மொழிபெயர்ப்பின் மூலக் கட்டுரையை இங்கே காணலாம்.

வியாழனன்று, இஸ்ரேலிய துருப்புக்கள் உணவு உதவி பெறுவதற்காக காத்திருந்த பொதுமக்கள் மீதான மற்றொரு படுகொலையை மேற்கொண்டதில் 60 பேர் கொல்லப்பட்டனர் மற்றும் 160 பேர் காயமடைந்தனர் என்று யூரோ-மெட் மானிட்டர் தெரிவித்துள்ளது.

காஸா நகரின் புறநகரில் உள்ள குவைத் சுற்றுவட்டப் பாதையில் இந்த துப்பாக்கிச் சூடு நடந்துள்ளது. உதவி கோரிய மக்கள் டாங்கிகள், ஹெலிகாப்டர்கள் மற்றும் ஆளில்லா விமானங்களால் குறிவைக்கப்பட்டனர்.

சமூக ஊடகங்களில் பரவி வரும் காட்சிகள், டசின் கணக்கான உடல்கள் நெருக்கமாக கிடப்பதையும், இரத்தத்தில் தோய்ந்திருப்பதையும் காட்டின.

பெப்ருவரி 29க்கு பின்னர் நடந்த மிகப் பெரிய படுகொலை இதுவாகும். அப்போது இஸ்ரேலியப் படைகள் அதே இடத்தில் உதவி பெற முயன்ற மக்கள் மீது துப்பாக்கிச் சூடு நடத்தியதில் 112 பேர் கொல்லப்பட்டனர் மற்றும் 700க்கும் மேற்பட்டோர் காயமடைந்தனர்.

சமீபத்திய படுகொலை குறித்து கருத்துரைக்கையில், யூரோ-மெட் மானிட்டர் எழுதியது, “இஸ்ரேலிய அரசாங்கத்தால் உருவாக்கப்பட்ட பஞ்ச நிலைமைகளுக்கு இடையே, இஸ்ரேலிய இராணுவம் முற்றுகையிடப்பட்ட பகுதியில் வேண்டுமென்றே படுகொலைகளை தொடர்ந்து செய்து வருகிறது. மனிதாபிமான உதவிகளைப் பெற முயற்சிக்கும் பொதுமக்களை இஸ்ரேல் இலக்கு வைப்பது இப்போது தொடர்ந்து ஐந்தாவது நாளாக தொடர்கிறது, “மாவு படுகொலைகளில்” மொத்த இறப்புகளின் எண்ணிக்கை 500 க்கும் அதிகமாக உள்ளது.”

படுகொலையில் இருந்து தப்பியவர்கள் எவ்வாறு பட்டினியால் வாடும் தங்கள் குடும்பங்களுக்கு உணவு சேகரிக்க முயன்றபோது இஸ்ரேலியப் படைகள் திடீரென துப்பாக்கிச் சூடு நடத்தின என்று விவரித்தனர். உயிர் தப்பியவர்களில் ஒருவரான இப்ராஹிம் அல்-நஜ்ஜார் கூறுகையில், யூரோ-மெட் மானிட்டர் தகவல்படி, “அவர் குவைத் ரவுண்டானாவில் தனது குழந்தைகளுக்கு ஒரு பை நிறைய மாவு வாங்க முயன்றார், ஆனால் அவரும் மற்றவர்களும் இஸ்ரேலிய இராணுவத்தால் முன்னர் பாதுகாப்பானது என்று அறிவிக்கப்பட்ட ஒரு பகுதியில் கூடியிருந்த போது நேரடி துப்பாக்கிச் சூடு மற்றும் பீரங்கி குண்டுவீச்சுக்கு ஆளானார்கள்” என்று கூறினார்.

ஒரு அறிக்கையில், காஸாவின் சுகாதார அமைச்சகம் இந்த தாக்குதலை “மற்றொரு திட்டமிடப்பட்ட படுகொலை” என்று அழைத்தது.

வியாழனன்று நடந்த பாரிய படுகொலை, அதே இடத்தில் உதவிக்காக காத்திருந்த ஆறு பாலஸ்தீனியர்களை இஸ்ரேலிய துருப்புக்கள் கொன்ற மறுநாள் நடந்துள்ளது.

புதனன்றும் இஸ்ரேலியப் படைகள் ரபாவில் உள்ள ஐ.நா. உணவு விநியோக மையத்தின் மீது தாக்குதல் நடத்தி 6 பேரைக் கொன்றதுடன் 22 பேரைக் காயப்படுத்தின.

