மொழிபெயர்ப்பின் மூலக் கட்டுரையை இங்கே காணலாம்

ரஷ்ய மற்றும் உக்ரேனிய பேச்சுவார்த்தைக் குழுக்கள் செவ்வாயன்று இஸ்தான்புல்லில் துருக்கிய ஜனாதிபதி ரெசெப் எர்டோகன் நடத்திய பேச்சுக்களுக்காக சந்தித்தன, இது உக்ரேனில் ஒரு மாத காலப் போரை முடிவுக்குக் கொண்டுவருவதை நோக்கமாகக் கொண்டது.

முதலில் இரண்டு நாட்களுக்கு திட்டமிடப்பட்ட பேச்சுவார்த்தை, முதல் நாள் முடிந்ததும், இரு தரப்பினரும் 'சாதகமான அறிகுறிகளை' பற்றிப் பேசினர்.

உக்ரேன் கிரெம்ளினிடம் 'சமாதான உடன்படிக்கைக்கு' தனது முன்மொழிவுகளை சமர்ப்பித்துள்ளது, அதில் பின்வருவன அடங்கும்:

1) ரஷ்யா உட்பட பல மாநிலங்களின் பாதுகாப்பு உத்தரவாதங்களுக்கு ஈடாக, உக்ரேன் முறையான நடுநிலை நிலையை ஏற்றுக்கொள்கிறது, இதில் நாடு எந்த இராணுவக் கூட்டணியிலும் சேராது (அதாவது, நேட்டோ), பாதுகாப்பு உத்தரவாதங்களை வழங்கிய அனைத்து அரசுகளும் ஒப்புக் கொள்ளாத வரை கூட்டணிகளுடன் கூட்டு இராணுவப் பயிற்சிகளை நடத்தக்கூடாது மற்றும் வெளிநாட்டு இராணுவத் தளங்களை நடத்தாது மற்றும் நடத்தக்கூடாது என்ற உத்தரவாதத்தை உள்ளடக்கியது.

2) கிரிமியன் தீபகற்பத்தின் நிலை குறித்த பேச்சுக்கள் அடுத்த 15 ஆண்டுகளுக்கு நடத்தப்படும், இதன் போது ரஷ்யாவோ அல்லது உக்ரேனோ இராணுவ வழிமுறைகளால் சர்ச்சையைத் தீர்க்க முயற்சிக்காது;

3) உக்ரேன் 2014 முதல் ரஷ்ய சார்பு பிரிவினைவாதிகளால் கட்டுப்படுத்தப்பட்ட டொன்பாஸை இராணுவ வழிகளில் திரும்பப் பெற முயற்சிக்காது;

4) ஐரோப்பிய ஒன்றியத்தில் உக்ரேன் நுழைவதை ரஷ்யா ஏற்கும்.

கிரிமியாவையும் டொன்பாஸையும் திரும்பப் பெறுவதை வெளிப்படையாக இலக்காகக் கொண்ட மார்ச் 2021 இல் ஏற்றுக்கொள்ளப்பட்ட அதன் தற்போதைய இராணுவ மூலோபாயத்தை உக்ரேன் கைவிடுவதற்கு இந்த முன்மொழிவுகள் சமமாக இருக்கும். இந்த மூலோபாயம் தற்போதைய போருக்கு வழிவகுத்த முக்கிய ஆத்திரமூட்டல்களில் ஒன்றாகும். எவ்வாறாயினும், கூட்டம் முடிவடைந்த உடனேயே, உக்ரேனின் ஜனாதிபதி வோலோடிமிர் செலென்ஸ்கி, உக்ரேனின் 'பிராந்திய ஒருமைப்பாடு', அதாவது டொன்பாஸ் மற்றும் கிரிமியாவின் நிலை ஆகியவற்றில் சலுகைகளை வழங்க விரும்பவில்லை என்று அறிவித்தார்.

ரஷ்யா, அதன் பங்கிற்கு, பேச்சுவார்த்தைகள் தொடர்வதற்கு வசதியாக, உக்ரேனிய தலைநகரான கியேவ் மற்றும் செர்னிகோவ் திசையில் தனது இராணுவ நடவடிக்கைகளை 'கடுமையாக' குறைக்கும் என்று அறிவித்தது. கிரெம்ளின் இப்போது உக்ரேனின் முன்மொழிவுகளை பரிசீலிக்கும் மற்றும் விளாடிமிர் புட்டின் ஒரு சமாதான ஒப்பந்தம் உருவாக்கப்பட்டவுடன் செலென்ஸ்கியை சந்திக்க தயாராக இருப்பதாக கூறினார்.

