இந்த மொழிபெயர்ப்பின் மூலக் கட்டுரையை இங்கு காணலாம்.

ஆகஸ்ட் 10 அன்று, தெற்கு உக்ரேனில் உள்ள பெர்வோமைஸ்க் நகர நீதிமன்றம், போருக்கு எதிராக ரஷ்ய மற்றும் உக்ரேனிய தொழிலாளர்களின் சர்வதேச ஐக்கியத்துக்கு அழைப்பு விடுத்ததற்காக, 27 வயதான சோசலிசவாதியும், போல்ஷிவிக்-லெனினிஸ்டுகளின் ட்ரொட்ஸ்கிச இளம் காவலர் அமைப்பின் (YGBL) தலைவருமான போக்டன் சிரோடியூக்கிற்கு, “பெரும் தேசத்துரோகம்” குற்றம் சாட்டி 15 ஆண்டுகள் சிறைத்தண்டனை விதித்தது.

சர்வதேச மனித உரிமைகள் சட்டத்தையும், ஐரோப்பிய மனித உரிமைகள் சாசனத்தையும் பகிரங்கமாக மீறுகின்ற ஒரு தீர்ப்பில், சிந்தனைக் குற்றத்திற்காக போக்டன் குற்றவாளியாக அறிவிக்கப்பட்டுள்ளார். போக்டன் உலக சோசலிச வலைத் தளத்தில் (WSWS) வெளியிட்ட போர் எதிர்ப்பு கட்டுரைகள் மற்றும் நாஜிக்களின் கூட்டாளிகளை உக்ரேனிய அரசாங்கம் மகிமைப்படுத்துவதற்கு தெரிவித்த எதிர்ப்பு ஆகியவையே இந்தக் குற்றச்சாட்டுக்கு அடிப்படையாக அமைந்தன.

இந்தத் தீர்ப்பில் மேற்கோள் காட்டப்பட்டுள்ள அறிக்கைகளே, அவர் உக்ரேன் மீதான ரஷ்ய படையெடுப்பை எதிர்த்தவர் என்பதையும், ரஷ்யா மற்றும் உக்ரேன் ஆகிய இரு நாடுகளிலும் உள்ள தொழிலாளர்களையும் இளைஞர்களையும் போரை எதிர்க்குமாறு அழைப்பு விடுத்தார் என்பதையும் தெளிவுபடுத்துகின்றன.

இந்த நீதிமன்றத் தீர்ப்பானது, அவருடைய “பாசிஸ்டுகள் மற்றும் நாஜிகளுடனான ஒப்பீடுகளையும்”, மற்றும் “தேசிய நாயகர்கள் மற்றும் வரலாற்றுப் பிரமுகர்கள் பற்றிய அவருடைய மறுவிளக்கத்தையும்” மேற்கோள் காட்டுகிறது —குறிப்பாக, யூத இனப்படுகொலையில் பங்கேற்ற நாஜிக்களின் கூட்டாளியான ஸ்டீபன் பண்டேராவை அவர் கண்டித்ததை ஆதாரமாகக் வெளிப்படையாகச் குறிப்பிடுகிறது.

போக்டான் மீதான கொடூரமான நடவடிக்கைகளும், இந்த வழக்கு விசாரணையின் போலித்தனமான தன்மையும், அமெரிக்கா மற்றும் ஐரோப்பாவின் அரசாங்கங்கள் மற்றும் ஊடகங்களில் ஆதிக்கம் செலுத்தி வரும் அதிகாரப்பூர்வக் கதையாடலைத் தகர்க்கின்றன. அதாவது, உக்ரேன் என்பது தூண்டப்படாத ஒரு படையெடுப்பிற்கு எதிராக சுதந்திரத்தைப் பாதுகாக்கப் போராடும் ஒரு நெருக்கடியிலுள்ள ஜனநாயகம் என்ற கதையாடலாகும். போக்டன் மீதான இந்த வழக்குத் தொடரல் உக்ரேனின் உண்மையான நிலவரத்திற்கு சிறந்த உதாரணமாகும்.

