කෝවිඩ්-19 වසංගතයේ ව්‍යාප්තිය පාලනය කිරීමට ගතයුතු අත්‍යවශ්‍ය මහජන සෞඛ්‍යාරක්ෂන පියවර ලෙස විද්‍යාත්මකව තහවුරු කෙරුනු, මුඛ සහ නාස් ආවරන පැලඳීම, කායික දුරස්ථකරනය පවත්වා ගැනීම, අගුලු දැමීම් ඇතුලු සංචරන සීමා පැනවීම සහ මහජන එන්නත්කරනය ආදිය, තම 'පුද්ගලික නිදහස උල්ලංඝනය කිරීමක්' ලෙස අර්ථ කථනය කරමින් එම පියවර වලට එරෙහිව ගෙනයන ගෝලීය ව්‍යාපාරයේ ප්‍රධානතම අංගය ලෙස එන්නත් විරෝධී උද්ඝෝෂනය ඉස්මත්තට පැමින ඇත.
කැනඩාවේ ඔටාවා, චෙක් ජනරජයේ ප්‍රාග් සහ බෙල්ජියමේ බ්‍රසල්ස් යන අගනගරයන් වෙත පසුගිය සතියේ රැස්වූ එම ව්‍යාපාරය අනුයන්නෝ, එන්නත්කරනය 'අනිවාර්ය' කිරීමට එරෙහිව විරෝධතා උද්ඝෝෂනයන්හි යෙදී ගත්හ.
ජාත්‍යන්තරව ගෙනයන මෙම උද්ඝෝෂනයේ කොටසක් ලෙස, ශ්‍රී ලංකාවේ එහි ප්‍රමුඛ නියෝජිතවරියක් වන ධරනී රාජසිංහම් ඇතුලු තවත් තිදෙනෙකු, වයස අවුරුදු 18 න් පහල අයට කෝවිඩ් එන්නත 'අනිවාර්ය' කිරීමට එරෙහිව, මූලික අයිතිවාසිකම් (එෆ්ආර්) පෙත්සමක් ශ්‍රේෂ්ඨාධිකරනයට ඉදිරිපත්කොට ඇත. දෙමාපියන්ගේ අවසරයකින් තොරව වයස අවුරුදු 18 ට අඩු අයවලුන්ට කෝවිඩ් එන්නත ලබාදීම 'මූලික අයිතිවාසිකම් උල්ලංඝනය කිරීමක්' බව පෙත්සම්කරුවෝ කියා සිටිති.
පෙත්සම ඉදිරිපත් කෙරී ඇත්තේ, දසදහස් සංඛ්‍යාත ජනයා දෛනිකව මරනයට ඇද දමමින් සහ මිලියන සංඛ්‍යාත වැඩිහිටියන් සහ දරුවන් ආසාදනය කරමින් කෝවිඩ්-19 වෛරසයේ ඔමික්‍රෝන් ප්‍රභේදය, ලංකාව ද ඇතුලුව ලොවපුරා අතිමහත් වේගයෙන් පැතිරෙන තතු තුල, මහජන සෞඛ්‍යයේ හා කම්කරු පන්තියේ ආත්මාරක්ෂාව සඳහා මහා පරිමාන එන්නත්කරනය මූලික අවශ්‍යතාවයක්ව පවතින තතු යටතේ ය.
රාජසිංහම් ඇතුලු නඩය, එන්නත්කරනයට එරෙහිව අධිකරනය යොදා ගැනීමට යත්න දරනුයේ, 'මූලික අයිතීන්' පිලිබඳ ධජය ලෙලවමිනි. නමුත්, ලෝක සමාජවාදී වෙබ් අඩවි‌ය (ලෝසවෙඅ) 2021 ජූලි 29 දා නිකුත් කල ප්‍රකාශයෙන් පෙන්වාදුන් පරිදි, 'සත්‍යය නම්, අන්‍ය පුද්ගලයින් ආසාදනය කර ඔවුන්ගේ ජීවිත අනතුරේ හෙලීමේ “අයිතියක්” කිසිදු පුද්ගලයෙකුට නොමැති බවයි'.
