மொழிபெயர்ப்பின் மூலக் கட்டுரையை இங்கே காணலாம்.

2003 ஈராக் படையெடுப்பிற்குப் பின்னர், மத்திய கிழக்கில் முன்னெப்போதும் இல்லாத அளவிலான அமெரிக்க இராணுவப் படைகளை ட்ரம்ப் நிர்வாகம் திரட்டி வருகிறது. இது ஈரானுக்கு எதிராக வாரக்கணக்கில் அல்லது மாதக்கணக்கில் நீடிக்கக்கூடிய மற்றும் ஒட்டுமொத்த பிராந்தியத்தையும் விழுங்கக்கூடிய ஒரு பாரிய சட்டவிரோதப் போரின் விளிம்பில் அமெரிக்காவை நிறுத்தியுள்ளது.

அமெரிக்க வான்வழித் தாக்குதல் திறன் குறித்த முதன்மை ஆய்வாளர்களில் ஒருவரும், சிக்காகோ பல்கலைக்கழகத்தின் அரசியல் அறிவியல் பேராசிரியருமான ரொபர்ட் பேப், சனிக்கிழமையன்று எக்ஸ் (X) தளத்தில் இவ்வாறு எழுதினார்: “இது உலகில் நிறுத்தப்படக்கூடிய அமெரிக்க வான்வழித் திறனில் 40-50 சதவீதத்தைப் பிரதிபலிக்கிறது. 1991 மற்றும் 2003 ஈராக் போர்களுக்கு நிகரான வான்வழித் தாக்குதல் சக்தியாக இதைக் கருதலாம். இது இன்னும் வளர்ந்து வருகிறது. ஒரு சாத்தியமான எதிரிக்கு எதிராக அமெரிக்கா இவ்வளவு பெரிய படையை நிறுத்திவிட்டு, தாக்குதலைத் தொடுக்காமல் இருந்ததே இல்லை.”

கடந்த சனிக்கிழமையன்று வெளியான ஜெருசலேம் போஸ்ட் மற்றும் மீடியா லைன் ஆகியவற்றின் செய்திகளின்படி, “தற்போது நான்கு அமெரிக்க விமானம் தாங்கி போர்க்கப்பல் அணிகள் மத்திய கிழக்கு பிராந்தியத்திலோ அல்லது அதை நோக்கியோ நகர்ந்து கொண்டிருக்கின்றன. அது மட்டுமே சமன்பாட்டை மாற்றியமைக்கிறது. சுற்றியுள்ள கடல் பகுதிகளில், சுமார் ஒரு டசின் ஏவுகணை நாசகாரி கப்பல்கள் பரவி நிற்கின்றன. அவற்றில் சில ஹோர்முஸ் ஜலசந்திக்கு அருகிலும், மற்றவை செங்கடலுக்கு அருகிலும் செயல்படுகின்றன.” மேலும் நான்கு விமானம் தாங்கி போர்க்கப்பல் குழுக்கள் இந்தப் படைக்குவிப்பில் ஈடுபட்டுள்ளதாக இந்த ஊடகங்கள் மட்டுமே செய்தி வெளியிட்டுள்ளன.

ஆப்கானிஸ்தானில் பிரிட்டிஷ் படைகளின் முன்னாள் தளபதியாக இருந்த கேர்னல் ரிச்சர்ட் கெம்ப், மீடியா லைனிடம் கூறுகையில்: “எனது புரிதலின்படி, 2003க்குப் பிறகு மத்திய கிழக்கில் நடக்கும் மிகப்பெரிய இராணுவக் குவிப்பு இதுவாகும்.” இது ஜூன் 2025 இல் நடந்த 12 நாள் போரை விட பெரிய அளவிலானது என்று அவர் விவரித்தார். “இது வாரக்கணக்கில் நீடிக்கலாம். இது ஈரானுக்கு எதிரான ஒரு நீண்ட, நீடித்த குண்டுவீச்சுத் தாக்குதலாக இருக்கலாம்,” என்று அவர் கூறினார். தற்போது திரட்டப்பட்டுள்ள படைக் குறித்து அவர் கூறுகையில், “ஆட்சியைப் போதுமான அளவு சேதப்படுத்த இது தேவைப்படுகிறது. இது ஒரு பெயரளவு தாக்குதல் அல்ல,” என்றார்.

