மொழிபெயர்ப்பின் மூலக் கட்டுரையை இங்கே காணலாம்.

31வது கடற்படை அதிரடிப்படையைச் சுமந்து செல்லும் நீர்நிலம் இரண்டிலும் தாக்குதல் நடத்தக்கூடிய ஹெலிகாப்டர் தாங்கி கப்பலான USS திரிப்போலி, பாரசீக வளைகுடாவை நோக்கிய பயணத்தில் மலாக்கா நீரிணையைக் கடப்பதை செவ்வாயன்று அவதானிக்க முடிந்தது. இந்த போர்க்கப்பல் மார்ச் 11 அன்று ஒகினாவாவிலிருந்து புறப்பட்டதுடன், மார்ச் மாத இறுதியில் மத்திய கிழக்கை வந்தடையும் என்று எதிர்பார்க்கப்படுகிறது. ஈரானியப் பகுதி மீது அமெரிக்கா தரைவழி ஆக்கிரமிப்பை மேற்கொள்ள வேண்டும் என்று அமெரிக்க ஊடகங்கள் மற்றும் அரசியல் ஸ்தாபனத்திற்குள் கோரிக்கைகள் அதிகரித்து வரும் சூழலில் இந்த நிலைநிறுத்தல் மேற்கொள்ளப்படுகிறது.

ஏற்கனவே மத்திய கிழக்கில் சுமார் 50,000 அமெரிக்க இராணுவத்தினர் உள்ளனர், அவர்களுக்கு ஆதரவாக இரண்டு விமானம் தாங்கி போர்க்கப்பல் குழுக்கள் உள்ளன—அரபிக்கடலில் USS ஆபிரகாம் லிங்கன் மற்றும் செங்கடலில் USS ஜெரால்ட் R. ஃபோர்டு—மூன்றாவது கப்பலான USS ஜார்ஜ் H.W. புஷ் மத்தியதரைக் கடலை நோக்கிச் சென்று கொண்டிருக்கிறது. போர்க்களத்திற்குள் நுழையும் முதல் தரைவழிப் போர் திறன் கொண்ட பிரிவாக திரிப்போலி மற்றும் அதன் கடற்படைப் படைகள் இருக்கும்.

பிப்ரவரி 28 அன்று போர் தொடங்கிய ஆரம்ப மணிநேரங்களில் ஈரானின் உச்ச தலைவர் அலி கமேனி கொல்லப்பட்டதில் இருந்து, அந்நாட்டின் நடைமுறை ரீதியான தலைவராகவும், ஈரானின் உச்ச தேசிய பாதுகாப்பு கவுன்சிலின் செயலாளராகவும் இருந்த அலி லாரிஜானியை இஸ்ரேல் படுகொலை செய்தது உட்பட, போரின் வியத்தகு தீவிரமடைதலின் மத்தியில் இந்தப் படைநிலைநிறுத்தல் நடைபெறுகிறது.

டெக்சாஸின் குடியரசுக் கட்சிப் பிரதிநிதி பீட் செஷன்ஸ் செவ்வாயன்று CNN தொலைக்காட்சியில் தோன்றி, ஈரானின் கச்சா எண்ணெய் ஏற்றுமதியில் 90 சதவீதத்தைக் கையாளும் முக்கிய முனையமான கார்க் தீவை (Kharg Island) கடற்படை ஆக்கிரமிக்க வேண்டும் என்று பகிரங்கமாக வாதிட்டார்; அதேவேளை, இது “நேரடி தரைப்படைத் தலையீடு” ஆகாது என்று அவர் அபத்தமான முறையில் மறுத்தார்.

செஷன்ஸ் கூறினார்: “இந்த 2,500 கடற்படையினர், அதாவது கடற்படை அதிரடிப்படையினர் அநேகமாக அந்தத் தீவைப் பாதுகாப்பதற்காக அங்கு இருப்பார்கள். என் கருத்துப்படி, இந்தத் தீவு போர்க்களச் சூழலில் தரைப்படைகளை நிறுத்துவது எனக் கருதப்படாது; இது ஒரு வசதியைப் பாதுகாக்கும் விஷயமாகவே இருக்கும்.” ஈரானின் மையப்பகுதிக்குள் நடக்கும் போரிலிருந்து ஒரு தீவைக் கைப்பற்றுவதை அவர் வேறுபடுத்திக் காட்டினார். அதாவது, “ஈரானுக்குள்ளே இருக்கும் நகரங்களுக்குள் நுழையும்போது, கடந்த காலத்தில் நாம் எதிர்கொண்டது போன்ற பெரும் மக்கள் தொகை கொண்ட பகுதிகள், நமக்கு எதிரான போராளிகள் என அது ஒரு குழப்பமான சூழலாக இருக்கும்” என்று அவர் குறிப்பிட்டார்.

