மொழிபெயர்ப்பின் மூலக் கட்டுரையை இங்கே காணலாம்

சூடான் முழுவதிலும் உள்ள நகரங்களில் ஆயிரக்கணக்கான தொழிலாளர்களும் மாணவர்களும் வீதிகளில் இறங்கி உணவு மற்றும் எரிபொருள் விலைகளின் கட்டுக்கடங்காத அதிகரிப்புக்கு எதிரான ஆர்ப்பாட்டத்தில் ஈடுபட்டனர். உணவுப் பொருட்களின் விலைகள் ஒரு வருடத்திற்கு முன்பு இருந்ததை விட 100 முதல் 200 சதவீதம் அதிகரித்துள்ளது மற்றும் பணவீக்கம் 250 சதவீதமாக உள்ளது.

கடந்த வாரம் தலைநகர் கார்ட்டூமில், போராட்டக்காரர்கள் ஜனாதிபதி மாளிகைக்கு 200 மீட்டர் வரை அண்மித்து வந்தபோது கண்ணீர் புகை குண்டுகள் மற்றும் வெடிகுண்டு வீச்சுக்களை எதிர்கொண்டனர்.

இராணுவ ஆட்சிக்குழு அதன் நிலையான நாணயக் கொள்கையை முடிவுக்குக் கொண்டுவந்த நிலையில், கடந்த மாதம் சூடான் பவுண்டின் மதிப்பு கடுமையாக சரிந்ததைத் தொடர்ந்து, அட்பாராவில் (Atbara) ஆசிரியர்கள் மற்றும் இரயில்வே தொழிலாளர்கள் தங்களது மிகக்குறைந்த சம்பளம் தொடர்பாக நடத்தும் வேலைநிறுத்தங்களுடன் இவை இணைந்து நடைபெறுகின்றன.

ஐக்கிய நாடுகளின் உலக உணவுத் திட்டத்தின் (WFP) கூற்றுப்படி, கடந்த அக்டோபரில் பிரதம மந்திரி அப்தல்லா ஹம்துக்கை இராணுவம் வெளியேற்றியது (சர்வதேச நிதி நிறுவனங்களின் தூண்டுதலில் பிரதான வரவு-செலவுத் திட்ட உதவியில் பில்லியன் கணக்கான டாலர்களை இடைநிறுத்தியது), உக்ரைனில் நடக்கும் போர் மற்றும் ரஷ்யா மீது விதிக்கப்பட்ட தடைகள் ஆகியவற்றின் விளைவாக சூடானின் 44 மில்லியன் மக்களில் கிட்டத்தட்ட பாதிப் பேர் இந்த ஆண்டு பட்டினியை எதிர்கொள்வார்கள்.

சுமார் 20 மில்லியன் மக்கள் 'அவசரகாலநிலை' அல்லது 'நெருக்கடியான' நிலைகளில் 'கடுமையான உணவுப் பாதுகாப்பின்மை', 2021 இன் எண்ணிக்கையை விட இருமடங்காக இருக்கலாம் என்று உலக உணவு திட்டம் (WFP) கூறுகிறது. சர்வதேச அளவில் உயர்ந்து வரும் தானிய விலைகள், வெளிநாட்டு நாணயத் தட்டுப்பாடு மற்றும் நாட்டின் சில பகுதிகளில் வறட்சி, இராணுவ ஆட்சியை முடிவுக்குக் கொண்டு வரக் கோரி தீவிரமடைந்து வரும் போராட்ட இயக்கத்தை தூண்டியதன் காரணமாக நிலைமை குறிப்பிடத்தக்க வகையில் மோசமடைந்துள்ளது.