එම ප්‍රකාශයේ මෙසේද සඳහන් වෙයි: “එන්නත්-විරෝධී” කන්ඩායම්වල සාපරාධී වගකීම් විරහිත උත්සාහයන් තිබියදී, COVID-19 එන්නත්කරනය යනු, එම්එම්ආර් (සරම්ප, කම්මුල්ගාය සහ රුබෙල්ලා හෙවත් ජර්මන් සරම්ප), පෝලියෝ සහ වෙනත් රෝගාබාධ සඳහා, සාමාන්‍යයෙන් පාසැල් යාමට පෙර ලමුන්ට “එන්නත් ලබාදීම' වැන්නකි. ලමුන්ට, ඵලදායී මෙන්ම ආරක්‍ෂිත වන COVID-19 එන්නතෙහි නව සැකසුමක් මාස කිහිපයක් තුල නිපදවනු ඇතැයි බලාපොරොත්තු වන අතර, එය පාසල් පැමිනීමේදී අනිවාර්ය අවශ්‍යතාවයක් බවට පත්විය යුතුය.'
එන්නත්-විරෝධී ව්‍යාපාරයේ කුප්‍රකට උද්ඝෝෂිකාවක් වන රාජසිංහම්, කෝවිඩ්-19 යනු ව්‍යසනකාරී ගෝලීය වසංගතයක් නොවන බවට ව්‍යාජ හේතු දක්වමින් සහ එය සාමාන්‍ය බෝවන උනකට සමාන කරමින්, එන්නත්කරනයට එරෙහි ව, විවිධ මාධ්‍යයන්ට ලිපි සම්පාදනය කරන්නියකි.
කෝවිඩ් එන්නත් සොයා ගැනීමෙන් පසු පවා ඒවා ඇනවුම් කිරීමට කල් මරමින් සිටි රාජපක්ෂ ආන්ඩුව, වැඩුනු මහජන විරෝධය හමුවේ අවසානයේදී එන්නත් ඇනවුම් කල අවස්ථාවේ රාජසිංහම් එයට එරෙහිව, 'ගෝලීය දකුන එන්නත් මිලදී ගැනීමට හදිසි වන්නේ ඇයි?' යන මැයෙන්, 2021 පෙබරවාරි 04 දා, කලම්බු ටෙලිග්‍රාෆ් වෙබ් අඩවියට ලිපියක් ලියුවාය.
රාජසිංහම් එහි මෙසේ සඳහන් කරයි: 'ශ්‍රී ලංකාව සඳහා වන 2020 වාර්ෂික දත්ත පැහැදිලිව පෙන්නුම් කරන්නේ රට තුල Covid-19 හදිසි අවස්ථාවක් නොමැති බවයි, එබැවින් සියයට 65 ක ඵලදායී එන්නතක් මිලදී ගැනීමට රජය ඉක්මන් වන්නේ මන්දැයි ප්‍රශ්න මතු වන අතර එහි දිගුකාලීන අතුරු ආබාධ තවමත් නොදනී?'
ඉන් නොනවතින ඇය කියා සිටින්නේ, 'උනුසුම් හා තෙත් නිවර්තන අග්නිදිග ආසියානු සහ අප්‍රිකානු රටවල් බොහොමයක' 2020 සඳහා වන 'ප්‍රමානාත්මක සහ ගුනාත්මක දත්ත පෙන්නුම් කරන්නේ' ගෝලීය දකුනේ බොහෝ රටවල 'Covid-19 හදිසි අවස්ථාවක් නොමැති' බවයි.
කෝවිඩ්-19 වසංගතයේ ව්‍යසනකාරිත්වය සාපරාධී ලෙස අඩු තක්සේරු කරන ඇය, සාමාන්‍ය 'ඍතුමය බෝවෙන උනකට' ද වඩා එහි බලපෑම අඩුබව පෙන්වීමට යත්න දරයි. 'මිලියන 22ක් වෙසෙන ශ්‍රී ලංකාවේ, සාමාන්‍ය වර්ෂයකදී ඉන්ෆ්ලුවෙන්සා රෝගාබාධ හේතුවෙන් පුද්ගලයන් 4,000ත් 6000ත් අතර සංඛ්‍යාවක්' මිය ගියද, Covid-19 ආසාදනයෙන් මියගොස් ඇති බවට 'වාර්තා වී ඇත්තේ 204ක්' පමනක් බවට ඇය තර්ක කරයි.
