[මෙය Oppose the US-NATO drive to war with Russia in Ukraine!
යන මැයෙන් 2022 පෙබරවාරි 14 වැනි දින පල වූ ලිපියේ පරිවර්තනයයි.]
1. වහාම යුක්රේනය ආක්‍රමනය කිරීමේ අනතුරක් පිලිබඳ වංචනික ප්‍රකාශය කඩතුරාවක් ලෙස යොදා ගනිමින්, රුසියාව සමග යුද්ධයක් අවුලුවාලීමට වොෂින්ටනය සහ එහි නේටෝ සහචරයන් දරන අන්තරායකාරී ප්‍රයත්නයට, හතරවන ජාත්‍යන්තරයේ ජාත්‍යන්තර කමිටුව (හජාජාක) සහ ලෝක සමාජවාදී වෙබ් අඩවිය නිසැක ලෙස විරුද්ධ වෙයි. විශ්වාසනීය කරුනුවලින් තොරව හා සියලු දේශපාලන තර්කනයන්ට පටහැනි ලෙස බයිඩන් පාලනය 'රුසියානුවෝ පැමිනෙති' යන ප්‍රත්‍යක්ෂ ලෙස අභූතරූපී කථා ප්‍රවෘත්තිය ගොතා ඇත.
2. සමීපස්ථ යුද්ධයක් පිලිබඳ ප්‍රකාශ නිකුත් වන්නේ එක්සත් ජනපදයෙන් සහ නේටෝවෙන් පමනි. රුසියානු ජනාධිපති ව්ලැඩිමීර් පුටින්, මේවා ඔහුගේ අභිප්‍රාය බවට ඉඟි කරන කිසිදු ප්‍රකාශයක් පවා කර නැත. යුක්රේන ජනාධිපති වොලඩිමීර් සෙලෙන්ස්කි, රුසියානු ආක්‍රමනයක් 'සමීප' බව ප්‍රතික්ෂේප කරන අතර, සන්ත්‍රාසය ඇවිස්සීම නතර කරන ලෙස එක්සත් ජනපදයෙන් සහ නේටෝවෙන් නැවත නැවතත් ඉල්ලා තිබේ.
3. ප්‍රශ්න නො කරන හා ඔවුන් වෙනුවෙන් එජ මිලිටරිය හා ඔත්තු සේවා විසින් සකසනු ලැබෙන පිටපත පරම සත්‍යය ලෙස ඉදිරිපත් කරන මොලයක් නැති ඉදිරිපත් කරන්නන්ගෙන් සැදුම්ලත් පිට කොන්දක් නැති මාධ්‍යවලින්, සිත හිරි වට්ටන සුලු ඇමරිකානු ආන්ඩුවේ ප්‍රචාරය ජනයා අතර බෙදා හරිනු ලැබේ. 2003 විනාශකාරී ඉරාක ආක්‍රමනය යුක්තිසහගත කල “ජන ඝාතන අවි” බොරුව අමතක වී ඇත. එකදු විවේචනාත්මක ප්‍රශ්නයකට හෝ යුද විරෝධයේ හඬකට හෝ ජනමාධ්‍ය වෙත ප්‍රවේශ වීමට ඉඩ නොදේ. චෝදනා කරන දේට සාක්ෂි වශයෙන් හුදෙක් චෝදනාවම ඉදිරිපත් කරයි. බයිඩන් පරිපාලනයේ එක් ප්‍රකාශකයෙකු මෑත මාධ්‍ය හමුවකදී ප්‍රකාශ කල පරිදි, ආන්ඩුවේ ප්‍රකාශයකට සනාථ කරන සාක්ෂි අවශ්‍ය නොවේ. ආන්ඩුව විසින් කර ඇති බැවින්, ප්‍රකාශයම ප්‍රමානවත් සාක්ෂියක් වන්නේ ය .
4. සීඅයිඒය විසින් තිර රචනය කරන ලද මාධ්‍ය සුරංගනා කතාවට අනුව, සාමයට ආදරය කරන ඇමරිකාව සහ නැටෝව යුක්රේනයට එල්ලවී ඇති රුසියානු ආක්‍රමනයක හදිසි තර්ජනයට ප්‍රතිචාර දක්වයි. එහෙත් උත්සන්න වන ගැටුම, එක්සත් ජනපදය හා නේටෝව විසින් මාස ගනනාවක් තිස්සේ තීව්ර කරන ලද සූදානමක ප්‍රතිඵලයකි. පසුගිය මාස අට තුල වොෂින්ටනය, ග්‍රීසියේ ඇලෙක්සැන්ඩ්‍රොපොලිස් හි පිහිටි සිය කඳවුරට එක්සත් ජනපද භටයන් 10,000ක් පිටත් කර එවූ අතර, බෝල්කන් සහ කලු මුහුදු ප්‍රදේශවල සටනට සූදානම් වීම සඳහා DEFENDER-Europe 21 හමුදා අභ්‍යාසය මෙහෙයවමින්, කලු මුහුදේ මෙතෙක් සිදු කල විශාලතම සී බ්‍රීස් මෙහෙයුම (නේටෝ හමුදා කලු මුහුදේ වාර්ෂික ව පවත්වන හමුදා අභ්‍යාසයක් - සංස්.) පැවැත්වීය.
5. සියලුම ඇමරිකානු සහ නැටෝ යුද්ධ මෙන්ම, යුක්රේනය මුල් කරගත් ගැටුම ද කුහක සෙයියාවෙන් සූදානම් වෙමින් පවතී. මෙම ප්‍රශ්නයේදී රුසියාව විසින් ක්‍රිමියාව ඈඳා ගැනීම සහ නැගෙනහිර යුක්රේනයේ බෙදුම්වාදී බලවේගවලට එය දෙන සහයෝගය - මේ දෙකම එක්සත් ජනපදය හා ජර්මනිය විසින් සංවිධානය කරන ලද 2014 පාලන තන්ත්‍ර-මාරු කුමන්ත්‍රනයට ප්‍රතිචාර වශයෙන් වර්ධනය වී ඇත - යුක්රේන ස්වෛරීත්වය අමු අමුවේ උල්ලංඝනය කිරීමක් ලෙස ඉදිරිපත් කෙරේ.
