மொழிபெயர்ப்பின் மூலக் கட்டுரையை இங்கே காணலாம்

உக்ரேன் நெருக்கடியில் வேண்டுமென்றே போர் ஆபத்தை தூண்டிவிட்டதற்காக சீன வெளியுறவு அமைச்சகம் நேற்று வாஷிங்டனை கண்டித்தது. ரஷ்ய ஜனாதிபதி புட்டின் இரண்டு கிழக்கு உக்ரேனிய பகுதிகளை 'சுதந்திரம்' என்று அங்கீகரித்து, ரஷ்ய துருப்புக்களை இந்த பகுதிகளுக்கு அனுப்பிய ஆணையில் கையெழுத்திட்ட பின்னர், மாஸ்கோ மீது அமெரிக்க ஜனாதிபதி பைடென் மேலும் தடைகளை விதித்ததை அது விமர்சித்தது.

ஒரு செய்தியாளர் கூட்டத்தில், வெளியுறவு அமைச்சகத்தின் செய்தித் தொடர்பாளர் ஹுவா சுன்யிங், அமெரிக்கா 'பதட்டங்களை எழுப்புகிறது, பீதியை உருவாக்குகிறது, மேலும் போர்க் கால அட்டவணையில் கூட விளையாடுகிறது... யாரோ ஒருவர் மற்றவர்களைக் குற்றம் சாட்டும்போது நெருப்பில் எரிபொருளைச் சேர்த்தால்... அந்த நடத்தை பொறுப்பற்றது மற்றும் தார்மீக நெறியற்றது.”

ரஷ்யா மீது சீனா பொருளாதாரத் தடைகளை விதிக்குமா என்று கேட்டதற்கு, 'தடைகள் ஒருபோதும் பிரச்சினைகளைத் தீர்ப்பதற்கான அடிப்படை மற்றும் பயனுள்ள வழியாக இருந்ததில்லை' என்று சீன அரசாங்கம் நம்புவதாக ஹுவா கூறினார். ரஷ்யா மீது மட்டுமல்ல, சீனா உட்பட பிற நாடுகளின் மீதும் அமெரிக்கா ஒருதலைப்பட்ச தடைகளை விதிப்பதை சீன அரசாங்கம் 'சட்டவிரோதமானது' எனக் கருதுகிறது என்று அவர் மீண்டும் வலியுறுத்தினார்.

'2011 முதல், அமெரிக்கா ரஷ்யா மீது 100 முறைக்கு மேல் பொருளாதாரத் தடைகளை விதித்துள்ளது, ஆனால் நாம் அனைவரும் அமைதியாக இதைப் பற்றி சிந்திக்கலாம்,' என்று ஹுவா கூறினார்: 'அமெரிக்கத் தடைகள் சிக்கலைத் தீர்த்துவிட்டதா?' பிராந்திய அமைதி மற்றும் ஸ்திரத்தன்மையைப் பேணுவதற்கான பேச்சுவார்த்தைகளுக்கான சீனாவின் வேண்டுகோளை அவர் மீண்டும் மீண்டும் வலியுறுத்தினார்.

எவ்வாறாயினும், அமெரிக்காவிற்கு 'பிரச்சினையைத் தீர்க்க' எந்த எண்ணமும் இல்லை. உக்ரேனில் பதட்டங்களை அதிகரிப்பதற்கும் ரஷ்யாவுடன் போரைத் தூண்டுவதற்கும் அது உறுதியாக உள்ளது. பேச்சுவார்த்தை மற்றும் அமைதியான தீர்வுக்கான பெய்ஜிங்கின் வேண்டுகோள்கள் செவிடன் காதிலேயே விழும்.

உக்ரேன் நெருக்கடி மற்றும் ரஷ்யாவுடனான உறவுகளைக் கையாள்வதில், 'சீனா மற்றும் பிற கட்சிகளின் நியாயமான உரிமைகள் மற்றும் நலன்களை அமெரிக்கா குறைமதிப்பிற்கு உட்படுத்தக்கூடாது' என்று ஹுவா கடுமையாக எச்சரித்தார். சீன நிறுவனங்கள் மீதான எந்தவொரு கூறப்படும் மீறல்களுக்கு எதிராக நடவடிக்கை எடுப்பதற்கான சாக்குப்போக்காக, ரஷ்யாவிற்கு எதிரான ஒருதலைப்பட்ச தடைகளை அமெரிக்கா பயன்படுத்திக் கொள்ளும் என்பதில் பெய்ஜிங் தெளிவாக அக்கறை கொண்டுள்ளது.

