மொழிபெயர்ப்பின் மூலக் கட்டுரையை இங்கே காணலாம். 

கடந்த நவம்பரில், புதிதாகத் தேர்ந்தெடுக்கப்பட்ட ஜனநாயக சோசலிஸ்ட்டான ஜோஹ்ரான் மம்தானியுடன் ஒரு மணிநேரம் செலவழித்த பிறகு, டொனால்ட் ட்ரம்ப் அவரை “மிகவும் பகுத்தறிவுள்ளவர்” என்று விவரித்ததோடு, அவர் “மிகச்சிறந்த” காரியங்களைச் செய்வார் என்றும் கணித்தார். மம்தானி இந்த பாசிச ஜனாதிபதியின் கணிப்பை ஏமாற்றவில்லை.

நியூ யோர்க் நகர மேயராக மம்தானி பதவியேற்று ஒரு மாதமே ஆகிறது. ஆனால் இந்தக் குறுகிய காலத்திற்குள், அவர் ஏற்கனவே ஒரு பெரிய சாதனையைச் செய்துள்ளார். அதாவது, அவரைப் பதவிக்குக் கொண்டு வந்த அந்த எதிர்ப்பு உணர்வை முழுமையாகக் காட்டிக்கொடுத்து, அதை நிராகரித்துள்ளார். கோல் (Gaul) தேசத்திற்கு (தற்கால பிரான்ஸ், பெல்ஜியம் மற்றும் சுவிட்சர்லாந்து உள்ளடக்கிய பகுதிகள்) சீசர், “வந்தார், பார்த்தார், வென்றார்.” நியூ யோர்க் நகர மேயரின் அதிகாரபூர்வ மாளிகையான கிரேசி மேன்ஷனில் இருக்கும் மம்தானியோ, சமரசம் செய்தார், கூட்டுச் சேர்ந்தார், சரணடைந்துள்ளார்.

தொடர்ச்சியான ஒழுங்கற்ற பின்வாங்கல்களின் வரிசையில் கடைசியாக வந்தது கடந்த வியாழக்கிழமை அன்று மம்தானி எடுத்த முடிவாகும். நடைபெறவுள்ள ஆளுநர் முதன்மைத் தேர்தலில், வலதுசாரி ஜனநாயகக் கட்சிக்காரரும் நியூ யோர்க் ஆளுநருமான கேத்தி ஹோச்சுலுக்கு அவர் அளித்துள்ள ஆதரவாகும். ஒரு சாதாரண சட்டமன்ற உறுப்பினராக இருந்தபோது, காஸாவில் நடக்கும் இனப்படுகொலைக்கு ஹோச்சுல் அளிக்கும் ஆதரவை “அருவருப்பானது” என்று விவரித்த மம்தானி, ஹோச்சுலின் அரசியல் வேலைத்திட்டங்களை “குறைந்தபட்ச குடியரசுக் கட்சியின் கொள்கை” என்று கண்டித்தார். இது நடந்து வெறும் இரண்டு ஆண்டுகள் தான் ஆகின்றன.

ஆனால் தி நேஷன் இதழில் வெளியான ஒரு அறிக்கையில், மம்தானி தனது அருவருப்பை வியப்பாக மாற்றிக்கொண்டு, “திறமையான மற்றும் நம்பிக்கைக்குரிய அரசாங்கத்திற்கான தங்களின் பகிரப்பட்ட அர்ப்பணிப்பை” பாராட்டியதன் மூலம், ஹோச்சுலுக்கான தனது ஆதரவை நியாயப்படுத்தினார். ஹோச்சுல் “மாற்றத்தின்” உணர்வோடு “ஆட்சி செய்யத் தேர்ந்தெடுத்துள்ளார்” என்று எழுதிய அவர், அவர்களின் ஒத்துழைப்பை பயனுள்ள அரசாங்கத்தின் முன்மாதிரியாக முன்வைத்தார்.