செஷன்ஸின் கருத்துக்கள், குடியரசுக் கட்சி செனட்டர் லிண்ட்சே கிரஹாமை விடவும் வெளிப்படையாக இருந்தன. கிரஹாம் வெள்ளிக்கிழமை எக்ஸ் தளத்தில், “கார்க் தீவைக் கட்டுப்படுத்துபவர், இந்தப் போரின் விதியைக் கட்டுப்படுத்துகிறார். செம்பர் ஃபை (Semper Fi)” என்று பதிவிட்டிருந்தார். இது அந்தத் தீவின் மீது ஒரு நீர்நில அதிரடித் தாக்குதலுக்கு அழைப்பு விடுக்கும் வெளிப்படையான சமிக்கையாகும். [குறிப்பு: ‘Semper fidelis’ என்பது “எப்போதும் விசுவாசமாக” அல்லது “எப்போதும் உண்மையாக” என்று பொருள்படும் ஒரு லத்தீன் சொல்லாகும். இது அமெரிக்கக் கடற்படையின் அதிகாரப்பூர்வ முழக்கமாகும், இது பொதுவாக ‘செம்பர் ஃபை’ (Semper Fi) எனச் சுருக்கமாக அழைக்கப்படுகிறது.]

ட்ரம்ப் போரை முன்கூட்டியே முடிப்பதற்குப் பதிலாக, அதை மேலும் தீவிரப்படுத்த வேண்டும் என்று வாதிட்ட, “ஹார்முஸ் நீரிணைக்கான போர்” என்ற தலைப்பிலான வால் ஸ்ட்ரீட் ஜர்னல் பத்திரிகையின் ஞாயிற்றுக்கிழமை தலையங்கத்தைத் தொடர்ந்து செஷன்ஸின் இந்தக் கருத்துக்கள் வெளிவந்துள்ளன. அந்த நீரிணையை மூடுவதில் ஈரான் வெற்றி பெற்றால், அது “ எரிசக்தி ஓட்டங்களின் மீது ஈரானிய வீட்டோ அதிகாரத்தையும், எதிர்காலத்தில் தண்டனையிலிருந்து தப்பிக்கவும்” வழிவகுக்கும் என்று அந்தத் தலையங்கம் எச்சரித்தது. அது இவ்வாறு முடித்தது: “இரண்டு அல்லது மூன்று மடங்கு ஏவுகணைகள் அல்லது அணு ஆயுதங்களைச் சேகரிக்க அனுமதிக்கப்பட்டால், அந்த ஆட்சி உலகை எப்படி மிரட்டிப் பணியவைக்கும்— மற்றும் அதிலிருந்து தப்பித்துக்கொள்ளும்—என்று கற்பனை செய்து பாருங்கள்.”

கார்க் தீவைக் கைப்பற்றுவது மற்றும் ஹார்முஸ் நீரிணையை ஒட்டிய பகுதிகளில் தரைவழித் தாக்குதலை நடத்துவது குறித்து ட்ரம்ப் நிர்வாகம் தீவிரமாகப் பரிசீலித்து வருவதாக நியூயார்க் டைம்ஸ் மற்றும் வோல் ஸ்ட்ரீட் ஜர்னல் ஆகிய இரண்டு பத்திரிகைகளும் சமீபத்திய நாட்களில் செய்தி வெளியிட்டுள்ளன. திங்களன்று, அமெரிக்க ஜனாதிபதி டொனால்ட் ட்ரம்ப் செய்தியாளர்களிடம் பேசுகையில், ஈரானுக்குள் துருப்புக்களை அனுப்பத் தான் “பயப்படவில்லை” என்று கூறியதுடன், வியட்நாம் போருடனான ஒப்பீடுகளை நிராகரித்தார். “நான் உண்மையிலேயே எதற்கும் பயப்படவில்லை,” என்று ட்ரம்ப் கூறினார்.

ஈரானியத் தலைவர்களைப் படுகொலை செய்வதன் மூலம் அந்த அரசாங்கத்தைக் கவிழ்க்க முற்பட்ட நிர்வாகத்தின் முயற்சிகள் தோல்வியடைந்ததையே, ஒரு தரைவழி ஆக்கிரமிப்பை நோக்கிய இந்த வளர்ந்து வரும் வேகம் பிரதிபலிக்கிறது. “போரை எப்படி அல்லது எப்பொழுது முடிப்பது என்பதை அதிபர் இனி கட்டுப்படுத்த முடியாது” என்று ட்ரம்பின் சொந்தக் கூட்டாளிகளே இப்போது நம்புவதாகப் பொலிடிகோ (Politico) செவ்வாயன்று தெரிவித்தது. வெள்ளை மாளிகைக்கு நெருக்கமான ஒருவர் பொலிடிகோவிடம் கூறுகையில்: “நாங்கள் களத்தில் அவர்களைத் [ஈரானை] நிச்சயமாகத் தோற்கடித்துள்ளோம், ஆனால், பெருமளவிற்கு இப்போது அவர்களே சாதகமான நிலையில் உள்ளனர். நாம் எவ்வளவு காலம் இதில் ஈடுபட வேண்டும் என்பதையும், நாம் தரைப்படையை இறக்க வேண்டுமா என்பதையும் அவர்களே தீர்மானிக்கிறார்கள். நாம் கௌரவத்தைக் காப்பாற்றிக்கொள்ள விரும்பினால், அதைத் தவிர வேறு வழி இருப்பதாக எனக்குத் தெரியவில்லை” என்றார்.