UNRWA ஆணையர் ஜெனரல் பிலிப் லாஸ்ஸாரினி கூறுகையில், இந்த தாக்குதல் “காஸா பகுதியில் உள்ள மிகச் சில UNRWA விநியோக மையங்களில் ஒன்றாகும்... உணவு விநியோகம் குறைந்து வருவதால், பட்டினி பரவலாக உள்ளது, சில பகுதிகளில் பஞ்சமாக மாறி வருகிறது” என்று குறிப்பிட்டார்.

காஸா மீதான இஸ்ரேலின் படையெடுப்பு தொடங்கியதிலிருந்து, UNRWA “உலகெங்கிலும் உள்ள வேறு எந்த மோதலையும் விஞ்சும் வகையில் அதன் ஊழியர்கள் மற்றும் வசதிகளுக்கு எதிராக முன்னெப்போதும் இல்லாத வகையில் எண்ணிக்கையிலான மீறல்களை” பதிவு செய்துள்ளது, UNOCHA படி, (மனிதாபிமான விவகாரங்களை ஒருங்கிணைப்பதற்கான ஐ.நா. அலுவலகம்) “குறைந்தது 165 UNRWA குழு உறுப்பினர்கள் கொல்லப்பட்டுள்ளனர், 150 க்கும் மேற்பட்ட UNRWA வசதிகள் தாக்கப்பட்டுள்ளன, மேலும் UNRWA வசதிகளில் தஞ்சம் கோரும் போது 400 க்கும் மேற்பட்ட உள்நாட்டில் இடம்பெயர்ந்த மக்கள் (IDPs) கொல்லப்பட்டுள்ளனர்.”

அக்டோபர் 7 முதல், குறைந்தது 31,341 பாலஸ்தீனியர்கள் இப்பகுதியில் கொல்லப்பட்டுள்ளதாகவும், மேலும் 73,134 பேர் காயமடைந்துள்ளதாகவும் காஸாவின் சுகாதார அமைச்சகம் வியாழக்கிழமை தெரிவித்துள்ளது. காணாமல் போனவர்களின் எண்ணிக்கையைச் சேர்த்தால், இறப்பு எண்ணிக்கை 40,000 க்கும் அதிகமாக உயரும் என்று யூரோ-மெட் மானிட்டர் தெரிவித்துள்ளது.

மார்ச் 13-14 காலகட்டத்தில், இஸ்ரேலிய இராணுவ நடவடிக்கைகளால் காஸாவில் 69 பாலஸ்தீனியர்கள் கொல்லப்பட்டனர் என்று சுகாதார அமைச்சகம் தெரிவித்துள்ளது.

ஏறக்குறைய காஸாவின் மொத்த மக்களும் பட்டினியால் வாடுகின்றனர். கடந்த மாதம் வடக்கு காஸாவில் குறைந்தது 23 குழந்தைகள் ஊட்டமின்மை, நீர்ப்போக்கு ஆகியவற்றால் இறந்துவிட்டதாகக் கூறப்படுகிறது. மிக அடிப்படையான உணவுப் பொருட்கள் கிடைக்கவில்லை அல்லது வாங்க முடியாதவையாக உள்ளன. அரிசி ஒரு இறாத்தல் 11 டாலருக்கு விற்கப்படுவதாக நியூயோர்க் டைம்ஸ் செய்தி வெளியிட்டது, இது சாதாரண விலையை விட 10 மடங்கு அதிகமாகும்.

வியாழனன்று வெளியிடப்பட்ட அறிக்கை ஒன்றில், சுகாதாரம் மற்றும் சமூக அபிவிருத்திக்கான Juzoor காஸாவில் சுகாதாரப் பாதுகாப்பு முறை ஒரு உடையும் கட்டத்தில் உள்ளது என்று எச்சரித்துள்ளது. “சிறுநீரக டயாலிசிஸைத் தொடர இயலாமை, இன்சுலின் பற்றாக்குறை மற்றும் பிற உயிர் காக்கும் இதய மருந்துகள், எரிபொருள் பற்றாக்குறை, சுத்தமான தண்ணீரின் பற்றாக்குறை மற்றும் மின்சாரம் இல்லாமை ஆகியவை இருதய நோய்கள் (சி.வி.டி), ஆஸ்துமா, சிறுநீரக நோய் அல்லது நீரிழிவு நோயால் பாதிக்கப்பட்ட ஆயிரக்கணக்கான மக்கள் தங்கள் நிலைமைகளுக்கு சிகிச்சையளிக்கவோ அல்லது கட்டுப்படுத்தவோ முடியவில்லை, இது இறப்புகளின் விரைவான அதிகரிப்புக்கு வழிவகுக்கும்” என்று அது எச்சரித்தது.