ஆபிரிக்காவில் உள்ள பல நாடுகளைப் போலவே, சூடானும் 2021 இல் அதன் கோதுமை இறக்குமதியில் சுமார் 35 சதவீதத்தை ரஷ்யா மற்றும் உக்ரேனிலிருந்து பெறுகிறது, இப்போது அதிக விலையைக் கோரும் மாற்று வழங்குனரை கண்டுபிடிக்க வேண்டும். கடந்த ஆண்டு ரஷ்யாவும் உக்ரேனும் உலகின் தானிய ஏற்றுமதியில் மூன்றில் ஒரு பங்கையும், அதன் சோள வணிகத்தில் ஐந்தில் ஒரு பங்கையும், சூரியகாந்தி எண்ணெய் உற்பத்தியில் கிட்டத்தட்ட 80 சதவீதத்தையும் கொண்டிருந்தன. அமெரிக்க வேளாண்மைத் துறையின் கூற்றுப்படி, உலக கோதுமை விநியோகம் இறுக்கப்படும், ரஷ்யா மற்றும் உக்ரேன் ஏற்றுமதிகள் போருக்கு முன்பு எதிர்பார்த்ததை விட 7 மில்லியன் டன்கள் குறைவாக இருக்கும்.

அமெரிக்கா/நேட்டோ தூண்டிய போரைத் தொடர்ந்து, ரஷ்யாவின் வங்கிகள், கப்பல் மற்றும் விமான நிறுவனங்கள் மீது வாஷிங்டன் மற்றும் ஐரோப்பிய சக்திகளால் விதிக்கப்பட்ட தடைகள், மற்றும் உள்நாட்டு மனிதாபிமான நெருக்கடியைத் தடுக்க தானியங்கள் மற்றும் பிற உணவுப் பொருட்களின் ஏற்றுமதிக்கு உக்ரேனின் தடை காரணமாக, ரஷ்யா மற்றும் உக்ரேனில் இருந்து ஏற்றுமதிகள் கிட்டத்தட்ட நிறுத்தப்பட்டுள்ளன. ரஷ்யா மற்றும் உக்ரேனின் தானிய ஏற்றுமதியில் பெரும்பாலானவை ஏற்றுமதி செய்யப்படும் வடக்கு கருங்கடல் துறைமுகங்களில் மிகவும் அழிவுகரமான சண்டைகள் நடைபெற்று வருவதோடு மேலும் அவை மூடப்பட்டுள்ளன, விமானத் தடைகள் ரஷ்ய வான்வெளியைச் சுற்றி சரக்கு விமானங்களைத் திருப்பி விடுகின்றன. இது தொற்றுநோய் தொடர்பான விநியோகச் சங்கிலிப் பிரச்சனைகளால் ஏற்கனவே உயர்ந்து வரும் உணவுப் பொருட்களின் விலைகளை அதிகப்படுத்தியுள்ளது மற்றும் வறுமையை ஆழப்படுத்தியுள்ளது.

வடக்கு கருங்கடல் பகுதியானது, உலகின் வர்த்தகம் செய்யப்படும் உணவு கலோரிகளில் குறைந்தது 12 சதவீதத்தை ஏற்றுமதி செய்கிறது, அதே சமயம் உக்ரேனின் ஏற்றுமதியில் 45 சதவீதம் —உலகின் மிக வளமான மண்ணில் மூன்றில் ஒரு பங்கை உக்ரேன் கொண்டுள்ளது— விவசாயம் தொடர்பானவை. உக்ரேனின் சில ஏற்றுமதிகள் கால்நடை தீவனத்திற்காக பயன்படுத்தப்படுவதால், ஏற்றுமதி தடை மற்றும் இடையூறுகள் கால்நடைகளையும் பாதிக்கும். சண்டையில் இருந்து வெளியேறும் விவசாயிகள் மற்றும் உள்கட்டமைப்பு மற்றும் உபகரணங்கள் போரினால் அழிவு ஆகியவை ஏப்ரல் நடுகை பருவத்தை அச்சுறுத்துகிறது.