“நிபந்தனைகள் மாறிவிட்டன. ஈரான் இந்த சமச்சீரற்ற நடவடிக்கையை முன்னெடுத்துச் செல்வதால், வெளியேறும் வழிகள் இனி செயல்படாது” என்று மற்றொரு ஆதாரம் பொலிடிகோவிடம் தெரிவித்தது.

இரண்டு வாரங்களுக்கும் மேலாக நீடித்த குண்டுவீச்சுகள்—7,000-க்கும் மேற்பட்ட இலக்குகள் தாக்கப்பட்டன, 100-க்கும் மேற்பட்ட கடற்படைக் கப்பல்கள் அழிக்கப்பட்டன, உச்ச தலைவர் மற்றும் டஜன் கணக்கான மூத்த அதிகாரிகள் கொல்லப்பட்டனர்—இவை அனைத்திற்கும் மத்தியிலும், உலகின் சுமார் 20 சதவீத எண்ணெய் கடந்து செல்லும் ஹார்முஸ் நீரிணை , நடைமுறையில் மூடப்பட்டே உள்ளது.

அந்த நீரிணை வழியாக நடைபெறும் கப்பல் போக்குவரத்து ஒரு நாளைக்குச் சுமார் ஐந்து கப்பல்களாகக் குறைந்து முடங்கியுள்ளது—இது போருக்கு முன்பு அங்குக் கடந்த 125 கப்பல்களில் ஒரு சிறு பகுதியே ஆகும். அதே நேரத்தில், நான்கில் ஒரு பங்கு எண்ணெய் டாங்கர்கள் உட்படச் சுமார் 1,100 கப்பல்கள் எங்கும் செல்ல முடியாமல் வளைகுடாப் பகுதியில் சிக்கித் தவிக்கின்றன. பிப்ரவரி 28 முதல் கச்சா எண்ணெய் விலை 45 சதவீதம் உயர்ந்துள்ளது—அதாவது ஒரு பேரல் 70 டாலருக்கும் குறைவாக இருந்ததிலிருந்து சுமார் 100 டாலராக அதிகரித்துள்ளது. அமெரிக்க வாகன ஓட்டிகள் எரிபொருள் நிலையங்களில் ஒரு காலன் (3.785 லிட்டர்) எரிபொருளுக்கு 3.79 டாலர் செலுத்துகிறார்கள், இது 25 சதவீத அதிகரிப்பாகும்.

இந்தப் போர் நிர்வாகத்திற்கு ஒரு பரந்த அரசியல் நெருக்கடியாக ஆழமடைந்து வருகிறது. மார்ச் 6-8 தேதிகளில் நடத்தப்பட்ட Data for Progress கருத்துக்கணிப்பில், 52 சதவீத அமெரிக்கர்கள், எப்ஸ்டீன் ஊழலிலிருந்து கவனத்தைத் திசைதிருப்புவதற்காகவே ட்ரம்ப் ஈரானைத் தாக்கினார் என்று நம்புவது தெரியவந்துள்ளது. இதில் 81 சதவீத ஜனநாயகக் கட்சியினரும், 52 சதவீத சுயேச்சைகளும் அடங்குவர். Quinnipiac கருத்துக்கணிப்பின்படி, 74 சதவீதப் பதிவுசெய்யப்பட்ட வாக்காளர்கள் தரைப்படையை அனுப்ப எதிர்ப்பு தெரிவிக்கின்றனர். ட்ரம்பின் ஆதரவு விகிதம், அவரது பதவிக்காலத் தொடக்கத்தில் 50 சதவீதத்திற்கும் அதிகமாக இருந்த நிலையிலிருந்து, தற்போது சுமார் 40 சதவீதமாகக் குறைந்துள்ளது.