பேச்சுவார்த்தைக்கு முன்னரே, ரஷ்யாவின் இராணுவ மூலோபாயத்தில் மாற்றங்கள் ஏற்படுவதற்கான அறிகுறிகள் தென்பட்டன. வெள்ளியன்று, ரஷ்யாவின் பொதுப் பணியாளர்களின் துணைத் தலைவரும், உக்ரேனில் உள்ள இராணுவ நடவடிக்கையின் தலைவருமான சேர்ஜி ருட்ஸ்காய், ரஷ்ய இராணுவ நடவடிக்கைகளின் கவனம் கிழக்கு உக்ரேனில் உள்ள டொன்பாஸுக்கு மாற்றப்படும், ஏனெனில் நடவடிக்கையின் 'முதல் கட்டம்' 'வெற்றிகரமாக முடிக்கப்பட்டது' என அறிவித்தார்.

மேற்கு உக்ரேனில் உள்ள இலக்குகள் மீது பல ரஷ்ய வான்வழித் தாக்குதல்கள் பதிவாகியிருந்தாலும், தெற்கு உக்ரேனின் பெரும் பகுதிகளிலிருந்தும் கியேவைச் சுற்றியுள்ள பகுதிகளிலிருந்தும் ரஷ்யப் படைகள் வெளிப்படையாகத் திரும்பப் பெறப்படுவதை ஊடகங்கள் சுட்டிக்காட்டியுள்ளன.

கடந்த ஒரு மாதமாக நடந்த போரில், ரஷ்யாவின் இராணுவம் பெரும் இழப்பை சந்தித்துள்ளது. பாதுகாப்பு அமைச்சகம் இப்போது 1,351 ரஷ்ய துருப்புக்கள் இறந்ததாகவும், 3,925 பேர் காயமடைந்ததாகவும் ஒப்புக் கொண்டாலும், பென்டகனின் மதிப்பீடுகள் 7,000 பேர் இறந்ததாகவும் கிட்டத்தட்ட 30,000 பேர் காயமடைந்ததாகவும் கூறுகிறது. ஒப்பிட்டுப் பார்த்தால், டிசம்பர் 1979 முதல் பிப்ரவரி 1989 வரை ஆப்கானிஸ்தானில் ஏறத்தாழ தசாப்த காலப் போரில், சோவியத் படைகள் 15,000 துருப்புக்களுக்குக் குறைவாகவே இழந்தன.

ரஷ்ய மூத்த இராணுவத் தலைவர்களின் உயிரிழப்பு புள்ளிவிவரங்கள் குறிப்பாக அதிர்ச்சியளிக்கின்றன. 15 ஜெனரல்கள் மற்றும் மூத்த அதிகாரிகள் கொல்லப்பட்டதாக அறிக்கைகள் தெரிவிக்கின்றன, பிசினஸ் இன்சைடர் 'ரஷ்ய அதிகாரி உயரடுக்கு உக்ரேனில் அழிக்கப்படுகிறது' என்று குறிப்பிடுகிறது.

அமெரிக்க ஜனாதிபதி ஜோ பைடென் வார்சோவிற்கு விஜயம் செய்த சில நாட்களுக்குப் பின்னர் செவ்வாயன்று அமைதிப் பேச்சுக்கள் வந்தன, அதன் போது மிகவும் ஆத்திரமூட்டும் 'தவறுகள்' ஒன்றின்பின் மற்றொன்றாக தொடர்ந்தன: முதலில், 82வது அமெரிக்க வான்வழிப் பிரிவின் உறுப்பினர்களிடம் பைடென், உக்ரேனில் எதிர்ப்பு எவ்வளவு வலுவாக உள்ளது என 'நீங்கள் அங்கு போகும்போது பார்க்கப் போகிறீர்கள்' என்று கூறினார். அவர்கள் விரைவில் போர் மண்டலத்திற்கு அனுப்பப்படுவார்கள் என்பதை சுட்டிக்காட்டுகிறது. பின்னர் சனிக்கிழமையன்று அவர் பகிரங்கமாக அமெரிக்க மூலோபாயத்தின் இலக்காக இருந்ததை அறிவித்தார் —மாஸ்கோவில் ஆட்சி மாற்றம்— மற்றும் அமெரிக்கா 'தசாப்தகால' போருக்கு தயாராக வேண்டும் என்றார்.