சர்வதேச நாணய நிதியத்தின் (IMF) கூற்றுப்படி, தொற்றுநோய் பரவியதால், ஏப்ரல் 2020 மற்றும் டிசம்பர் 2021 க்கு இடையில் கோதுமையின் விலை 80 சதவீதம் அதிகரித்து, 1970 களில் இருந்து உணவுப் பொருட்களின் விலையை அவற்றின் அதிகபட்ச நிலைக்கு உயர்த்தியுள்ளது. 2022ல் இதுவரை கோதுமை விலை 37 சதவீதமும், சோளம் 21 சதவீதமும் உயர்ந்துள்ளது. கோதுமை சந்தை குறியீட்டு விலை ஆறு மாதங்களுக்கு முன்பு இருந்ததை விட 80 சதவீதம் அதிகமாக உள்ளது, மேலும் சோளம் 58 சதவீதம் அதிகரித்துள்ளது.

ஆபிரிக்காவின் 54 நாடுகளில் இருபத்தி மூன்று நாடுகள் அவர்களின் பிரதான பொருட்களில் ஒன்றின் பாதிக்கு மேற்பட்ட இறக்குமதிகளுக்கு ரஷ்யா மற்றும் உக்ரேனை நம்பியுள்ளன. சில நாடுகள் இன்னும் அதிகமாக நம்பியுள்ளன: சூடான், எகிப்து, தான்சானியா, எரித்திரியா மற்றும் பெனின் ஆகியவை தங்கள் கோதுமையில் 80 சதவீதத்தையும் அல்ஜீரியா, சூடான் மற்றும் துனிசியா ஆகியவை 95 சதவீதத்திற்கும் அதிகமான சூரியகாந்தி எண்ணெயை ரஷ்யா மற்றும் உக்ரேனிலிருந்து இறக்குமதி செய்கின்றன. பெரும்பாலான ஆபிரிக்க உயரடுக்குகள் சமூகப் பாதுகாப்பு வலையமைப்பை கொண்டிராத நிலைமைகளின் கீழ் அவர்களும் கூடுதலான விலைகளைக் காண்கிறார்கள், பசி அதிகரிக்கிறது.

நைஜீரியா, கென்யா, கானா, ருவாண்டா மற்றும் எகிப்து ஆகிய நாடுகளில், குறிப்பாக அவர்களின் பெரும்பாலான உணவை இறக்குமதி செய்யும் நாடுகளில் மற்றும் COVID-19 இன் பொருளாதார விளைவுகள் கடுமையாக பாதிக்கப்படும் நாடுகளில் வாழ்க்கைச் செலவு உயரும். இது ஆபிரிக்காவில் பட்டினியை எதிர்கொள்ளும் மக்களின் எண்ணிக்கையை இரட்டிப்பாக்க வாய்ப்புள்ளது, ஆபிரிக்காவின் 1.2 பில்லியன் மக்களில் 500 மில்லியனுக்கும் அதிகமான மக்களை தாக்கும் என எதிர்பார்க்கப்படுகிறது.

குறிப்பாக ஆபத்துகள் எகிப்தில் கடுமையானவை, உலகின் மிகப்பெரிய கோதுமை வாங்குநரும் மற்றும் ரஷ்யா, உக்ரேனில் இருந்து கோதுமையின் மிகப்பெரிய இறக்குமதியாளருமாகும், அதன் மொத்த இறக்குமதியில் 80 சதவிகிதத்தை கொண்டுள்ளது. எகிப்தின் 104 மில்லியன் மக்களில் சுமார் 30 மில்லியன் மக்கள் ஒரு நாளைக்கு 1.50 டாலருக்கும் குறைவான பணத்தில் வாழ்கின்றனர். 70 மில்லியனுக்கும் அதிகமானோர் தங்கள் ரொட்டி மற்றும் தாவர எண்ணெய்க்காக அரசு மானியம் பெறும் இறக்குமதியைச் சார்ந்துள்ளனர்.