இஸ்ரேலிய அரசாங்கம் போருக்கான எந்த பேச்சுவார்த்தை தீர்வையும் தொடர்ந்து நிராகரித்து வருகிறது. புதன்கிழமை, ஹமாஸ் பேச்சுவார்த்தையாளர்கள் இஸ்ரேலிய அரசாங்கத்திடம் போர்நிறுத்தத்திற்கான ஒரு திட்டத்தை சமர்ப்பித்தனர், இதை இஸ்ரேலிய பிரதம மந்திரி பெஞ்சமின் நெத்தனியாகுவின் அலுவலகம் “யதார்த்தமற்றது” என்று அழைத்தது.

இஸ்ரேலிய அரசாங்கம் காஸாவின் தென்கோடியில் உள்ள ரபா நகரத்தின் மீது தாக்குதலை தொடக்க உத்தேசித்துள்ளதாக தெளிவுபடுத்தியுள்ளது. அங்கு ஒரு மில்லியனுக்கும் மேலான அகதிகள் தஞ்சம் புகுந்துள்ளனர்.

திரைக்குப் பின்னால், ரஃபாவில் ஒரு இராணுவ நடவடிக்கையை பகிரங்கமாக ஆதரிப்பது குறித்து அமெரிக்கா தீவிர பேச்சுவார்த்தைகளில் ஈடுபட்டுள்ளது என்று பொலிடிகோ (Politico) தெரிவித்துள்ளது.

“அமெரிக்கா எந்த வகையான ரஃபா மீதான தாக்குதலை ஆதரிக்க முடியும் என்பதை இஸ்ரேலுக்கு தனிப்பட்ட முறையில் தெரிவித்தது” என்று தலைப்பிடப்பட்ட ஒரு கட்டுரையில், பொலிடிகோ எழுதியது, “கூட்டணியை உடைக்கக்கூடிய ஒரு பெரியளவிலான படையெடுப்பை இஸ்ரேல் தவிர்க்கும் வரையில், பைடென் நிர்வாகம் ரஃபாவிற்குள்ளும் அதற்கு கீழும் அதிக மதிப்புள்ள ஹமாஸ் இலக்குகளை இஸ்ரேல் பின்பற்றுவதை ஆதரிக்கும்.”

இதுபோன்றவொரு நடவடிக்கையானது, நிலவறைத் தகர்ப்பு குண்டுகளைப் பயன்படுத்தி ஒரு பாரிய விமானத் தாக்குதலை உள்ளடக்கியதாக இருக்கும் என்பதோடு பிரமாண்டமான பொதுமக்கள் இறப்பு எண்ணிக்கையையும் உள்ளடக்கியதாக இருக்கும்.

வாரயிறுதியில் ஒரு நேர்காணலில், அமெரிக்க ஜனாதிபதி ஜோ பைடென், ரஃபா மீது படையெடுப்பதற்கான இஸ்ரேலிய பிரதம மந்திரி பென்ஜமின் நெத்தன்யாகுவின் திட்டங்களை விமர்சித்து, “இன்னும் 30,000 பாலஸ்தீனியர்கள் கொல்லப்படுவதை உங்களால் அனுமதிக்க முடியாது,” என்று அறிவித்தார்.

ஆனால், பைடெனின் கருத்துக்கள் எந்த கொள்கை மாற்றத்தையும் குறிக்கவில்லை என்று வெள்ளை மாளிகை விரைவாக அறிவித்தது. “ஜனாதிபதி எந்த பிரகடனங்களையும், அறிக்கைகளையும் அல்லது அறிவிப்புகளையும் வெளியிடவில்லை” என்று தேசிய பாதுகாப்பு ஆலோசகர் ஜேக் சல்லிவன் வியாழக்கிழமை ஒரு செய்தியாளர் கூட்டத்தில் கூறினார்.

அமெரிக்காவிடம் இஸ்ரேலுக்கு எந்த “சிவப்புக் கோடுகளும்” இல்லை என்பதை மீண்டும் உறுதிப்படுத்த வெள்ளை மாளிகை விரைந்துள்ளது. “மிகவும் சிக்கலான கொள்கைகளுக்கு சிவப்பு-கோடு சொற்களை ஒதுக்குவது பயனுள்ளது என்று நான் நினைக்கவில்லை” என்று முதன்மை பத்திரிகையின் துணை செயலாளர் ஒலிவியா டால்டன் திங்களன்று ஜனாதிபதியின் விமானத்தில் இருந்து ஒரு செய்தியாளர் சந்திப்பின் போது கூறினார்.