6. එක්සත් ජනපදය සහ නැටෝව රාජ්‍ය දේශසීමා වල පාරිශුද්ධ භාවය ප්‍රකාශ කරති. එහෙත් ඔවුන් පසුගිය වසර 30 තිස්සේ රාජ්‍ය දේශසීමා නැවත නැවත උල්ලංඝනය කිරීම සහ ප්‍රතිසංවිධානය කිරීම හමුවේ, මෙම මූලධර්මයට කැපවී සිටින බවට ඔවුන්ගේ කියා සිටීම පෑල දොරින් පලා යයි. 1991 සෝවියට් සංගමය විසුරුවා හැරීමෙන් පසුව, විනාශ කරන ලද යුගෝස්ලාවියාවේ ස්වයං නිර්නය සම්බන්ධයෙන් එක්සත් ජනපදය සහ නැටෝව කිසිදු ගෞරවයක් නො දැක්වූහ. එක්සත් ජනපදය හා ජර්මනිය විසින් ක්‍රොඒෂියානු ස්වාධීනත්වය පිලිගනු ලැබීම දශකයක වාර්ගික ගැටුම් සඳහා වේදිකාව සකසන ලද අතර එමඟින් ජීවිත දසදහස් ගනන් විනාශ කෙරුනි. එක්සත් ජනපදය ප්‍රමුඛ නැටෝ හවුල 1999 දී, මත්ද්‍රව්‍ය ජාවාරම්කරුවන්ගෙන් සමන්විත ආන්ඩුවක පාලනය යටතේ ස්ථාපිත කරන ලද කොසෝවෝ පලාතේ වෙන්වීමට සහාය දැක්වීම සඳහා, දින 78 ක් අඛන්ඩ ව සර්බියාවට බෝම්බ හෙලී ය.
7. එක්සත් ජනපදය 2001 ඔක්තෝබර් මාසයේදී ඇෆ්ගනිස්ථානය ආක්‍රමනය කර එහි ආන්ඩුව පෙරලා දැමීය. ඉන් ඉක්බිතිව 2003 මාර්තු මාසයේදී සිදු කෙරුනේ ජාත්‍යන්තර නීතිය ඊටත් වඩා උග්‍ර ලෙස උල්ලංඝනය කිරීමකි. එනම් ඉරාක ආක්‍රමනය සහ එහි ආන්ඩුව පෙරලා දැමීම ය. ලේ වැකි එක්සත් ජනපද වාඩිලෑමේ දී, වර්තමාන රාජ්‍ය ලේකම් ඇන්ටනි බ්ලින්කන් ඉරාකය සඳහා ත්‍රෛපාර්ශ්වික බෙදීමක් යෝජනා කලේය. එබඳුම සැලසුම් ලිබියාව සම්බන්ධයෙන් ද සකස් කෙරුනේ, එහි ආන්ඩුව පෙරලා දමා එහි ජනාධිපති ඝාතනය කිරීමට තුඩු දුන් 2011 ඇමරිකා-නැටෝ ප්‍රහාරය වෙනුවෙනි. ලේ වැකි අපරාධයක් වූ එය එවකට රාජ්‍ය ලේකම් හිලරි ක්ලින්ටන් විසින් සලකා ගන්නා ලද්දේ සරදමටත් සිනාවටත් උචිත අවස්ථාවක් ලෙස ය. මෙම මැදිහත් වීමෙන් පසුව එක්සත් ජනපදය සිරියාවට බෝම්බ හෙලීම ඇරඹුනු අතර, එය අද දවස දක්වාමත් සිදු කෙරෙමින් පවතී.
8. යුක්රේන ප්රජාතන්ත්රවාදය සඳහා වොෂින්ටනයේ ප‍්‍රකාශිත සැලකිල්ල, යුක්රේන ස්වයං-නිර්නය සඳහා වන එහි භක්තියට වඩා නොඅඩු රැවටිලිකාර කමක් සහ කුහකත්වයකි. තේරී පත් වූ ආන්ඩුවක් එක්සත් ජනපදයේ පිටුබලය සහිත ව පෙරලා දැමීමෙන් සිය පැවැත්ම නිර්නය කෙරුනු කියෙව් ආන්ඩුව පාලනය පවත්වා ගෙන යන්නේ, යුක්රේන කම්කරු පන්තිය මර්දනය කිරීමට වගකිව යුතු කතිපයාධිකාරී චෞර තන්ත්‍රයක් වෙනුවෙනි. විවිධ පැරාමිලිටරි සංවිධාන සහ අන්ත දක්ෂිනාංශික කන්ඩායම් ඇතුලු ව සෙලෙන්ස්කි රැඳී සිටින සමාජ බලවේග ෆැසිස්ට්වාදයේ ඓතිහාසික දුර්ගන්ධය දරා සිටියි.