அதே நேரத்தில், டொனெட்ஸ்க் மற்றும் லுஹான்ஸ்க் பிராந்தியங்களின் 'சுதந்திரத்தை' அங்கீகரிப்பதில் புட்டினின் நடவடிக்கைகளை சீனா கண்டிக்கவில்லை என்றாலும், இந்த நடவடிக்கைக்கு அல்லது ரஷ்யா இந்த பகுதிகளுக்கு துருப்புக்களை அனுப்புவதற்கு அது எந்த அரசியல் ஆதரவையும் கொடுக்கவில்லை.

சீன ஜனாதிபதி ஜி ஜின்பிங், கிழக்கு ஐரோப்பாவிற்குள் நேட்டோவின் அத்துமீறல் பற்றிய ரஷ்யாவின் கவலைகளை நியாயமானது என்று ஆதரித்தார், ஆனால் பெய்ஜிங் தேசிய எல்லைகளை மறுவடிவமைப்பதன் மூலம் அமைக்கப்பட்டுள்ள சர்வதேச முன்மாதிரியால் ஆழ்ந்த கவலையில் உள்ளது. 2014 இல் தேர்ந்தெடுக்கப்பட்ட ரஷ்ய சார்பு உக்ரேனிய ஜனாதிபதி விக்டர் யானுகோவிச்சை வெளியேற்றிய, வெளிப்படையாக பாசிச சக்திகளை உள்ளடக்கிய, அமெரிக்க ஆதரவு பெற்ற ஆட்சி கவிழ்ப்பைத் தொடர்ந்து, கிரிமியாவை ரஷ்யா இணைத்ததை அது முறையாக அங்கீகரிக்கவில்லை.

உக்ரேனிய பாதுகாப்புக் கவலைகளும் கணக்கில் எடுத்துக்கொள்ளப்பட வேண்டும் என்று சுட்டிக்காட்டிய ஹுவா, 'ஒருவருக்கொருவர் நியாயமான பாதுகாப்புக் கவலைகளுக்கு மதிப்பளித்து முக்கியத்துவம் அளிக்கவும், பேச்சுவார்த்தை மற்றும் ஆலோசனை மூலம் பிரச்சினைகளைத் தீர்க்கவும், பிராந்திய அமைதி மற்றும் ஸ்திரத்தன்மையைப் கூட்டாக பேணவும்” அனைத்துத் தரப்பினருக்கும் சீனா அழைப்பு விடுத்துள்ளது.

பெய்ஜிங்கின் கவலைகள், சீனாவை சீர்குலைத்து உடைப்பதற்கான வழிமுறையாக, பிரிவினைவாத இயக்கங்களுக்கு, குறிப்பாக ஹாங்காங், வீகர் மற்றும் திபெத்திய சிறுபான்மையினரிடையே அதன் ஆதரவை நியாயப்படுத்த, அமெரிக்கா இந்த முன்னுதாரணங்களைப் பயன்படுத்திக் கொள்ளலாம் என்ற நியாயமான அச்சத்தில் இருந்து உருவாகிறது. சீனாவின் மேற்குப் பகுதியான சின்ஜியாங்கில் வீகர்களின் 'இனப்படுகொலையில்' சீன அரசாங்கம் ஈடுபட்டுள்ளது என்ற பொய்யை அமெரிக்க பிரச்சார இயந்திரம் முடிவில்லாமல் மறுசுழற்சி செய்கிறது.