இஸ்ரேல் தற்காப்பு மற்றும் பாதுகாப்பு மன்றத்தின் நிறுவனர் பிரிகேடியர் ஜெனரல் அமீர் அவிவி, மூலோபாய இலக்கு ஈரானின் அணுசக்தி நிலையங்களுக்கு அப்பால் மாறிவிட்டதாகக் கூறினார். “இப்போது நாம் ஈரானிய ஆட்சியை வீழ்த்துவது பற்றிப் பேசுகிறோம். இது முற்றிலும் மாறுபட்ட ஒன்று. இரண்டு வாரங்களில் இதைச் செய்துவிட முடியும் என்று நான் நினைக்கிறேன்,” என்று அவர் தெரிவித்தார்.

உலகின் மிகப்பெரிய போர்க் கப்பலான யு.எஸ்.எஸ் ஜெரால்ட் ஆர். போர்டு, மத்திய தரைக்கடலில் இத்தாலிக்கு தெற்கே பயணித்துக் கொண்டிருப்பதாகவும், விரைவில் இஸ்ரேலிய கடற்கரைக்கு அப்பால் இருக்கும் என்றும் நியூ யோர்க் டைம்ஸ் ஞாயிற்றுக்கிழமை செய்தி வெளியிட்டுள்ளது. யு.எஸ்.எஸ் ஆபிரகாம் லிங்கன் விமானம் தாங்கி போர்க்கப்பல் அணி ஏற்கனவே அரேபியக் கடலில் செயல்பட்டு வருகிறது. புதனன்று வெள்ளை மாளிகையின் அவசரகால நடவடிக்கைக் கட்டுப்பாட்டு அறையில் துணை ஜனாதிபதி ஜே.டி. வான்ஸ், வெளியுறவு அமைச்சர் மார்கோ ரூபியோ, கூட்டுப் படைத் தலைமைத் தளபதி ஜெனரல் டான் கெய்ன், சி.ஐ.ஏ இயக்குனர் ஜோன் ராட்க்ளிஃப் மற்றும் கூட்டுப் படைத் தளபதிகளின் தலைமை அதிகாரி சுசி வைல்ஸ் ஆகியோர் பங்கேற்ற கூட்டத்தில், தாக்குதலுக்கான திட்டங்களை ட்ரம்ப் கலந்துரையாடியதாக டைம்ஸ் செய்தி வெளியிட்டுள்ளது.

டைம்ஸ் செய்தியின்படி, ஒருவேளை இராஜதந்திர பேச்சுவார்த்தைகளோ அல்லது ஆரம்பகட்ட இலக்கு வைக்கப்பட்ட தாக்குதல்களோ ஈரானைப் பணிய வைக்கத் தவறினால், “அந்நாட்டுத் தலைவர்களை அதிகாரத்திலிருந்து விரட்டும் நோக்கில் வரவிருக்கும் மாதங்களில் இன்னும் பெரிய தாக்குதலை நடத்துவது குறித்து” ட்ரம்ப் தனது ஆலோசகர்களிடம் கூறியுள்ளார்.

ஈரானின் இஸ்லாமிய புரட்சிகர காவல்படையின் தலைமையகம், அணுசக்தி நிலையங்கள் மற்றும் ஏவுகணைத் திட்டங்கள் ஆகியவை இலக்குகளாகக் கருதப்படுகின்றன. வெனிசுவேலா நடவடிக்கைக்கு முன்னதாக ட்ரம்பிடம் “வெற்றிக்கு அதிக வாய்ப்பு உள்ளது” என்று கூறிய ஜெனரல் கெய்ன், ஈரான் விஷயத்தில் அத்தகைய உறுதியை அளிக்க முடியவில்லை. ஏனெனில் ஈரான் என்பது ஒரு கடினமான இலக்காகும்.

கடந்த வியாழக்கிழமை அன்று பொலிட்டிகோ வெளியிட்ட செய்தியின்படி, இந்தப் படைக்குவிப்பிற்கு ஏற்கனவே சுமார் 350 மில்லியன் டாலர் முதல் 370 மில்லியன் டாலர் வரை செலவாகியுள்ளதாகவும், இந்தச் செலவுகள் வேகமாக அதிகரித்து வருவதாகவும் தெரிவிக்கப்பட்டுள்ளது. உலகம் முழுவதும் நிலைநிறுத்தப்பட்டுள்ள சுமார் 68 போர்க் கப்பல்களில், குறிப்பிடத்தக்க அளவிலான 17 அமெரிக்க போர்க் கப்பல்கள் தற்போது இப்பகுதியில் இருப்பதாகவும் அது குறிப்பிட்டுள்ளது. போர்டு கப்பலில் உள்ள கடற்படை மாலுமிகள் எட்டு மாதங்களாகக் கடலில் இருப்பதாகவும், இதனால் அவர்களின் மன உறுதி குறைந்து வருவதோடு, அணி உறுப்பினர்கள் கடற்படையை விட்டு வெளியேறுவது குறித்து சிந்தித்து வருவதாகவும் வோல் ஸ்ட்ரீட் ஜேர்னல் செய்தி வெளியிட்டுள்ளது.