ஏற்கனவே உலகின் மிகப்பெரிய மனிதாபிமான நெருக்கடியை எதிர்கொண்டுள்ள யேமன் போன்ற நாடுகளின் விலையில் கூர்மையான அதிகரிப்பு மற்றும் தாக்கத்தை ஏற்படுத்தும் கோதுமை, மாவு மற்றும் பிற அடிப்படை உணவு ஏற்றுமதியை அரசாங்கம் தடை செய்துள்ளது. கடந்த ஆண்டு, ஜனாதிபதி அப்தெல் ஃபத்தே எல்-சிசி, மானிய விலை ரொட்டி விலையை உயர்த்துவதாக அறிவித்தார். எகிப்தின் ரொட்டி மானியங்கள் ஏற்கனவே ஆண்டுக்கு 3.2 பில்லியன் டாலர்கள் செலவாகும் நிலையில், நிதி அமைச்சகம் 2021-22ல் கூடுதலாக 763 மில்லியன் டாலர் தேவை என்று மதிப்பிட்டுள்ளது.

கடந்த ஜூலை மாதம், சூரியகாந்தி மற்றும் சோயாபீன் எண்ணெய்க்கான மானியத்தை அரசாங்கம் 20 சதவீதமும், கலப்படமற்ற தாவர எண்ணெயை 23.5 சதவீதமும் ஆக குறைத்தது. இந்த வாரம், பிரதம மந்திரி முஸ்தாபா மாட்பொலி, உக்ரேனில் நடந்த போரைத் தொடர்ந்து டாலருக்கு எதிராக எகிப்திய நாணயம் 14 சதவிகிதம் வீழ்ச்சியடைந்ததால், 25 சதவிகிதம் அதிகரித்து, 11.5 எகிப்திய பவுண்டுகளுக்கு மானியம் இல்லாத ரொட்டியின் விலையை நிர்ணயித்தார்.

கோதுமை இறக்குமதியில் 40 சதவீதத்திற்கும் மேலாக உக்ரேனை நம்பியிருக்கும் லிபியாயில் கோதுமை மற்றும் மாவின் விலை 30 சதவீதம் வரை உயர்ந்துள்ளது. உலக உணவு திட்டம் (WFP) இன் படி, ரஷ்யா உக்ரேன் மீது படையெடுப்பதற்கு முன்பே, 12 சதவீத லிபியர்களுக்கு, 511,000 பேருக்கு 2022ல் உணவு உதவி தேவைப்படும். லிபியாவில் 635,051 புலம்பெயர்ந்தோர், புகலிடக் கோரிக்கையாளர்கள் மற்றும் அகதிகள் உள்ளனர், அவர்களில் கால் பகுதியினர் ஒரு குறிப்பிட்ட அளவுக்கு அல்லது கடுமையாக உணவு பாதுகாப்பற்றவர்களாக கருதப்படுகிறார்கள். ஒரு நடுத்தர வருமானம் பெற்ற நாட்டிற்கு எதிராக நடத்தப்பட்ட 2011 நேட்டோ போர் பேரழிவிற்கு, இந்த பயங்கரமான புள்ளிவிவரங்கள் சாட்சியமளிக்கின்றன.

2011 இல் சுதந்திரம் பெற்றதில் இருந்து உள்நாட்டுப் போர் மற்றும் நாட்டின் எண்ணெய் வளங்களைக் கட்டுப்படுத்துவதில் போட்டிக் குழுக்களுக்கு இடையேயான மோதல்களால் பிளவுபட்ட தெற்கு சூடான், நாட்டின் 12 மில்லியன் மக்களில் 8.9 மில்லியன் மக்களுடன் பட்டினியை எதிர்கொள்கிறது, மே 2021 முதல் வெள்ளத்தால் பாதிக்கப்பட்ட 680,000 பேர் உட்பட வரவிருக்கும் வறட்சி காலத்தில் பசியை எதிர்கொள்வார்கள் என்று எதிர்பார்க்கப்படுகிறது.