இந்த அரசியல் வெற்றுப் பேச்சுகளுக்கு மத்தியில், நியூ யோர்க் நகரில் 15,000-க்கும் மேற்பட்ட செவிலியர்கள் பாதுகாப்பான பணியாளர் நியமனம், வாழ்வாதார ஊதியம் மற்றும் அடிப்படை பணியிடப் பாதுகாப்பு கோரி கடந்த நான்கு வாரங்களாக வேலைநிறுத்தத்தில் ஈடுபட்டுள்ளதை மம்தானி குறிப்பிடவில்லை.

ஜனநாயகக் கட்சியின் அதிகார மையத்தின் தூணாகவும், கோடீஸ்வரராகவும் இருக்கும் ஹோச்சுல், இந்த வேலைநிறுத்தத்தை முறியடிக்கும் முயற்சிகளில் முக்கிய பங்கு வகிப்பதன் மூலம் “ஆட்சி செய்யத் தேர்ந்தெடுத்துள்ளார்”. செவிலியர்கள் பணியைப் புறக்கணித்து வெளியேறுவதற்கு முன்பே, நியூ யோர்க் உரிமம் இல்லாத வெளிமாநில செவிலியர்களை மருத்துவமனைகள் இறக்குமதி செய்ய அனுமதிக்கும் வகையில், அவர் ஒரு “அவசரநிலை” உத்தரவைப் பிறப்பித்தார். அதன்பிறகு, மருத்துவமனைகளில் இடம்பெற்றுவரும் வேலைநிறுத்தத்தை முறியடிக்க நியமிக்கப்பட்ட கருங்காலிகளுக்காக 100 மில்லியன் டாலர்களுக்கும் மேல் அவர் செலவிட்டுள்ளார். அதே சமயம், வேலைநிறுத்தத்தில் ஈடுபட்டுள்ள செவிலியர்கள் மருத்துவக் காப்பீடு அல்லது வேலைநிறுத்தக் கால ஊதியம் இன்றித் தவித்து வருகின்றனர்.

இந்த வார தொடக்கத்தில், நூற்றுக்கணக்கான செவிலியர்கள் உறைய வைக்கும் குளிரையும் பொருட்படுத்தாமல் மன்ஹாட்டனில் உள்ள ஹோச்சுலின் அலுவலகத்திற்கு அணிவகுத்துச் சென்று, “அவரைத் தோற்கடிப்போம்!” என்று முழக்கமிட்டதோடு, “எங்கள் உயிர்களை ஆபத்தில் ஆழ்த்தியதற்காக” அவரைக் கண்டித்தனர். சில மணிநேரங்களுக்குப் பிறகு, ஹோச்சுல் வேலைநிறுத்தத்தை முறியடிக்கும் நடவடிக்கையை நீட்டித்தார். இது செவிலியர்கள் மீதான அவரது அலட்சியத்தையும், கோடீஸ்வர மருத்துவமனை நிர்வாகிகளுக்கும், செவிலியர்கள் போராடும் மருத்துவமனைகளின் வாரியங்களில் அமர்ந்திருக்கும் பெரும் தன்னலக் குழுக்களுக்கும் அவர் காட்டும் விசுவாசத்தையும் அடிக்கோடிட்டுக் காட்டுகிறது.

மம்தானி, செவிலியர்களின் முதுகில் குத்திக் கொண்டே, போராட்டக் களங்களில் புகைப்படங்களுக்கு போஸ் கொடுத்துக் கொண்டிருக்கிறார். ஹோச்சுல் மற்றும் நியூ யோர்க் மாநில செவிலியர் சங்கத்தின் (NYSNA) தலைமையுடன் திரைக்குப் பின்னால் இணைந்து வேலைநிறுத்தத்தை முடிவுக்குக் கொண்டு வர அவர் வேலை செய்கிறார்.

ஹோச்சுலை ஆதரிப்பதன் மூலம், மம்தானி தனது அரசியல் கூட்டாளியின் முதுகில் கத்தியால் குத்தும் திறமையை நிரூபித்துள்ளார். ஜனநாயகக் கட்சி முதன்மைத் தேர்தலில், ஹோச்சுலின் முக்கிய எதிர்ப்பாளர் துணை ஆளுநர் அன்டோனியோ டெல்கடோ ஆவார். டெல்கடோ தனது தேர்தல் கூட்டாளியாக இந்தியா வால்டனைத் தேர்ந்தெடுத்துள்ளார். வால்டன், அமெரிக்காவின் ஜனநாயக சோசலிஸ்டுகள் (DSA) கட்சியின் உறுப்பினர் மற்றும் பபலோ நகரின் முன்னாள் மேயர் வேட்பாளர் ஆவார். 2021-ல் மம்தானி இவருக்காகத் தனிப்பட்ட முறையில் பிரச்சாரம் செய்திருந்தார்.