9. වොෂින්ටනයේ යුද ධාවනයට උමතු හදිසි භාවයක් ඇත. එය ප්‍රතිවිපාක කිරා බැලීමට හෝ උදා විය හැකි නරකම අවස්ථා විවෘතව සාකච්ඡා කිරීමට ඉඩ නොදෙන කාලසටහනක් මත පදනම්ව ක්‍රියා කරන බව පෙනේ. ඇමරිකානුවන් සහ රුසියානුවන් එකිනෙකාට වෙඩි තැබීමට පටන් ගන්නේ නම්, “එය ලෝක යුද්ධයක්” යැයි බයිඩන් පෙබරවාරි 10දා පුවත්පත්වලට පැවසීය. එහෙත් එවැනි ව්‍යසනයක අවදානම අඩු කිරීමට හා එවැන්නක් වැලැක්වීමට කිසිදු පියවරක් ගන්නවා වෙනුවට, රුසියාව තම ආක්‍රමනය දියත් කිරීමට අදහස් කරන නිශ්චිත දිනය පෙබරවාරි 16 වැනි දා බව තමන් දන්නේ යැයි නිවේදනය කරමින් එක්සත් ජනපදය සිය ප්‍රකෝප කිරීම් සහ චෝදනා ඉදිරියට ගෙන යයි.
10. එක්සත් ජනපදය තම උත්සුකයන් හඹා යාමේ ඒකපාර්ශ්වික අතිඅවදානම් ප්‍රයත්නයක නියැලී සිටී. වොෂින්ටනයේ සහ එහි නැටෝ සහචරයින්ගේ යුද උමතුව මෙහෙයවනු ලබන්නේ මූලික සාධක දෙකක වෛෂයික තර්කනයකට අනුවය.
11. පලමුව, සෝවියට් සංගමය විසුරුවා හැරීම මඟින් විවර කෙරුනු කොල්ලකෑමේ සහ අධිරාජ්‍යවාදී ව්‍යාප්තියේ ශක්‍යතා ගසාකෑමේ නිර්දය ප්‍රයත්නයක එක්සත් ජනපදය 1991 සිට නිරත වී ඇත. 1992 දී සකස් කරන ලද පෙන්ටගනයේ මූලෝපායික සැලැස්ම, එක්සත් ජනපදය සිය ලෝක ආධිපත්‍යයට නව අභියෝගකරුවෙකු මතුවීමට ඉඩ නොදෙනු ඇති බව ප්‍රකාශ කලේය. පසුගිය දශක තුන පුරා වොෂින්ටනය, බෝල්කන්, මැද පෙරදිග, උතුරු අප්‍රිකාව සහ මධ්‍යම ආසියාවේ රටවල් සහ සමස්ත ශිෂ්ටාචාරයන් සුන්බුන් බවට පත් කරමින් නිර්දය ලෙස මේ අරමුන සඳහා යුද්ධය දියත් කර ඇත. ඇමරිකානු ආර්ථික ආධිපත්‍යයේ පරිහානිය වඩාත් පැහැදිලි වන තරමට, එහි යුද අරමුනු වඩ වඩාත් ලෝකය වටලා ගනී. එහි බැල්ම දැන් රුසියාව සහ චීනය වෙත යොමු වී ඇත.
12. 2016 පෙබරවාරි 18 වැනි දින “සමාජවාදය සහ යුද්ධයට එරෙහි සටන” යන ප්‍රකාශය තුලින්, හතරවන ජාත්‍යන්තරයේ ජාත්‍යන්තර කමිටුව, ඇමරිකානු අධිරාජ්‍යවාදයේ සහ එහි නේටෝ සහචරයින්ගේ ගෝලීය මූලෝපාය පිලිබඳ විස්තීරන විශ්ලේෂනයක් ඉදිරිපත් කලේය. එය අවධාරනය කලේ, යුද්ධය කරා වන තල්ලුව යටින් පවතිනුයේ “ලෝක ධනේශ්වර ක්‍රමයේ (පහත දැක්වෙන) ගැඹුරු ප්‍රතිවිරෝධතා බව ය: 1) ගෝලීය වශයෙන් සමෝධානික සහ එකිනෙකා මත රඳා පවතින ආර්ථිකයක් සහ එය එදිරිවාදී ජාතික රාජ්‍යයන් ලෙස බෙදීයාම අතර; සහ 2) ගෝලීය නිෂ්පාදනයේ සමාජගත ස්වභාවය සහ නිෂ්පාදන මාධ්‍යවල පුද්ගලික හිමිකාරිත්වය හරහා පාලක ධනේශ්වර පන්තිය, පුද්ගලික ලාභ සමුච්චයේ අවශ්‍යතාවයට එය යටත් කිරීම අතර.'
13. මෙම මූලික ප්‍රතිවිරෝධතාවල සන්දර්භය තුල, ජාත්‍යන්තර කමිටුව මෙසේ පැහැදිලි කලේ ය:
යුද්ධයට තල්ලුව කේන්ද්‍රගත වී ඇත්තේ, ගෝලීය අධිකාරය දරන බලය ලෙස සිය ආස්ථානය පවත්වා ගැනීමට එක්සත් ජනපදය දරන උත්සාහයන් තුල ය. 1991 දී සෝවියට් සංගමය විසුරුවා හැරීම ලොව පුරා අසමසම එක්සත් ජනපද ආධිපත්‍යය තහවුරු කිරීමේ අවස්ථාවක් ලෙස සලකනු ලැබීය. 'ඉතිහාසයේ අවසානය' ලෙස අධිරාජ්‍යවාදී ප්‍රචාරකයින් විසින් එය උත්කර්ෂයට නංවනු ලැබුවේ, එක්සත් ජනපදයේ අභියෝග කල නොහැකි බලය වෝල් වීදියේ අවශ්‍යතා සඳහා 'නව ලෝක පර්යායක්' නියම කරන 'ඒක ධ්‍රැවීය මොහොතක්' නිර්මානය කිරීමක් ලෙසය. සෝවියට් සංගමය යුරෝපයේ නැගෙනහිර මායිම්වල සිට පැසිෆික් සාගරය දක්වා විහිදෙන පෘථිවි ගෝලයේ විශාල ප්‍රදේශයක් ආවරනය කර තිබුනි. මේ අනුව, බෙලහීන වූ රුසියාව සහ අලුතින් බිහිවූ ස්වාධීන මධ්‍යම ආසියානු රාජ්‍යයන් ඇතුලු යුරේසියාවේ අතිවිශාල ප්‍රදේශ, ව්‍යාපාරික සූරාකෑම සහ කොල්ලය සඳහා නැවතත් 'පොරපිටියක්' බවට පත් විය. චීනයේ ධනේශ්වර ක්‍රමයේ පුනස්ථාපනය, 1989 දී කම්කරු පන්තියේ ප්‍රතිරෝධය මැඬීමට සිය පොලිස්-රාජ්‍ය මර්දනය යොදාගැනීම සහ ජාත්‍යන්තර ආයෝජන සඳහා “නිදහස් වෙලඳ කලාප” විවෘත කිරීම මගින් ලාභ ශ්‍රමයේ විශාල සංචිතයක් විවෘත කලේ ය.