உக்ரேனிய அரசு இடதுசாரி அரசியலை சட்டவிரோதமாக்கியுள்ளதுடன், அனைத்து சுயாதீனமான அரசியல் மற்றும் தொழிற்சங்க நடவடிக்கைகளையும் ஒடுக்கியுள்ளது. மார்ச் 2022 இல், உக்ரேனிய ஜனாதிபதி வோலோடிமிர் ஜெலென்ஸ்கியின் அரசாங்கம் 11 எதிர்க்கட்சிகளை இடைநிறுத்தியதுடன், நாட்டின் முக்கிய தேசிய தொலைக்காட்சி அலைவரிசைகளின் செய்திகளை ஒரே அரசு ஒளிபரப்பு நிறுவனமாக ஒன்றிணைத்தது. மேலும், அந்த ஆண்டு ஜூன் மாதம், நாடாளுமன்றத்தில் இருந்த மிகப்பெரிய எதிர்க்கட்சியை நீதிமன்றங்கள் தடைசெய்தன. இராணுவச் சட்டத்தின் கீழ் வேலைநிறுத்தங்களுக்குத் தடை விதிக்கப்பட்டுள்ளது. மேலும், போர்க்கால தொழிலாளர் சட்டங்கள் கூட்டு ஒப்பந்தங்களை இடைநீக்கம் செய்து, பெரும்பான்மையான தொழிலாளர்களின் அடிப்படைப் பாதுகாப்புகளை அவை பறித்துள்ளன. மே 20, 2024 அன்று, செலென்ஸ்கியின் சொந்தப் பதவிக் காலம் முடிவடைந்ததிலிருந்து தேர்தல்கள் இடைநிறுத்தப்பட்டுள்ளன. அவர் அரசாணை மூலமே ஆட்சி செய்து வருகிறார்.

இவை அனைத்தும் அமெரிக்க மற்றும் ஐரோப்பிய ஊடகங்களில் திட்டமிட்டு மறைக்கப்படுகின்றன. போரை ஊக்குவிக்கும் நோக்கில், ஒரு பாசிச அரசாங்கம் ஜனநாயகத்தின் உன்னத எடுத்துக்காட்டாக புனைந்து காட்டப்படுகிறது. எதிர்பார்த்தபடியே, போக்டன் சிரோடியுக்கின் தண்டனைத் தீர்ப்பு ஒரு முதலாளித்துவப் பத்திரிகையிலும் வெளியிடப்படவில்லை.

இருப்பினும், போக்டனுக்கு தண்டனை வழங்கப்பட்ட அதே நாளில், போருக்கு தீவிரமாக ஆதரவளிக்கும் முன்னணி பத்திரிகைகளில் ஒன்றான நியூ யோர்க் டைம்ஸ், ரஷ்யாவில் போரெதிர்ப்பு எதிர்க்கட்சிகள் ஒடுக்கப்படுவது குறித்து ஒரு விரிவான அறிக்கையை வெளியிட்டது. ஒரு தேசியவாதக் கட்சியான ரோடினா (Rodina) தொடர்ந்த வழக்கின் —இது பெயரளவில் பதிப்புரிமை மீறல் தொடர்பானது—அடிப்படையில், வழக்கு தாக்கல் செய்யப்பட்ட அடுத்த வேலைநாளிலேயே ரஷ்யாவின் உச்ச நீதிமன்றம் ஒரு விசாரணையை நடத்தி, செப்டம்பர் மாத நாடாளுமன்றத் தேர்தலுக்கான வேட்பாளர் பட்டியலிலிருந்து தாராளவாத-முதலாளித்துவக் கட்சியான யாப்லோகோவை (Yabloko) நீக்கியது. “ரஷ்ய நீதிமன்றம் நாட்டின் ஒரே போரெதிர்ப்புக் கட்சி நாடாளுமன்றத் தேர்தலில் போட்டியிடுவதைத் தடை செய்கிறது” என்ற தலைப்பில் அந்த அறிக்கை வெளியானது.