ஹோச்சுலுக்கான இந்த ஆதரவு, மம்தானியின் பதவிக்காலத்தின் முதல் மாதத்தை வரையறுக்கும் மோசமான துரோகங்கள் மற்றும் தொடர்ச்சியான சூழ்ச்சிகளின் மிகச் சமீபத்தியது மட்டுமே. இதற்கு 10 நாட்களுக்கு முன்புதான், குயின்ஸில் 22 வயது வங்கதேசக் குடியேறியவரான ஜபேஸ் சக்ரபர்த்தியைச் சுட்டுக் கொன்ற போலீஸ் அதிகாரிகளை மம்தானி பாராட்டினார். மனநல நெருக்கடியில் இருந்த சக்ரபர்த்தியின் குடும்பத்தினர் உதவி கோரி 911-க்கு அழைத்தபோது, நியூ யோர்க் பொலிசாரினால் (NYPD) அவர் சுட்டுக் கொல்லப்பட்டார். அவரது குடும்பத்தினர் தடுத்து வைக்கப்பட்டு, விசாரணைக்கு உட்படுத்தப்பட்டு, காயம் அடைந்த தங்கள் மகனைப் பார்க்க அனுமதி மறுக்கப்பட்ட நிலையில், மம்தானியோ “எமது சமூகங்களைப் பாதுகாப்பாக வைத்திருக்க ஒவ்வொரு நாளும் தங்களை அர்ப்பணிக்கும் முதல்நிலை மீட்பாளர்களுக்கு (first responders) எனது நன்றியைத் தெரிவித்துக் கொள்கிறேன்” என்று கூறினார்.

இதைத் தொடர்ந்து, மன்ஹாட்டனில் குடிவரவு மற்றும் சுங்க அமலாக்கத் துறை (ICE) முகவர்களுக்கு எதிராக நடந்த அமைதியான போராட்டத்தின் மீது ஒடுக்குமுறை ஏவப்பட்டது. அங்கு சிவல் உரிமை அமைப்புகளால் நீண்டகாலமாக விமர்சிக்கப்பட்டு வரும் நியூ யோர்க் பொலிசின் மூலோபாய பதிலடி பிரிவு (SRG) பல போராட்டக்காரர்களைக் கைது செய்தது. மம்தானி முன்பு இந்த SRG பிரிவைக் கலைப்பதாக உறுதியளித்திருந்தார் என்பது குறிப்பிடத்தக்கது.

கடந்த வியாழக்கிழமை அன்று, அதே பொலிஸ்துறை நியூ யோர்க் நகர மருத்துவமனைக்கு வெளியே போராட்டம் நடத்திய 13 செவிலியர்களையும், ட்ரம்ப் மற்றும் ICE-யின் நடவடிக்கைகளுக்கு எதிராகப் போராடிய கொலம்பியா பல்கலைக்கழகத்தின் ஒரு டசின் ஆசிரியர்கள், ஊழியர்கள் மற்றும் மாணவர்களையும் கைது செய்தது.

இந்த நடவடிக்கைகள் அனைத்தும் ஜெசிகா டிஷ்-ஆல் கண்காணிக்கப்பட்டன. மம்தானி மேயராகப் பொறுப்பேற்றதும் செய்த முதல் செயல்களில் ஒன்று, ஜெசிகாவை மீண்டும் போலீஸ் கமிஷனராக நியமித்ததுதான். ஒரு கோடீஸ்வர வாரிசும், நியூ யோர்க்கின் பரந்த கண்காணிப்பு அரசு முறையின் முதன்மை வடிவமைப்பாளருமான ஜெசிகா டிஷ், இனப்படுகொலைக்கு எதிரான போராட்டங்களை ஒடுக்குவதிலும், ICE—யுடன் இணைந்து புலம்பெயர்ந்தவர்களைத் தடுத்து வைப்பதிலும் முக்கியப் பங்கு வகித்து வருகிறார்.