அமெரிக்காவிற்குள் நிலவும் ஆழமான அரசியல் நெருக்கடிக்கு மத்தியில் இந்த இராணுவ விரிவாக்கம் நடைபெறுகிறது. கடந்த வியாழக்கிழமை அன்று, லேர்னிங் ரிசோர்சஸ் நிறுவனம் (Learning Resources, Inc), ஜனாதிபதி ட்ரம்பின் வர்த்தகக் கொள்கைகளுக்கு எதிராகத் தொடுத்த வழக்கின் தீர்ப்பில், சர்வதேச அவசரகால பொருளாதார அதிகாரங்கள் சட்டம் (IEEPA) ஜனாதிபதியின் சுங்க வரிக் கொள்கைகளுக்கு அதிகாரம் அளிக்கவில்லை என்று உச்ச நீதிமன்றம் 6-3 என்ற கணக்கில் தீர்ப்பளித்தது. இதன் மூலம் ட்ரம்பின் வர்த்தகப் போரின் முக்கிய தூணை நீதிமன்றம் தகர்த்தது. இதற்குப் பதிலளித்த ட்ரம்ப், நீதிபதிகளை “எமது தேசத்தின் அவமானம்” என்று அழைத்ததோடு, மற்றொரு சட்டத்தின் கீழ் உடனடியாக புதிய சுங்க வரிகளை விதித்தார். இது கடந்த பல தசாப்தங்களில் ஜனாதிபதியின் அதிகாரத்திற்கு விடுக்கப்பட்ட மிக முக்கியமான நீதித்துறை கண்டனமாகும்.

பைனான்சியல் டைம்ஸின் எட்வர்ட் லூஸ் கருத்து தெரிவிக்கையில்: “அவரது கடந்தகால செயல்பாடுகளை வைத்துப் பார்த்தால், அவர் வேறு வழிகளில் தனது கோபத்தை வெளிப்படுத்தக்கூடும் என்று தோன்றுகிறது. தனது அதிகாரத்தைத் தன்னிச்சையாகப் பயன்படுத்தும் இயல்பைக் கொண்டிருப்பதால், உச்ச நீதிமன்றத்தின் இந்தத் தீர்ப்பு மற்ற துறைகளில் அவர் அளவுக்கு அதிகமாகச் செயல்பட வழிவகுக்கலாம். ஜனாதிபதியின் அதிகாரத்திற்கு நீதித்துறை எப்போதும் குறுக்கே நிற்காத ஒரே துறை அமெரிக்க இராணுவ நடவடிக்கை மட்டுமே ஆகும்.”

அமெரிக்காவைத் தாக்காத, 90 மில்லியன் மக்கள் தொகையைக் கொண்ட ஈரானுக்கு எதிரான ஒரு போர் என்பது ஒரு ஆக்கிரமிப்புப் போராகவே கருதப்படும். இது நூரம்பேர்க் விசாரணைகளில் வரையறுக்கப்பட்டபடி “உச்சக்கட்ட சர்வதேசக் குற்றம்” ஆகும்.

ஜனநாயகக் கட்சி வார இறுதியில் தனது மௌனத்தைத் தொடர்ந்தது. போர்டு கப்பல் மத்திய தரைக்கடலை நோக்கிச் சென்றபோதும், ட்ரம்ப் நிர்வாகம் “தனிநபர்களை இலக்கு வைப்பது” மற்றும் “ஆட்சி மாற்றம்” குறித்த திட்டங்களை எடைபோட்டபோதும், எந்தவொரு முன்னணி ஜனநாயகக் கட்சியினரும் இந்தத் தாக்குதலை எதிர்த்து எந்த அறிக்கையும் வெளியிடவில்லை.

வேர்ஜீனியாவின் ஜனநாயகக் கட்சி செனட்டர் மார்க் வார்னர், “ஜனாதிபதி அனைத்து தெரிவுகளையும் மேசையில் வைத்திருப்பது (அதாவது, இராணுவ நடவடிக்கை உட்பட அனைத்து வாய்ப்புகளையும் தயாராக வைத்திருப்பது) பொருத்தமானது” என்று கூறி இந்த இராணுவ அச்சுறுத்தலுக்கு ஆதரவளித்தார். அதேபோல், நியூஜெர்சியின் ஜனநாயகக் கட்சிப் பிரதிநிதி ஜோஷ் கோத்தெய்மர், காங்கிரஸின் அனுமதியின்றி ஈரானுக்கு எதிராக இராணுவத்தைப் பயன்படுத்துவதைத் தடை செய்யும் வகையில் பிரதிநிதிகள் தோமஸ் மாசி மற்றும் ரோ கன்னா கொண்டு வந்த இருகட்சித் தீர்மானத்தை வெளிப்படையாக எதிர்த்தார். அத்துடன், “அமெரிக்கர்களையும் எமது கூட்டாளிகளையும் பாதுகாப்பதற்கான எமது திறனைக் காங்கிரஸ் கட்டுப்படுத்தக் கூடாது” என்றும் அவர் அறிவித்தார்.