இதற்கிடையில், ‘ஆபரேஷன் எபிக் ஃபியூரி’ (Operation Epic Fury) தொடங்கியதிலிருந்து சுமார் 200 அமெரிக்க ராணுவ வீரர்கள் காயமடைந்துள்ளதாகவும், 13 பேர் கொல்லப்பட்டுள்ளதாகவும் அமெரிக்க மத்திய கட்டளையகம் (CENTCOM) தெரிவித்துள்ளது. குறைந்தது 10 பேர் கடுமையான காயங்களுக்கு உள்ளாகியுள்ளனர்; இதில் குண்டுச் சிதறல் காயங்கள், தீக்காயங்கள் மற்றும் வெடிப்பினால் ஏற்படும் மூளை அதிர்ச்சி ஆகியவை அடங்கும்.

லாரிஜானியின் படுகொலையானது, வரிசையாக நடத்தப்பட்டு வரும் தலைமையைத் துண்டிக்கும் தாக்குதல்களில் மிக சமீபத்திய ஒன்றாகும், ஆனால் இத்தாக்குதல்கள் போரை முடிவுக்குக் கொண்டுவர எதையும் செய்யவில்லை. லாரிஜானியும், பாசிஜ் (Basij) தளபதி குலாம்ரெசா சொலைமானியும் “ஒழிக்கப்பட்டுவிட்டனர்” என்றும், அவர்கள் “நரகத்தின் ஆழத்தில் காமேனியுடன் இணைந்துவிட்டனர்” என்றும் இஸ்ரேலிய பாதுகாப்பு அமைச்சர் இஸ்ரேல் காட்ஸ் அறிவித்தார். மேலும் அவர், “தலைமையைத் தொடர்ந்து வேட்டையாடுமாறு நான் இஸ்ரேலிய இராணுவத்திற்கு (IDF) உத்தரவிட்டுள்ளேன்’ என்றும் கூறினார்.

கொல்லப்பட்ட அலி காமேனியின் மகனும், ஈரானின் புதிய உச்ச தலைவருமான மொஜ்தபா காமேனி, இரண்டு மத்தியஸ்த நாடுகள் முன்வைத்த போர் பதற்றத்தைத் தணிக்கும் முன்மொழிவுகளை நிராகரித்துள்ளார். “அமெரிக்காவும் இஸ்ரேலும் மண்டியிடச் செய்யப்பட்டு, தோல்வியை ஏற்றுக்கொண்டு, இழப்பீடு செலுத்தும் வரை, இது அமைதிக்கான சரியான நேரம் அல்ல” என்று அவர் தெரிவித்துள்ளார்.

லெபனானில் போர் தொடர்ந்து விரிவடைந்து வருகிறது. மார்ச் 2 முதல் நடத்தப்பட்ட இஸ்ரேலிய குண்டுவீச்சில் 111 குழந்தைகள் உட்பட 912 பேர் கொல்லப்பட்டுள்ளனர். மேலும், ஒட்டுமொத்த மக்கள் தொகையில் சுமார் ஐந்தில் ஒரு பங்கினரான 10 லட்சத்திற்கும் அதிகமான மக்கள் தங்கள் வீடுகளை விட்டு வெளியேறும்படி செய்துள்ளது. 100-க்கும் மேற்பட்ட குடியிருப்புகள் வெளியேறுமாறு உத்தரவிடப்பட்டுள்ளன. குடியிருப்புப் பகுதிகள் மீதான குண்டுவீச்சு போர்க்குற்றங்களாகக் கருதப்படலாம் என்றும், மக்களைத் திட்டமிட்டுப் பெருமளவில் இடம்பெயரச் செய்வது சர்வதேச மனிதாபிமான சட்டத்தை மீறுவதாகும் என்றும் ஐநா மனித உரிமைகள் அலுவலகம் எச்சரித்துள்ளது.

ஈரானில், பிப்ரவரி 28 முதல் இதுவரை குறைந்தது 1,444 பேர் கொல்லப்பட்டுள்ளதாகவும், 18,000-க்கும் மேற்பட்டோர் காயமடைந்துள்ளதாகவும் அந்நாட்டுச் சுகாதார அமைச்சகம் தெரிவித்துள்ளது. மினாப் நகரில் உள்ள ஒரு பள்ளியின் மீது அமெரிக்கா நடத்திய தாக்குதலில் 170 பேர் கொல்லப்பட்டதைச் சர்வதேச மன்னிப்புச் சபை (Amnesty International) உறுதிப்படுத்தியுள்ளது. “கொல்லப்பட்டவர்களில் பெரும்பாலானோர் பள்ளி மாணவிகள்” என்று தெரிவித்துள்ள அந்த அமைப்பு, இதற்குக் காரணமானவர்கள் பொறுப்பேற்க வேண்டும் என்றும் கோரியுள்ளது. அராக் நகரில் நடத்தப்பட்ட தாக்குதலில், மூன்று நாட்களே ஆன ஒரு பச்சிளம் குழந்தையும், இரண்டு வயது குழந்தையும், அவர்களின் தாய் மற்றும் பாட்டியுடன் சேர்த்துப் படுகொலை செய்யப்பட்டுள்ளனர்.