நகரத்தின் 12.6 பில்லியன் டாலர் பட்ஜெட் பற்றாக்குறைக்கு தீர்வாகப் பெரிய அளவிலான செலவுக் குறைப்புகளையும் மம்தானி நிர்வாகம் திட்டமிட்டு வருகிறது. “சிக்கன நடவடிக்கைக்கு” எதிரானவர் போலப் பாசாங்கு செய்தாலும், அவர் நகரத் துறைகளில் “தலைமைச் சேமிப்பு அதிகாரிகளின்” (CSO) வலையமைப்பை நிறுவியுள்ளார். இவர்கள் “திறன்” என்ற போர்வையில் செலவுக் குறைப்புகளைக் கண்டறியும் பணியில் ஈடுபட்டுள்ளனர். பணக்காரர்களுக்கு வரி விதிப்பது என்பது மம்தானியின் முக்கிய தேர்தல் முழக்கங்களில் ஒன்றாக இருந்தது. ஆனால் இப்போது ஹோச்சுலுடன் இணைந்து அந்தப் பேச்சையே கைவிட அவர் ஒப்புக்கொண்டுள்ளார்.

நியூ யோர்க்கின் முதல் “சோசலிச” மேயராகத் தேர்ந்தெடுக்கப்பட்ட பிறகு மம்தானி எடுத்த அனைத்து நடவடிக்கைகளும், நவம்பர் 21 அன்று வெள்ளை மாளிகையில் டொனால்ட் ட்ரம்ப்புடன் நடத்திய சந்திப்பிற்குப் பிறகு அவர் மேற்கொண்ட வலதுசாரி மாற்றத்தின் தொடர்ச்சியாகவே உள்ளன.

அந்த நேரத்தில், மம்தானியின் ஜனநாயக சோசலிஸ்டுகள் மற்றும் போலி-இடது ஆதரவாளர்கள், ட்ரம்ப்புடனான அவரது நெருக்கத்தை “வாழ்க்கைச் செலவு குறைப்புத் திட்டத்திற்கு” பாசிச ஜனாதிபதியின் ஆதரவைப் பெறுவதற்கான ஒரு நேர்த்தியான வியூகம் என்று கொண்டாடினர்.

என்ன ஒரு ஏமாற்று வேலை! உண்மையில், பழைய நியூ யோர்க் மோசடி மன்னனான ட்ரம்ப், மம்தானியைச் சரியாக எடைபோட்டு யாரைக் கையாளுகிறோம் என்பதையும், தலையில் ஒரு தட்டிக் கொடுப்பிற்காகக் காத்திருக்கும் மற்றொரு குட்டி-முதலாளித்துவ அரசியல் அடிவருடிதான் இவர் என்றும் புரிந்து கொண்டுள்ளார். தங்கள் விஷயத்தில் கவலைப்படுவதற்கு எதுவுமில்லை என்ற செய்தியை வோல் ஸ்ட்ரீட் அதிகாரத் தரகர்களுக்கு ட்ரம்ப் தெரிவிக்க வேண்டும் என்பது மட்டுமே மம்தானியின் விருப்பமாக இருந்தது. “பெரிய ஆப்பிள்” (நியூ யோர்க் நகரம்) பாதுகாப்பான கைகளில்தான் இருக்கிறது (அதாவது செல்வந்தர்களின் நலன்களுக்குப் பாதிப்பில்லை) என்பதை மம்தானி உறுதிப்படுத்த விரும்பினார்.

மம்தானி பதவியேற்ற இரண்டு நாட்களுக்குப் பிறகு, ட்ரம்ப் வெனிசுவேலா மீது படையெடுத்து அதன் ஜனாதிபதி நிக்கோலஸ் மதுரோவைக் கடத்தினார். அவர் மம்தானியின் அதிகார வரம்பிற்குட்பட்ட புரூக்ளினில் உள்ள ஒரு மத்திய அரசின் சிறைக்குக் கொண்டு செல்லப்பட்டார். இந்த நடவடிக்கை குறித்து ட்ரம்ப்புடன் தொலைபேசியில் பேசியபோது தான் தனிப்பட்ட முறையில் கவலைகளைத் தெரிவித்ததாக மம்தானி கூறினார். ஆனால், அதன் பிறகு அவர் எதையும் சொல்லவில்லை.