இந்தத் தீர்ப்பு, “உக்ரேனில் போரைத் தொடர்வதில் தனக்குள்ள உறுதியை கேள்விக்குள்ளாக்கும் எந்தவொரு அரசியல் சக்தியையும் கிரெம்ளின் சகித்துக்கொள்ளாது என்பதற்கான மிகச் சமீபத்திய அறிகுறியாக” அமைந்திருப்பதாக தி டைம்ஸ் குறிப்பிட்டது. மேலும், கீயேவ் நகருக்கு வெளியே ரஷ்யா இழைத்த அட்டூழியங்கள் குறித்து 2022-ல் சமூக ஊடகத்தில் பதிவிட்டதற்காக யாப்லோகோ கட்சியின் துணைத் தலைவர் மாக்சிம் க்ருக்லோவ் என்பவருக்கு ஜூன் மாதத்தில் ஏழு ஆண்டுகள் சிறைத்தண்டனை விதிக்கப்பட்டதையும், இந்தப் படையெடுப்பைக் கண்டிக்கும் கருத்துகளைத் தெரிவித்த நூற்றுக்கணக்கான ரஷ்யர்கள் “போர் தொடர்பான தணிக்கை சட்டங்களின் கீழ் குற்றவியல் வழக்குகளில் சிறையில் அடைக்கப்பட்டுள்ளனர்” என்பதையும் அது சுட்டிக்காட்டியது.

ரஷ்ய அரசாங்கம், சந்தேகத்திற்கு இடமின்றி, ஒரு எதேச்சதிகார அரசாங்கமாகும். மேலும், யப்லோகோவைத் தடை செய்வது ஜனநாயக உரிமைகள் மீதான தாக்குதலாகும். ஆனால், ரஷ்யாவில் டைம்ஸ் கண்டிக்கும் அடக்குமுறை, உக்ரேனில் நடக்கும் அடக்குமுறையுடன் சிறிதும் ஒப்பிட முடியாதது. ஆனால், டைம்ஸ் உக்ரேனைப் பற்றி மௌனம் காக்கிறது. ரஷ்யாவில், ஒரு தாராளவாதக் கட்சி வாக்குச்சீட்டிலிருந்து நீக்கப்பட்டுள்ளது. ஆனால், உக்ரேனிலோ, ஒவ்வொரு இடதுசாரிக் கட்சியும் முற்றிலுமாகத் தடை செய்யப்பட்டுள்ளது—மேலும் அங்கு வாக்குச்சீட்டே இல்லை, ஏனெனில் தேர்தல்களே ஒழிக்கப்பட்டுவிட்டன.

இந்தக் கட்டுரைக்கும், போக்டனின் வழக்கு குறித்து ஊடகங்கள் காட்டும் மௌனத்திற்கும் பதிலளிக்கும் விதமாக, உலக சோசலிச வலைத் தளத்தின் சர்வதேச ஆசிரியர் குழுவின் தலைவரான டேவிட் நோர்த், கடந்த செவ்வாயன்று டைம்ஸ் பத்திரிகையின் சர்வதேச ஆசிரியர் பிலிப் பானுக்கு கடிதம் ஒன்றை எழுதி அனுப்பினார். அதில் இந்த வழக்கைச் செய்தியாக வெளியிடுமாறு அந்த ஊடகத்தை பின்வருமாறு வலியுறுத்தினார்:

திருமதி. வாசிலியேவாவின் கட்டுரை, ஒரு தேர்தலில் இருந்து யப்லோகோ கட்சி விலக்கப்பட்டதை, போருக்கு எதிரான எதிர்க்கட்சியை ரஷ்ய அரசாங்கம் ஒடுக்குவதற்கான ஒரு முக்கிய சான்றாகக் கருதுகிறது. மேலும், ரஷ்யாவின் போர்க்குற்றங்களை விமர்சித்து 2022-ல் சமூக ஊடகத்தில் பதிவிட்ட ஒரு பதிவிற்காக, யப்லோகோவின் துணைத் தலைவர் மாக்சிம் க்ருக்லோவிற்கு கடந்த ஜூன் மாதம் ஏழு ஆண்டுகள் சிறைத்தண்டனை விதிக்கப்பட்டதாகவும் அது செய்தி வெளியிட்டுள்ளது.

இருப்பினும், நான் இதை எழுதும் நேரம் வரையில், போரை எதிர்க்கும் ஒரு உக்ரேனிய சோசலிசவாதிக்கு இப்போது 15 ஆண்டுகள் சிறைத்தண்டனை விதிக்கப்பட்டுள்ளதாக டைம்ஸ் பத்திரிகையில் எந்தச் செய்தியையும் காணவில்லை—இது க்ருக்லோவிற்கு விதிக்கப்பட்ட தண்டனையை விட இரண்டு மடங்குக்கும் அதிகமாகும்.