රාජසිංහම් තම තර්කයට ඉන්දියාවද ඇතුලත් කර ගනිමින්, 2018 වාර්තාවන්ට අනුව ඉන්ෆ්ලුවෙන්සා සහ නියුමෝනියා රෝගයෙන් එරට 616,531 ක් මියගොස් ඇති නමුත් කෝවිඩ්-19 න් 2020 දී මියගොස් ඇත්තේ 150,000 ක් පමනක් බව කියා සිටී.
ඇගේ අවතක්සේරු කිරීම් වලට මුලුමනින්ම විපරීත අයුරින් අදවන විට ඉන්දියාවේ මියගොස් ඇති කෝවිඩ්-19 රෝගීන් සංඛ්‍යාවේ නිල අගය 500,000 කට ආසන්න වන අතර පිලිගත් පර්යේෂන කන්ඩායම් පෙන්වා දෙන්නේ එය මිලියනය ඉක්මවා ඇති බවයි. ලංකාවේ නිල මරන සංඛ්‍යාව 15,000 ඉක්මවා ඇත.
මිනිස් ජීවිත අංක ගනිතාත්මකව සන්සන්දනය කිරීමේ රාජසිංහම් ගේ අන්ත ප්‍රතිගාමී තර්කනයට ප්‍රතිකූලව, තම විෂයට අවංක සහ සෑම මිනිස් ජීවිතයක්ම අගයන විද්‍යාඥයන් නැවත නැවතත් පෙන්වා දුන්නේ වසංගතය ලොව වෙලා ගනිමින් ඉමහත් ව්‍යසනයක් නිර්මානය කෙරෙමින් පවතින බව යි.
වසංගතය ගෝලීය පරිමානව තුරන් කිරීමේ මූලෝපාය යටතේ, අත්‍යවශ්‍ය නොවන නිෂ්පාදන සහ පාසල් වසා දැමීම, මහා පරිමාන පරීක්ෂන මගින් ආසාදිතයන් සොයා ගැනීම සහ ඔවුන් හුදෙකලා කිරීම ඇතුලු දැඩි සෞඛ්‍යාරක්ෂන පියවර වලට සමගාමීව මහා පරිමාන එන්නත්කරනය ගෝලීය වශයෙන් වහා ක්‍රියාත්මක කිරීමෙන් වසංගතයට එක් ජීවිතයක් හෝ බිලිවීම නවතාගත හැකි බව ඔවුහු පෙන්වා දුන්හ. ජාත්‍යන්තර විද්‍යාඥයන් සහභාගි කර ගනිමින් 2022 ඔක්තෝබර් 24 දා ලෝසවෙඅ පැවැත්වූ ඔන්ලයින් රැස්වීම මෙහි ලා ප්‍රමුඛ ය.
මෙම විද්‍යාත්මක වැඩපිලිවෙලට ප්‍රතිකූලව රාජසිංහම් ඇතුලු එන්නත් විරෝධීන් ගෙනයන ප්‍රතිගාමී උද්ඝෝෂනය ගුනාංගීකරනය කරමින්, ඉහත දැක්වූ ලෝසවෙඅ ප්‍රකාශය මෙසේ සඳහන් කරයි:
එන්නත් 'අභිනියෝගයන්ට' එරෙහි ව්‍යාපාරයෙහි අවම වශයෙන් හෝ ප්‍රගතිශීලී කිසිවක් නොමැත. එය පදනම් වී ඇත්තේ නොදැනුවත්කම, භීතිය සහ විද්‍යා විරෝධී අගතීන්ට කරන ආයාචනා මත ය. පුද්ගලික නිදහස උල්ලංඝනය කිරීමක් යැයි කියමින් එන්නත්කරනයට එරෙහිව උද්ඝෝෂනය කරන්නෝ, කම්කරු පන්තියේ අවශ්‍යතා සමඟ පොදු කිසිවක් නැති, අරාජිකවාදය සහ ස්වාධීනතාවාදය පතුරුවති.