மேலும், 'ஒரே சீனா' கொள்கையின் கீழ் சீனாவின் ஒரு பகுதியாக பெயரளவில் அங்கீகரிக்கும் தைவான் மீது அமெரிக்கா வேண்டுமென்றே பதட்டங்களைத் தூண்டி வருகிறது. உக்ரேன் மீதான ரஷ்ய படையெடுப்பு பற்றிய அதன் குற்றச்சாட்டுகளின் திட்டவட்டமான எதிரொலியாக, எந்த ஆதாரமும் இல்லாமல், இராணுவ பலத்தைப் பயன்படுத்தி தைவானைக் கட்டுப்படுத்த சீனா தயாராகி வருவதாக அமெரிக்க ஊடகங்கள் திரும்பத் திரும்பக் கூறி வருகின்றன. உண்மையில், நான்கு தசாப்தங்களுக்கும் மேலாக முதல் முறையாக தைவானுக்கு அமெரிக்க துருப்புக்களை அனுப்பியது உட்பட, தைவானுடனான உறவுகளை வலுப்படுத்துவதன் மூலம் தைவானின் நிலை குறித்த நீண்டகால நெறிமுறைகளை அமெரிக்கா தான் குறைமதிப்பிற்கு உட்படுத்தியுள்ளது.

செவ்வாயன்று சீன வெளியுறவு மந்திரி வாங் யீ மற்றும் அமெரிக்க வெளியுறவுத்துறை செயலர் ஆண்டனி பிளிங்கென் இடையே நடந்த தொலைபேசி அழைப்பைத் தொடர்ந்து சீன வெளியுறவு அமைச்சக அறிக்கைகள் நேற்று வெளியிடப்பட்டுள்ளன. வாங் 'உக்ரேனில் உருவாகி வரும் நிலைமை' பற்றி தான் கவலைப்படுவதாகவும் மற்றும் 'ரஷ்ய ஆக்கிரமிப்பு' பற்றிய பிளிங்கெனின் குற்றச்சாட்டுகளை ஆதரிக்கவில்லை என்றும் வாங் கூறினார்.

உக்ரேனில் ஏற்பட்ட நெருக்கடிக்கு வாங், 'மின்ஸ்க் ஒப்பந்தத்தை அமல்படுத்துவதில் தாமதம்' என்று குற்றம் சாட்டினார். இந்த போர்நிறுத்த ஒப்பந்தம், 2014 மற்றும் 2015ல் கிழக்கு உக்ரேனில் உள்ள ரஷ்ய-சார்பு பிரிவினைவாத போராளிகளுக்கும் ஆயுதமேந்திய பாசிச குழுக்களுடன் வேலை செய்து கொண்டிருந்த உக்ரேனிய இராணுவத்திற்கும் இடையேயான சண்டையை முடிவுக்கு கொண்டுவருவதற்காக பிரான்ஸ் மற்றும் ஜேர்மனியால் வடிவமைக்கப்பட்டது, அமெரிக்காவால் அல்ல.

மின்ஸ்க் உடன்பாடு அமெரிக்கா மற்றும் தீவிர வலதுசாரி உக்ரேனியக் கட்சிகள் மற்றும் குழுக்களின் நிகழ்ச்சி நிரலை துண்டித்தது, அவை கிரிமியாவின் கட்டுப்பாட்டை மீண்டும் பெறுவது உட்பட சண்டையைத் தொடரவும் தீவிரப்படுத்தவும் முயன்றன. அனைத்து வெளிநாட்டு போராளிகளையும் அகற்றுவது மற்றும் கனரக ஆயுதங்களை திரும்பப் பெறுதல் உட்பட, கிழக்கு உக்ரேனில் கிளர்ச்சியாளர்களின் கட்டுப்பாட்டில் உள்ள பகுதிகளுக்கு அதிக சுயாட்சி வழங்க ஒப்பந்தம் அழைப்பு விடுத்தது, அதே நேரத்தில் பிரிவினைவாதிகள், உக்ரேனுக்கும் ரஷ்யாவிற்கும் இடையிலான எல்லையின் கட்டுப்பாட்டை கியேவ் ஆட்சிக்கு திரும்ப ஒப்படைக்க கோரியது. இந்த ஏற்பாடுகள் ஒருபோதும் ஸ்தாபிக்கப்படவில்லை.