முன்னதாக புட்டினை ஒரு 'போர்க் குற்றவாளி' என்று கண்டித்த பைடென், அமெரிக்க-ரஷ்ய உறவுகளை வேண்டுமென்றே சரிவின் விளிம்பிற்கு கொண்டு வந்தார், ரஷ்ய ஜனாதிபதியை 'கசாப்புக் கடைக்காரர்' என்றும் அழைத்தார்.

அவரது ஊழியர்களால் அதை விரைவாக திரும்ப பெற முயற்சித்த போதிலும், அமெரிக்க ஜனாதிபதியின் இந்த பகிரங்க அறிக்கைகளில் ஏதேனும் ஒன்று, போரின் பெரும் இராணுவ விரிவாக்கத்திற்கு அடிப்படையாக அமைந்திருக்கும். ரஷ்ய வெளியுறவுக் கொள்கை வட்டாரங்களால், இதை வியக்கத்தக்க வகையில், போருக்கு அமைதியான தீர்வு காண்பதில் வாஷிங்டனுக்கு எந்த அக்கறையும் இல்லை என்பதற்கான தெளிவான அறிகுறியாக விளக்கப்பட்டது.

திங்களன்று, பைடென் இன்னுமொரு அசாதாரண அறிக்கையை வெளியிட்டார், 'போலந்தில் இருக்கும் உக்ரேனிய துருப்புக்களுக்குப் பயிற்சி அளிக்க அமெரிக்கா உதவுகிறது' என்று கூறினார், வெள்ளை மாளிகையும் அமெரிக்க இராணுவமும் இதற்கு முன்பு இதை மறுத்திருந்தன. திங்களன்று, வெள்ளை மாளிகை காங்கிரஸிடம் 2023 ஆம் ஆண்டிற்கான 813 பில்லியன் டாலர் மதிப்பிலான போர் வரவு-செலவுத் திட்டத்திற்கான கோரிக்கையை சமர்ப்பித்தது, இதில் உக்ரேனுக்கான 682 மில்லியன் டாலர்களும் அடங்கும்.

பேச்சுவார்த்தைகளின் முடிவு மற்றும் கிரெம்ளின் கியேவை சுற்றி அதன் இராணுவ நடவடிக்கையை குறைக்கும் உத்தரவாதம் பற்றி கேட்டபோது, பைடென் ஆர்வத்தைத் தவிர எல்லாவற்றையும் காட்டினார்: 'அவர்களின் செயல்கள் என்னவென்று பார்க்கும் வரை நான் அதில் எதையும் படிப்பதில்லை.'

பென்டகன் செய்தித் தொடர்பாளர் ஜான் கிர்பியும் கிரெம்ளினின் உறுதிமொழிகளை நிராகரித்து, 'யாரும் தங்களைத் தாங்களே கிண்டல் செய்து கொள்ளக் கூடாது' என்று கூறினார்.

அண்மைக்காலமாக வெளிவிவகாரங்களில் வெளியான கட்டுரைகள், வாஷிங்டன் இப்போதைக்கு போரின் ஒருவித தீர்வை ஏற்றுக்கொண்டாலும், அது வார்த்தைகளே தவிர, உக்ரேனின் ஏகாதிபத்தியத்தின் பினாமி என்ற நிலைப்பாட்டை உறுதி செய்யும் ஒன்றாக மட்டுமே இருக்கும் என்று சுட்டிக்காட்டுகிறன. 2017 முதல் 2019 வரை ட்ரம்ப்பின் கீழ் ஐரோப்பா மற்றும் யூரேசியாவுக்கான அமெரிக்க உதவி செயலாளராக இருந்த ஏ. வெஸ் மிட்செல், 'ஒரு ஒப்பந்தம் மரண தண்டனையாக இருக்க வேண்டியதில்லை' என்று வாதிட்டார்.

சம்பிரதாயமான நடுநிலைமையை ஏற்றுக்கொள்வதன் மூலம் கூட, உக்ரேன் 'நேட்டோ உறுப்புரிமையை துறப்பது நாட்டின் தற்காப்பு அல்லது மேற்குலகின் பொருளாதார மற்றும் அரசியல் எதிர்காலத்திற்கான அதன் வாய்ப்புகளை இழக்காமல் இருப்பதை உறுதி செய்யும்' உடன்பாட்டைப் பெற முடியும் என்று அவர் வாதிட்டார்.