எத்தியோப்பியாவில், வடக்கில் திக்ரே மாகாணத்திலும் அதைச் சுற்றியுள்ள பகுதிகளிலும் நடந்த சண்டையால் 2 மில்லியனுக்கும் அதிகமான மக்கள் இடம்பெயர்ந்துள்ளனர். மீதமுள்ள நான்கு மில்லியன் திக்ரேயர்களில் பெரும்பாலானவர்கள் போதிய உணவு இல்லாமல், உணவைக் குறைத்து, பயிர்களை விற்று கடன்களைச் செலுத்தி அல்லது பிச்சை எடுத்து வாழ்கின்றனர். 454,000 ஊட்டச்சத்து குறைபாடுள்ள குழந்தைகளில், நான்கில் ஒரு பகுதிக்கு மேற்பட்டவர்கள் கடுமையான நிலையில் உள்ளனர், மேலும் 120,000 ஊட்டச்சத்து குறைபாடுள்ள கர்ப்பிணி அல்லது பாலூட்டும் பெண்கள் உள்ளனர். டிசம்பர் நடுப்பகுதியில் இருந்து டிக்ரேயில் அவசரகால உணவுப் பொருட்களைப் பெற ஐ.நா.வால் இயலாமையால் நிலைமை மேலும் மோசமாகிவிட்டது.

WFP இன் கூற்றுப்படி, உலகளவில் 44 மில்லியன் மக்கள் பஞ்சத்தின் விளிம்பில் உள்ளனர், மேலும் 232 மில்லியன் மக்கள் ஒரு படி மட்டுமே பின்னால் உள்ளனர். மனிதாபிமான நெருக்கடிகளின்போது வினியோகிக்கப்படும் கோதுமையில் பாதியை உக்ரேனிலிருந்து பெறுவதால் WFP மோசமாக பாதிக்கப்பட்டுள்ளது. ஆப்கானிஸ்தான், சிரியா, ஏமன், எத்தியோப்பியா மற்றும் சூடான் போன்ற அமெரிக்கா தலைமையிலான அல்லது தூண்டப்பட்ட போர்கள் மற்றும் மோதல்களால் பிளவுபட்ட நாடுகளின் தேவை பெருமளவில் அதிகரித்துள்ள நிலையில், முன்னேறிய நாடுகளில் இருந்து வளங்கள் உக்ரேனுக்குத் திருப்பிவிடப்படுவதால் அதன் நிதி வீழ்ச்சியடைந்தாலும் கூட, அது அதிக விலையில் மற்ற வழங்குநர்களை நோக்கி திரும்ப வேண்டியுள்ளது.

2011 இல் அரபு வசந்தத்தை தூண்டிய வாழ்க்கைச் செலவு அதிகரிப்பு, விரிவடைந்து வரும் பசி, சமூக உறுதியற்ற தன்மை, இடம்பெயர்வு அரசியல் அமைதியின்மையைத் தூண்டும் என்பதை உலகத் தலைவர்களும் ஆய்வாளர்களும் அறிவர். கடந்த ஆண்டு மேற்கு ஆபிரிக்காவில் ஐந்து ஆட்சிக் கவிழ்ப்புகள் இடம்பெற்றன. கண்டத்தின் 1.2 பில்லியன் மக்களில் 22 சதவீதம் பேர் மட்டுமே COVID-19 க்கு எதிராக தடுப்பூசி போடப்பட்டுள்ளனர், அதே நேரத்தில் முன்னேறிய நாடுகளால் வாக்குறுதியளிக்கப்பட்ட தொற்றுநோயைச் சமாளிக்க 100 பில்லியன் டாலர் உதவி இன்னமும் வழங்கப்படவில்லை. ஏறக்குறைய 20 நாடுகள் பெரும் கடனில் உள்ளதோடு, சர்வதேச கடன்களைத் திருப்பிச் செலுத்த முடியாத நிலையிலும் உள்ளன.