பென்சில்வேனியாவின் ஜனநாயகக் கட்சி செனட்டர் ஜோன் பெட்டர்மேன், ஈரானை குண்டுவீசித் தாக்குவதற்குத் தனது ஆதரவை உறுதிப்படுத்தும் வகையில் நியூஸ்மேக்ஸ் ஊடகத்திற்குப் பேட்டியளித்தார். கடந்த ஆண்டு நடத்தப்பட்ட வான்வழித் தாக்குதல்கள் குறித்துக் குறிப்பிடுகையில், “நான் அதை முழுமையாக ஆதரித்தேன், அந்த நடுநிசி சம்மட்டி (Midnight Hammer) தாக்குதல் நடவடிக்கைக்காக நான் ஆரவாரம் செய்தேன்” என்று அவர் கூறினார்.

ஈரானுக்கு எதிரான அமெரிக்காவின் அச்சுறுத்தல்கள் குறித்து பிரதிநிதிகள் சபையின் சிறுபான்மைத் தலைவர் ஹக்கீம் ஜெப்ரீஸ், செனட் சிறுபான்மைத் தலைவர் சக் ஷுமர், பெர்னி சாண்டர்ஸ் அல்லது பிரதிநிதி அலெக்ஸாண்ட்ரியா ஒகாசியோ-கோர்டெஸ் என எவருமே இந்த வார இறுதியில் எந்தவொரு அறிக்கையும் வெளியிடவில்லை. தற்போது இந்தத் தாக்குதலுக்காகத் திரட்டப்பட்டு வரும் ஒவ்வொரு ஆயுதத்திற்கும் ஜனநாயகக் கட்சியினரே நிதி வழங்கியுள்ளனர்.

கடந்த டிசம்பரில் 901 பில்லியன் டாலர் தேசிய பாதுகாப்பு அங்கீகாரச் சட்டம் சபையில் நிறைவேற்றப்பட்டது. இதில் 115 ஜனநாயகக் கட்சியினர் ஆதரவாக வாக்களித்தனர். ஜனவரியில், 149 ஜனநாயகக் கட்சியினர் 839 பில்லியன் டாலர் பாதுகாப்பு ஒதுக்கீட்டிற்கு வாக்களித்தனர்.

ஈரானுக்கு எதிரான இந்தப் போர் உந்துதலானது, அமெரிக்க ஏகாதிபத்தியத்தின் உலகளாவிய வெடிப்பின் சமீபத்திய வெளிப்பாடாகும். வெனிசுவேலா ஜனாதிபதியைக் கடத்திச் சென்று, அங்கு ஒரு பொம்மை ஆட்சியை நிறுவியும், கிரீன்லாந்து மற்றும் பனாமாக் கால்வாயைக் கைப்பற்றப் போவதாக அச்சுறுத்தியும் வந்துள்ள ட்ரம்ப் நிர்வாகம், இப்போது 90 மில்லியன் மக்கள் வாழும் ஒரு நாட்டின் மீது ஆக்கிரமிப்புப் போரைத் தொடுக்கத் தயாராகி வருகிறது. ஈரானில் ஆட்சி மாற்றத்தைத் திணிக்கவும், மத்திய கிழக்கின் வளங்கள் மற்றும் மூலோபாய ரீதியிலான கடல்வழிப் போக்குவரத்துப் பாதைகளைத் தனது கட்டுப்பாட்டுக்குள் கொண்டு வரவும் அது இப்போரை முன்னெடுக்கிறது.

இந்தத் தயாரிப்புகளில் ஜனநாயகக் கட்சியின் உடந்தையானது, இரு கட்சிகளுமே ஒரே ஆளும் வர்க்கத்தின் நலன்களையே பிரதிநிதித்துவப்படுத்துகின்றன என்பதையும், அரசியல் ஸ்தாபனத்தின் எந்தவொரு பிரிவும் அதிகரித்து வரும் உலகப் போரை எதிர்க்கவில்லை என்பதையும் மீண்டும் ஒருமுறை அம்பலப்படுத்துகிறது.