14. තදාසන්න රුසියානු ආක්‍රමනයක් පිලිබඳ කියාපෑම් සහ කලාපයට එක්සත් ජනපද හමුදා යෙදවීම පෙන්නුම් කරන්නේ, රුසියාව සමග දිගු කලක් තිස්සේ සැලසුම් කර ඇති ගැටුම, තවදුරටත් ප්‍රමාද කල නොහැකි බවට සංගත-මූල්‍ය ප්‍රභූවේ සහ ඔත්තු සේවා ආයතනවල බලගතු කොටස් තීරනය කර ඇති බවයි. 2017 සහ 2020 අතර, ට්‍රම්ප්ට එරෙහිව ඩිමොක්‍රටික් පක්ෂයේ ප්‍රධාන පැමිනිල්ල වුනේ, ඔහු ව්‍යවස්ථාවට පහර දීම සහ ආඥාදායකත්වය සඳහා සූදානම් වීම නොව, ඒ වෙනුවට, ප්‍රමානවත් බලයකින් රුසියාවට විරුද්ධ වීමට ඔහු අසමත් වීමයි. 2019 දෙසැම්බර් සහ 2020 පෙබරවාරි අතර ගෙන ආ ට්‍රම්ප්ට විරුද්ධ පලමු දෝෂාභියෝග ක්‍රියාදාමයන් තුල අධිකාරය දැරුවේ, ඔහු යුක්රේනයට මිලිටරි ආධාර ලබා දීම අත්හිටවූ බවට වූ චෝදනාව යි. ට්‍රම්ප් පිලිබඳ ඩිමොක්‍රටික් පක්ෂයේ සම්මත හෙලාදැකීම වූයේ, ඔහු ෆැසිස්ට්වාදී ආඥාදායකයෙකු වීම නොව ඔහු “පුටින්ගේ රූකඩයක්” වීමයි.
15. දැන් බයිඩන් පරිපාලනය බලයේ සිටින බැවින්, අහිමි වූ කාලය පිරිමැසීමට ඔවුහු උත්සාහ කරති. එක්සත් ජනපද-නේටෝ මූලෝපාය පැහැදිලිව පෙනෙන තරමටම එය ගොරහැඩි ද වෙයි. රුසියාව යුද්ධයට ඇද ගැනීමේ ඇමක් ලෙස යුක්රේනය භාවිතා කෙරේ. රුසියානු “බොරු කොඩි” මෙහෙයුමක් ගැන බයිඩන් නැවත නැවතත් සඳහන් කිරීම, “හොරා අල්ලා ගනිල්ලා!” යයි කෑගසමින් දුවමින්, තමා ලුහු බැඳ ඒමට ඉඩ ඇති අයගේ අවධානය වෙනතකට යොමු කරන පික්පොකට්කාරයාගේ සුප්‍රසිද්ධ උපක්‍රමය සිහිපත් කරවයි. මෙහිදී “ව්‍යාජ කොඩි” මෙහෙයුමක් සැලසුම් කරන කිසියම් රටක් වේ නම්, ඒ එක්සත් ජනපදයයි.
16. එහි මූලාරම්භය කෙතරම් සැක කටයුතු වුනත් යුක්රේනයේ සිදුවන ඕනෑම දෙයක්, නේටෝ හමුදාවන් සක්‍රීය කිරීමටත්, කෙක්කෙන් හෝ කොක්කෙන් යුද තත්වයක් නිර්මානය කිරීමටත් භාවිතා කරනු ඇත. රුසියාව ජර්මනියට ස්වභාවික ගෑස් සැපයීමට ඉදි කල Nord Stream II නල මාර්ග ව්‍යාපෘතිය අවසන් වනු ඇත. නේටෝව විසින් වට කරන ලද රුසියාව, කොන්දේසි විරහිතව ක්‍රිමියාව නැවත යුක්රේනයට බාර දිය යතුය යන නියෝගයේ සිට කිසිදා නිම නොවන සහ නිරන්තරයෙන් පුලුල් වන ඉල්ලීම් ලැයිස්තුවකට මුහුන දෙනු ඇත. බෙලාරුස් කෙරෙහි රුසියානු බලපෑම අවසන් කෙරෙනු ඇත. චෙච්නියාවේ සිට සයිබීරියාව දක්වා වන රුසියාවේ බෙදුම්වාදී ව්‍යාපාර වලට ප්‍රසිද්ධියේ අධිරාජ්‍යවාදී සහයෝගය ලැබෙනු ඇත. අවසාන ඉලක්කය මොස්කව්හි පාලන තන්ත්රය වෙනස් කිරීම සහ රුසියාව කැබැලි කිරීමයි.