அத்தகைய ஒப்பந்தம், 'அதன் இராணுவ வளர்ச்சிக்கு [மேற்கு நாடுகளால்] வெளிநாட்டு உதவி மற்றும் ஆயுதக் கொள்முதல் மூலம் ஆதரவளிக்கும் அர்ப்பணிப்பை' உள்ளடக்கும் - அதாவது, பல ஆண்டுகளாக நடந்து வரும் உக்ரேனுக்கு பல பில்லியன் டாலர் ஆயுத ஏற்றுமதியின் தொடர்ச்சியாகும். இது போருடன் பெரிதும் துரிதப்படுத்தப்பட்டுள்ளது.

எவ்வாறாயினும், உக்ரேனிய அரசியலிலும் அரசு எந்திரத்திலும் மகத்தான செல்வாக்கைக் கொண்டிருக்கும் வாஷிங்டனாலோ அல்லது இப்போது நேட்டோ ஆயுதங்கள் மற்றும் டாங்கிகளுடன் பெரிதும் ஆயுதம் ஏந்தியிருக்கும் உக்ரேனிய தீவிர வலதுசாரிகளாலோ எந்த விதமான ஒப்பந்தமும் ஏற்றுக்கொள்ளப்படும் என்பது உறுதியற்றது.

போர் தொடங்கியதிலிருந்து, உக்ரேனிய இரகசிய சேவை (SBU), நாஜி ஒத்துழைப்பு அமைப்பான உக்ரேனிய தேசியவாதிகளின் (OUN) பாரம்பரியத்தில் வெளிப்படையாக தன்னை நிலைநிறுத்திக்கொள்கிறது, ரஷ்ய சார்பு எதிர்ப்பாளர்கள் மற்றும் உக்ரேனிய பேச்சுவார்த்தை குழு உறுப்பினர்களுக்கு எதிராக பயங்கரவாத பிரச்சாரத்தை மேற்கொண்டது. பேச்சுவார்த்தைக் குழுவில் ஒரு உறுப்பினர் கொல்லப்பட்டார், மேலும் குறைந்தபட்சம் ஒருவர் 'தேசத்துரோகத்திற்காக' கைது செய்யப்பட்டார். இன்னும் பல அரசியல்வாதிகள் கைது செய்யப்பட்டுள்ளனர் அல்லது காணாமல் போயுள்ளனர்.

திங்களன்று, வோல் ஸ்ட்ரீட் ஜேர்னல், உக்ரேனுடன் சமாதானப் பேச்சுவார்த்தைகளில் ஈடுபட்டிருந்த தன்னலக்குழு தலைவர் ரோமன் அப்ரமோவிச் மற்றும் உக்ரேனிய பேச்சுவார்த்தைக் குழுவின் பல உறுப்பினர்களும் இந்த மாத தொடக்கத்தில் நடந்த பேச்சுவார்த்தையின் போது விஷம் குடித்திருக்கலாம் என தெரிவித்தது. நேட்டோவுடன் ஆவணப்படுத்தப்பட்ட உறவுகளைக் கொண்ட மிகவும் சந்தேகத்திற்குரிய 'விசாரணை' கூட்டமைப்பான பெல்லிங்கட் (Bellingcat) உடன் ஜேர்னல் நடத்திய கூட்டு விசாரணையின் அடிப்படையில் இந்த அறிக்கை வெளியிடப்பட்டது. வலதுசாரி அமெரிக்க ஆதரவுடைய புட்டின் விமர்சகர் அலெக்ஸி நவால்னிக்கு விஷம் கொடுத்ததாக கூறப்படும் 'வெளிப்படுத்தல்களுக்கு' பின்னால் பெல்லிங்கட் இருந்தது.

வோல் ஸ்ட்ரீட் ஜேர்னல், 'மாஸ்கோவில் உள்ள கடும்போக்குவாதிகள்' சந்தேகத்திற்குரிய நச்சுத்தன்மையின் பின்னணியில் இருப்பதாக உடனடியாகக் கூறுகிறது. எவ்வாறாயினும், அப்ரமோவிச் மற்றும் பிற பேச்சுவார்த்தையாளர்கள் உண்மையில் விஷம் கலந்த முயற்சிக்கு உட்பட்டிருந்தால், உக்ரேனிய SBU அல்லது நாட்டின் பல தீவிர வலதுசாரி ஆயுததாரிகளில் ஒன்று அதைச் செய்திருக்க வாய்ப்புள்ளது. மோதலுக்கு தீர்வு காண்பதை தடுக்க தங்களால் இயன்ற அனைத்தையும் செய்வார்கள் என்பதை, படுகொலைகள் உட்பட, மீண்டும் மீண்டும் நிரூபித்துள்ளனர்.