ஹோச்சுலுக்கான தனது ஆதரவு அறிக்கையில், தாங்கள் இருவரும் “நியூ யோர்க் மக்களை ICE முகவர்களிடமிருந்து பாதுகாக்கப் போராடினோம்” என்றும் “எமது ஜனநாயகத்தைப்” பாதுகாத்தோம் என்றும் மம்தானி எழுதினார். இந்த அறிக்கைகள் அப்பட்டமான பொய்கள். ட்ரம்ப்புடன் நடத்திய சந்திப்பிற்குப் பிறகு, அரசியலமைப்பிற்கு எதிராகப் போர் தொடுத்து, ஒரு ஜனாதிபதி சர்வாதிகாரத்தை அமல்படுத்தி வரும் ட்ரம்ப் மீது எந்தவொரு ஆழமான பொது விமர்சனத்தையும் முன்வைக்க மம்தானி மறுத்துவிட்டார். பல அறிக்கைகளின்படி, இருவரும் வழக்கமான தொடர்பில் உள்ளனர். மேலும் மம்தானியின் பட்ஜெட் திட்டங்களைப் பாராட்டிய ட்ரம்ப், “நிலைமை எவ்வளவு மோசமாக இருக்கிறது என்பதைப் பற்றி ஜோஹ்ரான் இறுதியாக நேர்மையாக இருக்கிறார்” என்று அறிவித்தார்.

கடந்த நவம்பரில் மம்தானி தேர்ந்தெடுக்கப்பட்டபோது, அவரைப் பதவிக்குக் கொண்டு வந்த பரந்த எதிர்ப்பின் புறநிலை முக்கியத்துவத்தை உலக சோசலிச வலைத் தளம் (WSWS) புரிந்து கொண்டது. ஆனால், அது நடைமுறையில் இருந்த மாயைகளில் சிக்கவில்லை. புதிய நிர்வாகத்தின் முதலாளித்துவ ஆதரவு வர்க்கத் தன்மை விரைவில் வெளிப்படும் என்று அது கணித்தது. “தொழிலாளர்கள் போராட்டத்தில் இறங்கும்போது மம்தானி என்ன செய்வார்?” என்று நாங்கள் எச்சரித்தோம். “தவிர்க்க முடியாமல், வர்க்க நலன்களின் தர்க்கம் தன்னை உறுதிப்படுத்தும். மம்தானி நிதி மற்றும் அரசியல் அதிகார மையங்களின் கோரிக்கைகளுக்கு அடிபணிவார்.”

அவர் அப்படியே செய்தும் காட்டியுள்ளார். மம்தானி ஒரு வழக்கமான, வலதுசாரி முதலாளித்துவ அரசியல்வாதியைப் போலவே நடந்து கொள்கிறார்.

இதன் மூலம், மம்தானி தனது அரசியல் முன்னோடிகளால் அமைக்கப்பட்ட அதே பாதையைத் தொடர்கிறார். கிரேக்கத்தில் சிரிசா (Syriza), ஸ்பெயினில் போடெமோஸ் (Podemos), ஜேர்மனியில் இடது கட்சி (Left Party), பிரிட்டனில் ஜெரமி கார்பின், அமெரிக்காவில் பெர்னி சாண்டர்ஸ் மற்றும் அலெக்ஸாண்ட்ரியா ஒகாசியோ-கார்டெஸ்—இவர்கள் அனைவரும் சிக்கன நடவடிக்கை மற்றும் சமத்துவமின்மையை முடிவுக்குக் கொண்டு வருவதாக உறுதியளித்தனர். ஆனால், தாங்கள் எதிர்ப்பதாகக் கூறிக்கொண்ட நிதி உயரடுக்கிற்கு அனைவரும் சரணடைந்தனர்.