17. නේටෝවේ සාමාජිකයෙකු වීමට යුක්රේනය සතු “අයිතිය” පිලිබඳ බයිඩන් පරිපාලනය කරන අවධාරනය, රුසියාව මුලුමනින්ම බෙලහීන රාජ්‍යයක තත්වයට ඇද දැමීම සඳහා යොමු ව ඇති මූලෝපායක අත්‍යවශ්‍ය අංගයකි. නැසීගිය අධිරාජ්‍යවාදී මූලෝපායඥ සහ යුදවාදී ස්බිග්නියෙව් බ්‍රෙසන්ස්කි (Zbigniew Brzezinski), ඔහුගේ ද ග්‍රෑන්ඩ් චෙස් බෝඩ් (The Grand Chessboard - මහා චෙස් පෙත) (1997) කෘතියේ ලියූ පරිදි, යුක්රේනය යනු රුසියාවේ දකුනු දේශසීමාවේ ආරක්ෂාව ද, උනුසුම් මුහුදුවලට ප්‍රවේශය ද නිර්නය කරන රුසියාවේ 'භූ දේශපාලන නියාමකයයි”. යුක්රේන භූමිභාගය, කලු මුහුද හා කැස්පියන් මුහුදු කලාපය, ගෝලීය ආධිපත්‍ය සඳහා වන වොෂින්ටනයේ සැලසුම්වල අප්‍රමාන වැදගත්කමකින් යුත් මධ්‍ය අක්ෂය වේ. මෙම කලාපය, රුසියාව මධ්‍යධරනී මුහුදට ඇති ප්‍රවේශය වන අතර, යුරෝපය කරා දිවෙන සිය තනි තීරයක් තනි මාවතක් (Belt and Road Initiative) ව්‍යාපෘතියේ ගොඩබිම් මාර්ගය ව්‍යාප්ත කරන චීනයට ද මෙය ඉතා වැදගත්ය. කලු මුහුද හා කැස්පියන් කලාප වලට ද අවසන් විග්‍රහයේදී යුරේසියාවට ද සිය ආධිපත්‍ය සඳහා බාධකයක්ව ඇති රුසියාව වැනසීම ද, එමඟින් සම්පත් වලින් පොහොසත් රට අර්ධ යටත් විජිතයක් බවට පිරිහෙලීම ද වොෂින්ටනයේ යුද අරමුන වෙයි. මෙය ඔවුන් විසින් දකිනු ලබන්නේ චීනයට එරෙහි යුද සූදානමෙහි අත්‍යවශ්‍ය පියවරක් ලෙස ය.
18. දෙවනුව, යුද්ධය සඳහා වූ පරිශ්‍රමය උන විකාරයක මට්ටමට නංවා ඇත්තේ නොවිසඳිය හැකි දේශීය අර්බුදය විසිනි. ඇෆ්ගනිස්ථානයේ පරාජයෙන් ආසන්නවම ඉක්බිති සමයේ යුද්ධ පරිශ්‍රමය තීව්ර කිරීම මුල් බැස ඇත්තේ, පෙර නොවූ විරූ පරිමානයේ සංයුක්ත සමාජ, මූල්‍ය හා දේශපාලන අර්බුද තුලය.
19. COVID-19 වසංගතය 2020 ජනවාරි මාසයේ පුපුරා ගිය දා පටන් ජාත්‍යන්තර කමිටුව අවධාරනය කර ඇති පරිදි, විසි එක්වන සියවසේ ගමන් මඟ කෙරේ එහි බලපෑම, පලමු ලෝක සංග්‍රාමය සහ දෙවන ලෝක සංග්‍රාමය විසිවන ශතවර්ෂයට ඇති කල බලපෑම තරම් ම බලගතු එකක් වනු ඇත. වසංගතය, දැනටමත් ලෝක ධනවාදී ක්‍රමයේ අතිශය ඉහල මට්ටමකට නැඟී ඇති ප්‍රතිවිරෝධතා පිපිරුම් මට්ටමට ගෙනැවිත් ඇති 'ප්‍රේරක සිදුවීමකි'.
20. වසංගතය පුපුරා යාමෙන් පසු ගෝලීය වශයෙන් ජීවිතවලින් ගෙවන්නට සිදු වී ඇති වියදම දැවැන්ත එකකි. වඩාත්ම මධ්‍යස්ථ ඇස්තමේන්තුවලට අනුව ලොව පුරා මරන සංඛ්‍යාව මිලියන හයකට ආසන්න ය. අතිරික්ත මරන ගනනය කිරීම මත පදනම් වූ ඇස්තමේන්තු වලට අනුව ජීවිත හානි මිලියන විස්සක් තරම් ඉහල අගයක් ගනියි. ධනවත්ම හා බලවත්ම ධනේශ්වර රට වන එක්සත් ජනපදයේ මරන සංඛ්‍යාව මිලියනයකට එලැඹෙමින් පවතී.
21. මෙම අතිශය විනාශකාරී මරන සංඛ්‍යාව වූ කලී, ජීවිත ආරක්ෂා කිරීම, කතිපයාධිකාරී ධනේශ්වර පාලක පන්තියෙහි ධනය ආරක්ෂා කර ගැනීමේ අවශ්‍යතාවයට යටත් කල පිලිවෙත්වල ප්‍රතිඵලය යි. වසංගතය සෑම සතියක් තුල ම ජීවිත දසදහස් ගනන් බිලිගැනීම අඛන්ඩ ව ඉදිරියට යද්දී පවා, කෝවිඩ්-19 පැතිරීම සීමා කරන ප්‍රයත්නයන් පැහැදිලි ව ප්‍රතික්ෂේප කරනු ලැබ තිබේ. වොෂින්ටනය නායකත්වයේ සිටිමින් පෘථිවි ගෝලය පුරා ආන්ඩු, දහස් ගනන් දෛනික මරන දැන් සාමාන්‍ය ලෙස සලකමින්, ආසාදන හා මරන පිලිබඳ සියලු වාර්තා කිරීම් අවසන් කිරීමට පියවර ගනිමින් සිටී.