பெய்ஜிங்கில் பிப்ரவரி 4 அன்று குளிர்கால ஒலிம்பிக்கின் தொடக்கத்தில், ரஷ்ய மற்றும் சீன ஜனாதிபதிகள் உக்ரேனில் உருவாகும் நெருக்கடி பற்றி ஆழமாக விவாதித்தனர். ஒரு நீண்ட கூட்டு அறிக்கை, இரு நாடுகளுக்கும் 'வரம்புகள் இல்லாத' நட்பு உள்ளது எனக் கூறியது. அமெரிக்கா மற்றும் அதன் நட்பு நாடுகளின் பெயரைக் குறிப்பிடாமல், அந்த அறிக்கை ரஷ்யாவும் சீனாவும், 'அவற்றின் பொதுவான அருகிலுள்ள பிராந்தியங்களில் பாதுகாப்பு மற்றும் ஸ்திரத்தன்மையைக் குறைமதிப்பிற்கு உட்படுத்தும் வெளிப்புற சக்திகளின் முயற்சிகளுக்கு எதிராக நிற்கின்றன' மற்றும் 'எந்த சாக்குப்போக்கின் கீழும் இறையாண்மை கொண்ட நாடுகளின் உள் விவகாரங்களில் வெளிச் சக்திகளின் தலையீட்டை எதிர்க்கின்றன' என தெரிவித்தது.

புட்டினும் ஜியும் டொனெட்ஸ்க் மற்றும் லுஹான்ஸ்க் மற்றும் கிரிமியாவின் பிரிவினைவாதப் பகுதிகள் பற்றிய அவர்களின் சற்றே மாறுபட்ட நிலைப்பாடுகள் குறித்தும் கலந்துரையாடினர். இதன் விளைவாக, டொனெட்ஸ்க் மற்றும் லுஹான்ஸ்க்கை சுதந்திரமாக அங்கீகரிக்கும் தனது அறிவிப்புக்கு சீன ஆதரவு இல்லாதையிட்டு புட்டின் ஆச்சரியப்பட்டிருக்கமாட்டார். எவ்வாறாயினும், அமெரிக்கா மற்றும் அதன் கூட்டாளிகள் ரஷ்யா மீது சுமத்தியுள்ள தடைகளை எதிர்த்துப் போராட சீனாவிடம் பொருளாதார மற்றும் நிதி உதவியை அவர் கோருவார்.

உச்சிமாநாடு ரஷ்யா சீனாவிற்கு வருடத்திற்கு 10 பில்லியன் கன மீட்டர் எரிவாயுவை வழங்குவதற்கான ஒரு பெரிய ஒப்பந்தத்தை உறுதி செய்தது - ஐரோப்பாவில் அதன் சந்தைகள் இப்போது அமெரிக்க பொருளாதாரத் தடைகளால் பாதிக்கப்பட்டுள்ள சூழ்நிலையில் மாஸ்கோவிற்கு இது ஒரு முக்கியமான உயிர்நாடியாகும். 2014 உக்ரேனிய நெருக்கடியைத் தொடர்ந்து ரஷ்யாவிற்கும் சீனாவிற்கும் இடையிலான வர்த்தகம் ஏற்கனவே அதிகரித்துள்ள நிலையில், புட்டினும் ஜியும் ஆண்டுக்கு 250 பில்லியன் டாலர்களாக உயர்த்த ஒப்புக்கொண்டனர்.

இந்த வாரம் ரஷ்யா மீது சுமத்தப்பட்ட தடைகள் 'முதல் தவணை' என்று பிடென் அறிவித்தார், எனவே அமெரிக்க பொருளாதாரத் தடைகளை 'மீறிய' சீனாவுடன் மோதலின் சாத்தியம் மட்டுமே அதிகரிக்கமுடியும். பெய்ஜிங்கிற்கு எதிரான தண்டனை நடவடிக்கைகள் எடுப்பதற்கு சாக்குப்போக்குகளை கண்டுபிடிப்பதில் வாஷிங்டனுக்கு எந்த கவலையும் இருக்காது. அது மாஸ்கோவை விட அதன் உலகளாவிய மேலாதிக்கத்திற்கு பெய்ஜிங்கை அச்சுறுத்தலாகக் கருதுகிறது. இது ஐரோப்பாவில் ஒரு போர், விரைவில் இந்தோ-பசிபிக் வரை பரவி, உலகளாவிய பேரழிவை உருவாக்கும் அபாயத்தை அடிக்கோடிட்டுக் காட்டுகிறது.