මහජන එන්නත්කරනයට එරෙහිව ගෙන යන ව්‍යාපාරය, 'මුළුමනින්ම දක්ෂිනාංශික' බවත්, 'ලොව පුරා කම්කරුවන් එයට විරුද්ධ විය යුතු' බවත් ප්‍රකාශය කියා සිටී.
අනෙක් අතට, 'එන්නත එකම විසඳුම' ලෙස තොරොම්බල් කරමින් එන්නත්කරනය ප්‍රවර්ධනය කිරීම සඳහා රාජපක්ෂ ආන්ඩුව ගෙනයන උද්ඝෝෂනයේ ද කවර හෝ ප්‍රගතිශීලී අන්තර්ගතයක් නොමැත. ආන්ඩුව ආරම්භයේදී තර්ක කලේ, රාජසිංහම් තර්ක කරන ආකාරයට ම, එන්නත ලබා ගැනීමේ 'හදිසි තත්වයක්' ලංකාවේ නොමැති බවයි. ආන්ඩුව දැන් එන්නත ප්‍රවර්ධනය කරන්නේ වෙනත් ප්‍රතිගාමී අරමුනකිනි. එන්නතෙන් පමනක් වසංගතය පාලනය කල හැකිය යන අවිද්‍යාත්මක මතය මහජනතාවට ගිල්ලමින්, වෛරසයේ ව්‍යාප්තිය පාලනය කිරීමේ සියලු පියවර අත්හැර දමා, 'වසංගතය සමග ජීවත්වීමේ' සාපරාධී පිලිවෙත ඉදිරියට ගෙනයාම එහි අරමුනයි.
ලොවපුරා ආන්ඩු අනුයන මෙම පිලිවෙත ගලා එන්නේ ධනපති ලාභ උත්පාදනය අබාධිතව සහ අඛන්ඩව පවත්වාගෙන යාමේ අවශ්‍යතාවයෙනි. ඊට ප්‍රතිකූලව, මහජන සෞඛ්‍ය පිලිවෙත්වල මූලික අරමුන විය යුත්තේ මිනිස් ජීවිත ආරක්ෂා කිරීම යි. රාජසිංහම් ඇතුලු එන්නත් විරෝධීන්ගේ සහ ආන්ඩුවේ අරමුනු, එම අරමුනට සාකල්‍යයෙන්ම එරෙහිව පිහිටා සිටී. අවසාන විග්‍රහයේදී ඔවුන් දෙපාර්ශ්වයම ධනපති ලාභ අවශ්‍යතා වෙනුවෙන් එකම කඳවුරක සන්ධානගතව සිටිති.
වසංගතයෙන් මිනිස් වර්ගයාට ගැලවීගත හැක්කේ, කෝටි-ප්‍රකෝටිපතියන් ගේ ව්‍යාපාරික ලාභ හා පුද්ගලික ධන රාශීකරනයට මිනිස් ජීවිත ආරක්ෂාව යටත් කරමින් ධනපති ආන්ඩු අනුයන රුදුරු පිලිවෙත් වලට එරෙහි වූ, 'සමාජයේ අවශ්‍යතා වලට ලාභයේ අවශ්‍යතා යටපත් කල යුතුය' යන මූලධර්මය මත පාදක වූ කම්කරු පංතියේ ගෝලීය ප්‍රතිචාරයක් මගින් පමනකි.
වසංගතය ව්‍යාප්ත වීමෙන් සිදුව ඇති සහ සිදුවෙමින් පවත්නා මිලියන සංඛ්‍යාත මරන සම්බන්ධයෙන් ධනේශ්වර පද්ධතියේ සාපරාධී වගකීම හෙලි කරන, කෝවිඩ්-19 වසංගතය පිලිබඳ ලෝසවෙඅ ගෝලීය කම්කරු පරීක්ෂනය මෙහි ලා ප්‍රමුඛ භූමිකාවක් ඉටු කරයි.