22. ධනපති රටවල් සියල්ලේ ම අභ්‍යන්තර මූල්‍ය, දේශපාලන හා සමාජ අර්බුදයන් වසංගතය විසින් තීව්ර කර ඇත. සත්‍ය වසයෙන් ම, මෙම අර්බුදය එහි වඩාත් ම විෂකුරු ස්වභාවය අත්පත් කර ගන්නේ, විශේෂයෙන් ම එක්සත් ජනපදය ඇතුලු වඩාත් ම දියුනු ධනපති රටවල් තුල ය.
23. එක්සත් ජනපදය, පරිපූර්න ආර්ථික, සමාජීය හා දේශපාලනික අකර්මන්‍ය වීමක් කරා හැල්මේ එලැඹෙමින් තිබේ. උද්ධමනය අහස උසට නගිද්දී, බැංකුවලට හා වෝල් වීදියට මුදල් පොම්ප කිරීම හේතුවෙන් විශාල වසයෙන් හටගත් ඇමරිකාවේ නය ප්‍රමානය, ඇඟ කිලිපොලා යන ඩොලර් ට්‍රිලියන 30ක් දක්වා ලඟා වී ඇත. කම්කරු පන්තිය විවෘත හා භව්‍ය වසයෙන් පුපුරනසුලු අරගල කරා පැමිනෙමින් සිටී. 2021 ජනවාරි 6 වැනි දා කුමන්ත්‍රන උත්සාහයක් හරහා එක්සත් ජනපදයෙහි ව්‍යවස්ථාපිත ආන්ඩුව පෙරලා දැමීමේ අද්දරට ම රට ලඟා වීමෙන් ගත වී ඇත්තේ යන්තම් අවුරුද්දක් පමනි.
24. පසුගිය මාසයේ පැවති මාධ්‍ය හමුවක දී, එක්සත් ජනපද ප්රජාතන්ත්රවාදය මේ දශකය ගත වනතෙක් නො නැසී පවතීද යන්න ප්‍රශ්නයට තුඩු දෙන්නක් බවට බයිඩන් අදහස් පලකලේ ය. මේ සා මට්ටමක සමාජ අසමානතාවක් ඇති, ජනගහනයේ අතිමූලික අවශ්‍යතා පිලිබඳ ව පාලක පන්තිය මේ සා උදාසීනත්වයක් දක්වන වෙනත් රටක් නොමැත. එක්සත් ජනපදය යනු සමාජයීය වෙඩි බෙහෙත් ගබඩාවකි. යුද්ධය යනු කෘතීම ලෙස එක්සත් කිරීමේ හා අර්බුදය පිටතට හරවා යැවීමේ ක්‍රමයකි.
25. යුද්ධයේ හේතු අධ්‍යයනය කිරීමේ දී, බොහෝ බැරෑරුම් ඉතිහාසඥයෝ දේශීය පරස්පර-විරෝධයන්ගේ ප්‍රථමතාව අවධාරනය කර ඇත්තා හ. සුප්‍රකට ඇමරිකානු ඉතිහාසඥ ආනෝ මේයර්, ප්‍රතිවිප්ලවයේ ගතිකයන් පිලිබඳ අධ්‍යයනයක දී මින් ශතවර්ෂ බාගයකට පෙර මෙසේ සටහන් කලේ ය:
ආතති සහගත හා අස්ථාවර අභ්‍යන්තර කොන්දේසි, ප්‍රකට ලෙසම දලදඬු හා සුවිශේෂී ලෙස ප්‍රබල - හා ප්‍රමානාතික්‍රාන්ත ව අන්තරායකාරී බව විශේෂයෙන් කිවයුතු නොවේ - පූර්වභංග විසඳුම් ගැනීමට ප්‍රභූන් පොලඹවයි. අසීරු තත්ත්වයන්ට මුහුන දී සිටින හා අන්තරායකර අඩියකට වැටී සිටින ආන්ඩු සහ දේශපාලන පන්ති, ඉහල නැංවෙන බාහිර ගැටුමකට හෝ යුද්ධයට එරෙහිව කටයුතු කිරීමට වඩා එම ගැටුම හෝ යුද්ධය කෙරේ නැඹුරු වීමට වැඩි ඉඩක් පවතී. ගැඹුරින් ම ඉරිතැලී ගිය සිවිල් පර්යායක් හා සමාජයක්, ඒවා පොදු හා සමීපස්ථ බාහිර තර්ජනයකට හා හතුරෙකුට මුහුන දුන් විට ප්‍රතීක ක්‍රියා වශයෙන් හා ගනන් බැලීමෙන් යන දෙක ම මගින්, ඒකාබද්ධ කරනු ඇතැයි ඔවුහු උපකල්පනය කරති. රාජ්‍ය-විරෝධී කැරැල්ලකට, විප්ලවයකට, සිවිල් යුද්ධයට හෝ ඔවුන් ආසන්න යයි කියාපාන බෙදීයාමකට එරෙහිව ප්‍රතිවිෂක් ලෙස, අභ්‍යන්තර සමාජ ඒකාබද්ධ භාවයේ උපකරනයක් ලෙස, උත්සන්න වූ බාහිර ගැටුමක් හෝ යුද්ධයක් යොදාගත හැකි යයි සැලකීමට එවැනි ආන්ඩු නැඹුරු වෙති. අවසාන ඉලක්කය වන්නේ, අභ්‍යන්තරික ව දුර්වල වූ පාලන තන්ත්‍ර, ආන්ඩු හා ප්‍රභූන්ගේ වියැකී යන බලය හා කීර්තිනාමය පුනස්ථාපනය කිරීමට, රුචිකර ලෙස වැඩි දියුනු කිරීමට, කැපී පෙනෙන රාජ්‍යතාන්ත්‍රික හෝ මිලිටරිමය ජයග්‍රහනයක වටිනාකම මිල කරගැනීම යි.