மம்தானி, தான் கொண்டிருந்ததாகக் கூறிய கொள்கைகளை எவ்வளவு விரைவாகத் தூக்கியெறிந்தார் என்பதன் மூலம் மட்டுமே மற்றவர்களிடமிருந்து தன்னை வேறுபடுத்திக் கொள்கிறார். 2015-ல் ஆட்சிக்கு வந்த சிரிசா, சிக்கன நடவடிக்கைகளை முடிவுக்குக் கொண்டு வருவதாகத் தான் அளித்த வாக்குறுதியை நிராகரித்து, ஐரோப்பிய வங்கிகளின் கொடூரமான கோரிக்கைகளை ஏற்க பல மாதங்கள் எடுத்துக் கொண்டது. மம்தானி, சிரிசாவின் அந்த “சாதனைகளை” வெறும் சில வாரங்களிலேயே எட்டிவிட்டார். இது அனைத்தும் முடிவதற்குள், மம்தானி போலி-இடதுசாரிகளிலேயே மிகவும் கீழ்த்தரமான அயோக்கியனாக அம்பலப்படுத்தப்படுவார்.

ஆனால் மம்தானிக்கு அரசியல் கூட்டாளிகளின் ஒரு வலுவான குழு ஆதரவாக இருக்கிறது: “சோசலிசம் வெற்றி பெற்றது!” என்று முழங்கிய DSA, “ஜோஹ்ரான் மம்தானியின் வெற்றி முன்னேற்றத்திற்கான வழியைக் காட்டுகிறது” என்று அறிவித்த அதனுடன் இணைந்த ஜாக்கோபின் இதழ், மற்றும் “ட்ரம்ப் மற்றும் ஜனநாயகக் கட்சி அதிகார மையத்தை எதிர்த்துப் போராட முழு வேகத்தில் முன்னேறுவோம்” என்று உணர்ச்சிவசப்பட்டு தலையங்கம் வெளியிட்ட சோசலிச மாற்று (Socialist Alternative) என்ற அமைப்பு ஆகியவை இதில் அடங்கும்.

WSWS, போலி-இடது என்று குறிப்பிடுவது ஒரு வசவுச் சொல் அல்ல, அது ஒரு துல்லியமான அரசியல் வரையறை என்று கூறுகிறது. அவர்கள் முதலாளித்துவ ஆட்சியின் முக்கிய கருவிகளாகச் செயல்படும் இரண்டாம் நிலை முதலாளித்துவ அரசியல்வாதிகள். சமூக ரீதியாக, அவர்கள் பெருநிறுவன மற்றும் அரசு இயந்திரங்களுடன் நெருங்கிய தொடர்புடைய வசதி படைத்த மேல்-நடுத்தர வர்க்கத்தின் அடுக்குகளைப் பிரதிநிதித்துவப்படுத்துகின்றனர். செல்வம் மற்றும் அதிகாரத்தின் படிநிலையில் தங்களுக்கு இன்னும் வசதியான இடத்தை மட்டுமே அவர்கள் தேடுகிறார்கள்.

மம்தானிக்கு வாக்களித்த அல்லது அவரை ஆதரித்த தொழிலாளர்கள் மற்றும் இளைஞர்கள், இதிலிருந்து கூர்மையான அரசியல் பாடங்களைக் கற்றுக்கொள்வது அவசியமாகும். சோசலிசத்திற்கான போராட்டத்திற்கு, ஜனநாயகக் கட்சியுடன் ஒரு முழுமையான மற்றும் சமரசமற்ற முறிவை ஏற்படுத்திக் கொள்வதும், தொழிலாளர் வர்க்கத்தின் அரசியல் சுயாதீனத்தை நிலைநாட்டுவதும் அவசியமான நிபந்தனைகளாகும். தற்போதுள்ள முறையைச் சீர்திருத்தலாம் என்ற மாயைகளில் வழி பிறக்காது. மாறாக, தொழிலாளர் வர்க்கத்தின் வளர்ந்து வரும் போராட்டங்களின் பக்கம் திரும்புவதிலும், முதலாளித்துவம், பாசிசம் மற்றும் போரை முடிவுக்குக் கொண்டு வருவதற்குத் தேவையான புரட்சிகரத் தலைமையை உருவாக்குவதிலுமே உண்மையான முன்னேற்றத்திற்கான வழி உள்ளது.