போருக்கு எதிரான போக்டனின் சோசலிச எதிர்ப்பை விளாடிமிர் புட்டினுக்கான ஆதரவாக முன்வைப்பதற்கு எந்த நம்பகமான அடிப்படையும் இருக்க முடியாது. உலக சோசலிச வலைத் தளமும், நான்காம் அகிலத்தின் அனைத்துலகக் குழுவும், ரஷ்யப் படையெடுப்பு தொடங்கிய உடனேயே அதைக் கண்டித்தன. பிப்ரவரி 24, 2022 அன்று, “உக்ரேன் மீதான ரஷ்யாவின் படையெடுப்பை சோசலிஸ்டுகளும், வர்க்க நனவுள்ள தொழிலாளர்களும் எதிர்க்க வேண்டும்” என்று நாங்கள் வெளிப்படையாக அறிவித்தோம்.

... டைம்ஸ் பத்திரிகையிடம் நான் எழுப்பும் கேள்வி, போர் பற்றிய எமது அரசியல் பகுப்பாய்வை ஏற்றுக்கொள்வதைச் சார்ந்தது அல்ல. இது, ஜனநாயக உரிமைகள் மற்றும் அரசியல் கருத்துச் சுதந்திரம் ஆகிய கோட்பாடுகளைத் தொடர்ந்து ஒரே சீராகப் பயன்படுத்துவது தொடர்பானது. … ரஷ்யாவில் போருக்கு எதிரான அரசியல் செயல்பாடுகள் ஒடுக்கப்படுவது விரிவான செய்தியாக்கத்திற்குத் தகுதியானது என்றால் — நிச்சயமாக அது தகுதியானதுதான் — போருக்கு எதிரான கட்டுரைகளை வெளியிடுவது உள்ளிட்ட செயல்பாடுகளுக்காக ஒரு உக்ரேனிய சோசலிசவாதிக்கு 15 ஆண்டுகள் சிறைத்தண்டனை விதிக்கப்பட்ட விவகாரமும் அதே அளவு தீவிரமான கவனத்திற்கும் பரிசீலனைக்கும் தகுதியானதே ஆகும்.

“போக்டன் சிரோடியுக் மீதான வழக்குத் தொடுப்பு மற்றும் தண்டனை குறித்து விசாரணை நடத்தி, அவரது வழக்கின் உண்மைகளைத் தனது வாசகர்களுக்குத் தெரிவிக்குமாறு டைம்ஸ் பத்திரிகையை நான் கேட்டுக் கொள்கிறேன்” என்று நோர்த் முடிவுரையாகக் கூறினார்.

இதை எழுதும் நேரம் வரை இதற்கு டைம்ஸ் எந்தப் பதிலும் அளிக்கவில்லை. மேலும், போக்டனின் வழக்கு குறித்த எந்த அறிக்கையும் வெளிவரவும் இல்லை.

இந்த மௌனத்தில் டைம்ஸ் மட்டும் தனியாக இல்லை. வோல் ஸ்ட்ரீட் ஜேர்னல், வாஷிங்டன் போஸ்ட், தி கார்டியன், லூ மொன்ட், டெர் ஸ்பீகல், சுய்ட் டொய்ச் செய்துங், பிராங்பேர்டர் ஆல்ஜெமைன் செய்துங், பி.பி.சி, சி.என்.என், ராய்ட்டர்ஸ், அசோசியேட்டட் பிரஸ் மற்றும் ஏஜென்ஸ் பிரான்ஸ் பிரஸ் ஆகியவற்றில் தேடினால், இந்தத் தீர்ப்பு, விசாரணை அல்லது போக்டனின் கைது குறித்த எந்தவொரு செய்தியும் கிடைக்கவில்லை. எந்தவொரு முக்கிய மேற்கத்திய செய்தி நிறுவனம்கூட இந்த வழக்கைப் பற்றி செய்தி வெளியிடவில்லை.