26. ලෝක යුද්ධ දෙකේ විනාශයෙන් යන්තමින් පන බේරාගෙන ඇති යුරෝපීය ධනේශ්වරය, වඩා ප්‍රවේසම්කාරීත්වයකට නැඹුරු ය. එහෙත්, ස්වාභාවික වායු හා අනෙකුත් සම්පත් සඳහා රුසියාව මත රැඳී සිටින තතු තුල, යුක්රේනය අරබයා වන යුද්ධයක් ඔවුන්ගේ ම අවශ්‍යතාවන්ට විනාශකාරී විය හැකි ය යන්න නො තකා, ඔවුහු වොෂින්ටනයේ යුද පරිශ්‍රමය සමග ගමන් ගනිති. එම ව්‍යසනකාරී මාවතට ම ඔවුන් ව තල්ලු කරනු ලබන යෝධ අභ්‍යන්තර අර්බුදයන්ට ඔවුහු මුහුන දෙති. තව ද ඇමරිකානු න්‍යාය පත්‍රයට ඍජු ලෙස අභියෝග කිරීමක්, විනාශකාරී ප්‍රතිවිපාකයක් ගෙන එනු ඇතැයි ඔවුහු දනිති. 2003 දී, එක්සත් ජනපදයේ ඉරාක ආක්‍රමනයට සහයෝගය දීමට ඇති මැලි කම ජර්මනිය හා ප්‍රන්සය නිල වශයෙන් ප්‍රකාශ කල හ. සිය දීර්ඝ-කාලීන සගයන්ට විවෘත ව පහර දුන් වොෂින්ටනය, “පැරනි යුරෝපයේ” මධ්‍යම රටවලට විරුද්ධ ව, මෑත දී නැටෝ සංවිධානයට ඇතුලත් කරගත් නැගෙනහිර යුරෝපීය රාජ්‍යයන් කරා සිය සබඳතා යලි දිශාගත කරන බවට තර්ජනය කලේ ය. තව ද, එක්සත් ජනපදයට ප්‍රතිරෝධය දැක්වීමේ ප්‍රතිඵලයක් ලෙස, රුසියාවේ ඇති විය හැකි ප්‍රතිසංවිධානයක් තුල අධිරාජ්‍යවාදී මංකොල්ලයේ තම පංගු අහිමි කෙරේයැයි ද යුරෝපීය ධනපතීහු බියපත්ව සිටිති. නිසියාකාර ව හික්මවන ලද ඔවුහු යුද්ධය කරා වන පරිශ්‍රමයට එක් වී සිටිති.
27. එනමුත්, වොෂින්ටනයේ හා යුරෝපයේ අගනගරවල සිටින මූලෝපායඥයන්ගේ උපකල්පන කවරාකාර ඒවා වුවත්, යුද්ධයේ පිහිට පැතීම ඔවුන්ගේ කිසිදු ගැටලුවක් නො විසඳනු ඇත. එවන් මහා විපර්යාසයන් දියත් කරන අපරාධකාරයන්, තම චිත්ත වික්ෂෝභයට හේතුවන පරිදි, සුලඟ වපුරන්නෝ සුලිසුලං නෙලා ගනු ඇත්තාහ යන ආප්තෝපදේශයේ සත්‍යය පසක් කරනු ඇත්තාහ.
28. යුක්රේනය තුල රුසියාව සමග වන යුද්ධය කෙසේ ආරම්භ වුවත්, එහි ආරම්භක අදියරයන් කවර මාවතක් ගත්තත්, එය යුක්රේනය තුලට සීමා නොකෙරෙනු ඇත. පාලනය කල නොහැකි තරමේ ව්‍යාප්තියක තර්කනයක් ඒ පසුපස පැමිනෙනු ඇත. කලාපයේ සෑම රාජ්‍යයක් ම ගැටුම තුලට ඇදගනු ලැබෙනු ඇත. එය ට්‍රාන්ස්කොකේසියාව, කැස්පියන් මුහුදු කලාපය, මධ්‍යම ආසියාව හා ඉන් ඔබ්බෙහි ද සිසාරා යමින්, රටවල් හතක වෙරල තීර සිපින කලු මුහුද උත්සන්න වන ගැටුමේ කල්දේරමක් බවට පරිවර්තනය කරනු ඇත.
29. තමාගේ ම අවශ්‍යතා ඍජු ව තර්ජනයට ලක්වන බව දකින චීනය යුද්ධය තුලට ඇදගනු ලැබෙනු ඇත. ඉන්පසු ව ගැටුම තායිවානය කරා විහිදී යනු ඇත. ඉරානය හා ඊස්‍රායලය යුද්ධයක් තුල පැටලෙනු ඇත. ජපානය හා ඕස්ට්‍රේලියාව හැල්මේ පසුපසින් එනු ඇත. එක්තරා අවස්ථාවක දී, න්‍යෂ්ටික ආයුධ භාවිතා කිරීම ගැලැවී යාමේ මඟක් ලෙස පෙනී යනු ඇත. ජීවිත විනාශකාරී ලෙස අහිමි කරමින් හා සමාජීය ව්‍යාකූලත්වයේ දැවැන්ත මට්ටම් ජනනය කරමින්, මෙම ගැටුමේ සෑම වේදිකාවක දී ම, එක්සත් ජනපදය කේන්ද්‍රීය ලෙස සහභාගි වනු ඇත.
