பெரும்பான்மையான மக்கள் நிச்சயமாக ஒரு போரை விரும்பவில்லை, இந்தப் போர், மேற்கு மற்றும் கிழக்கில் உள்ள எரிவாயு மற்றும் எண்ணெய் அதிபர்கள், பில்லியனர்கள், ஆயுத வியாபாரிகள் மற்றும் முன்னாள் சோவியத் ஒன்றியத்தின் அரச சொத்துக்களை அபகரித்த தன்னலக் குழுக்களுக்கு பயனளிக்கும்.

'ஜேர்மனி ஆயுதங்களை வழங்க விரும்பாதது நல்லது என்று முதலில் நான் நினைத்தேன், ஆனால் இப்போது அதைக் கோரும் குரல்கள் அதிகமாகி வருகின்றன.

'அதே நேரத்தில், அவர்கள் கொரோனா வைரஸ் தொற்றுநோயை அதன் போக்கில் இயங்க அனுமதிக்கிறார்கள். கொரோனா வைரஸுக்கு எதிரான போர் மட்டுமே நமக்குத் தேவை! ஆனால் எந்த அரசாங்கமும் அப்படி செய்யவில்லை. உலகெங்கிலும் உள்ள தொழிலாளர்களாகிய நாம் ஒன்றுபட்டு நின்று விஷயங்களை நம் கைகளில் எடுத்துக் கொள்ளும்போதுதான் அது நடக்கும்.

ஸ்ருட்கார்ட்டைச் சேர்ந்த மரத் தொழிலாளியான மிக்கையில் எங்களிடம் கூறினார், “போர் இப்போது போர் தொடங்கப்பட்டால் அது நல்லவாய்ப்பல்ல —மேற்கத்திய ஏகாதிபத்தியவாதிகள் பல வாரங்களாக ஊடகங்களில் போர் சொற்பொழிவுகளை ஆற்றினார்கள். ஆனால் நடைமுறையில் உக்ரேனுக்கு ஆயுத விநியோகம் மூலமாக அதனை தயாரித்து வருகின்றனர்.

'புட்டின் ஆட்சி முன்னேறும் என்று நான் உண்மையில் எதிர்பார்க்கவில்லை. வெளிப்படையாக, ரஷ்யா எந்த பிரதிநிதிகளையும் அனுப்பாததால், முனிச் பாதுகாப்பு மாநாட்டிற்கு முன்பே தாக்க முடிவு எடுக்கப்பட்டது. உக்ரேனிய மண்ணில் நேட்டோ விரிவாக்கத்திற்கு எதிராக ஐரோப்பிய சக்திகளோ அல்லது அமெரிக்காவோ உத்தரவாதம் அளிக்க தயாராக இல்லை என்பது கிரெம்ளினுக்கு தெளிவாகத் தெரிந்தது. ஆனால் அத்தகைய ‘பாதுகாப்பு உத்தரவாதத்திற்கு’ என்ன மதிப்பு இருந்திருக்கும்?

“உலகளாவிய தொழிலாள வர்க்கம் இப்போதே அணிதிரள வேண்டும், அரசியல் கட்சிகள், தொழிற்சங்கங்கள் மற்றும் போலி-இடது குழுக்களில் இருந்து முற்றிலும் சுயாதீனமாக செயல்படும் ஒரு போர்-எதிர்ப்பு வேலைத்திட்டத்துடன் ஆயுதம் ஆயுதபாணியாக வேண்டும், அதுவே போர், சமூக சமத்துவமின்மை மற்றும் சுரண்டல் என்ற தீமையின் வேரான முதலாளித்துவ அமைப்பு முறையை முடிவுகட்டக்கூடியது.”