நான்கு ஆண்டுகளுக்கும் மேலான இந்தப் போர் முழுவதிலும், அமெரிக்க மற்றும் ஐரோப்பிய ஊடகங்கள் உக்ரேனில் நடக்கும் அரசியல் அடக்குமுறைகள் பற்றிய தகவல்களைத் தொடர்ச்சியாக இருட்டடிப்பு செய்து வந்துள்ளன. இந்த மௌனத்திற்கு ஒரு குறிப்பிட்ட நோக்கம் உள்ளது. போருக்கான பொதுமக்களின் ஆதரவு எந்த அடிப்படைப் பொய்யின் மீது கட்டியெழுப்பப்பட்டதோ, அந்த அடிப்படைப் பொய்யை இது பாதுகாக்கிறது: அதாவது, இது ஜனநாயக உரிமைகளைப் பாதுகாப்பதற்காக நடத்தப்படும் ஒரு ஜனநாயகத்திற்கான போர் என்ற பிம்பத்தை இது காக்கிறது.

போக்டன் சிரோடியுக்கின் வழக்கு இதற்கு நேர்மாறானதை நிரூபிக்கிறது. இதனால்தான் அது இருட்டடிப்பு செய்யப்பட்டு வருகிறது—மேலும் இந்த இருட்டடிப்பு தோற்கடிக்கப்பட வேண்டும் என்பதற்கான காரணமும் இதுவேயாகும். மௌனத்தின் சுவர் உடைத்தெறியப்பட வேண்டும். மேலும் அனைத்துத் தொழிலாளர்களும், இளைஞர்களும், கலைஞர்களும், அறிஞர்களும் இந்த வழக்கு நடவடிக்கைக்கு எதிராக உறுதியான நிலைப்பாட்டை எடுக்க வேண்டும்.

போக்டனுக்கு எதிரான தீர்ப்பு இன்னும் சட்டபூர்வமாகச் அமலுக்கு வரவில்லை. அவரது தரப்பு வழக்கறிஞர்கள் மேல்முறையீடு செய்வார்கள்; உக்ரேனிய சட்டத்தின் கீழ் மேல்முறையீடு 30 நாட்களுக்குள் தாக்கல் செய்யப்பட வேண்டும். ஐரோப்பிய மனித உரிமைகள் நீதிமன்றம் ஏற்கனவே 2025-ஆம் ஆண்டின் வசந்த காலத்தில் அவரது வழக்கை விசாரணைக்கு ஏற்றுக்கொண்டது.

போக்டனின் விடுதலைக்கான போராட்டம் அதன் தீர்க்கமான கட்டத்தை எட்டியுள்ளது—இதில் வெற்றிபெற முடியும். மேல்முறையீடு தயாராகிக்கொண்டிருக்கும் இந்த வேளையிலேயே, அவரது விடுதலைக்கான சர்வதேச பிரச்சாரத்தை விரிவுபடுத்துமாறு தொழிலாளர்கள், இளைஞர்கள், பத்திரிகையாளர்கள், விஞ்ஞானிகள், கலைஞர்கள் மற்றும் ஜனநாயக உரிமைகளைப் பாதுகாப்போர் அனைவருக்கும் நாங்கள் அழைப்பு விடுக்கிறோம்.

இந்த அறிக்கையையும், இதற்கு முந்தைய அறிக்கையான “பாசிச உக்ரேனிய நீதிமன்றம், போரை எதிர்க்கும் சோசலிசவாதியான போக்டன் சிரோட்டியுக்கிற்கு 15 ஆண்டுகள் சிறைத்தண்டனை விதித்துள்ளது” என்பதையும்—உங்கள் சக ஊழியர்கள், வகுப்புத் தோழர்கள், நண்பர்கள் மற்றும் சமூக ஊடகங்கள் வாயிலாக—முடிந்தவரை பரவலாகப் பகிருங்கள்.

இந்த தீர்ப்பை ரத்து செய்யவும், போக்டனை உடனடியாக விடுதலை செய்யவும் வலியுறுத்தும் அறிக்கைகளை பெர்வோமைஸ்க் நகர மாவட்ட நீதிமன்றத்திற்கு inbox@pm.mk.court.gov.ua என்ற மின்னஞ்சல் முகவரிக்கு அனுப்புங்கள். அதேவேளையில், அவற்றின் நகல்களை உலக சோசலிச வலைத் தளத்தின் freebogdan@wsws.org என்ற முகவரிக்கும் அனுப்புங்கள்.