30. සෝවියට් සංගමය විසුරුවා හල තැන් පටන් ගත වී ඇත්තේ, යන්තම් වසර 30ට වැඩි කාලයක් පමනි. 1992 දී, මොස්කෝවේ මෙන් ම කීව් හි ස්ටැලින්වාදී නිලධාරී තන්ත්‍ර ධනවාදය පුනස්ථාපනය කිරීම පෙර නුවූ විරූ සෞභාග්‍යයේ නව යුගයක් ආරම්භ කරනු ඇතැයි කියාපෑ හ. මාක්ස්වාදයේ සමාජීය ශික්ෂාවන් අත්හැර දැමීම මගින්, සාමයට ලැදි ධනපති රාජ්‍යයන්ගේ ප්‍රීතිමත් පවුලට සාදරයෙන් පිලිගැනෙනු ලැබෙන රුසියාව හා යුක්රේනය යන දෙරටම, පෙර නුවූ විරූ සෞභාග්‍යයක් භුක්ති විඳිනු ඇතැයි ඔවුහු කියාපෑ හ.
31. 1991ට පෙර යුගයේ ස්ටැලින්වාදී “තනි රටේ සමාජවාදයේ” හා අධිරාජ්‍යවාදය සමග “සාමකාමී සහජීවනයේ” කෝකටත් තෛලයන් තුල මුල් බැස තිබූ මෙම අනෛතිහාසික හා මනෝරාජික සිහින ලෝකය, මුලුමනින් ම නටබුන් ව ගොස් තිබේ. මාක්ස්වාදයේ හා 1917 ඔක්තෝබර් විප්ලවය සමග සම්බන්ධිත සියල්ලේ වඩාත් ම කටුක හතුරා වන රුසියානු ආන්ඩුව, අධිරාජ්‍යවාදයට යටත් වීමේ යතාර්ථයට දැන් මුහුන පා සිටී.
32. දූෂිත ධනපති කතිපයාධිකාරයක් වෙනුවෙන් පාලනය හොබවන පුටින් පාලන තන්ත්රය සතුව, මෙම තර්ජනයට ප්‍රගතිශීලී කෙසේ වෙතත් ශක්‍ය වන්නා වූ හෝ ප්‍රතිචාරයක් නැත. එක්සත් ජනපදය හා ප්‍රධාන අධිරාජ්‍යවාදී බලයන් ආධිපත්‍යය දරන ලෝක ධනවාදයේ ව්‍යුහයන් තුලට රුසියාව සාමකාමී ලෙස ඒකාග්‍ර කිරීමේ හැකියාව මායාවක් බව පෙන්නුම් කරනු ලැබ ඇත. ලෝක මූල්‍ය පද්ධතියේ නො ගිනිය හැකි සාධකයක් වන රුසියානු ආර්ථිකය, එක්සත් ජනපදය විසින් පනවනු ලබන සම්බාධකවල අනවරත පීඩනය යටතේ පවතී.
33. සිය දේශසීමා මත සිටින මහජනතාවන්ට ආයාචනා කිරීමට අසමත් වන ප්‍රතිගාමී ජාතිකවාදය ඇවිලවීම, රුසියාවේ හුදකලාව ගැඹුරු කරයි. තව ද න්‍යෂ්ටික ආයුධ ලෙලවීම කරා පුටින්ගේ යොමු වීම ඉදිරිපත් කරන්නේ, ගෝලීය අවසාන මහා යුද්ධයක ඉදිරි දර්ශනය පමනි. අංගවිකල පශ්චාත්-සෝවියට් සමාජයෙහි සියලු පරස්පර-විරෝධයන් තීව්ර කර ඇති වසංගතය විසින් සුන්බුන් කරන ලද දේශයක් ඔහු අඩමාන අයුරින් පාලනය කරයි. ධනපති ප්‍රභූවේ එකිනෙකා සමඟ තරඟ වදින කන්ඩායම් -එනම්, එක්සත් ජනපද හා යුරෝපීය අධිරාජ්‍යවාදය යටතේ කොම්ප්‍රදෝරු ධනපතියන් ලෙස තම තත්ත්වය පිලිගන්නා අය සහ යටත්වීම තම අවශ්‍යතා අනතුරේ හෙලනු ඇතැයි බියවන්නන්- අතර බලය තුලනය කිරීමට ඔහුට බල කෙරී ඇත. පසුව සඳහන් කල කොටස් අතර, න්‍යෂ්ටික ආයුධ භාවිතා කිරීමේ සියදිවි නාශක පිලිවෙතක් මත අවසානයේ දී රඳා පවතින ජාතික ආරක්ෂාවේ සංකල්පනය දරන ආන්තික ජාතිකවාදී හා අන්ත-දක්ෂිනාංශික කොටස් ගොනු වී සිටිති.
34. ජාත්‍යන්තර කමිටුව අධිරාජ්‍යවාදී යුද්ධයට එරෙහි එහි විරෝධය පදනම් කරන්නේ, කිසිදු ආකාරයක ජාතිකවාදයට සහයෝගය දීම වෙනුවට, ධනවාදය පෙරලා දමා ලෝක සමාජවාදය ස්ථාපිත කිරීම පිනිස සියලු රටවල කම්කරු පන්තිය ඒකාබද්ධ කිරීමේ අරගලය මත යි. මෙම සාරභූත මූලධර්මය සුවිශේෂී බලයකින් යුතු ව වත්මන් තත්ත්වයට අදාල වේ.
35. යුක්‍රේනියානු හා රුසියානු කම්කරු පන්තිය පොදු ඉතිහාසයක් බෙදාහදා ගනී. ඔවුන්ට භාතෘඝාතක යුද්ධයක් සඳහා කිසිදු උවමනාවක් නැත. යුක්රේනයේ විප්ලවවාදී ව්‍යාපාරය, ලියොන් ට්‍රොට්ස්කි ඇතුලු සමාජවාදය සඳහා අරගල කල ශ්‍රේෂ්ට නායකයන් බොහෝ දෙනෙකු නිෂ්පන්න කලේ ය. සාර්වාදය පෙරලා දමමින්, ඔක්තෝබර් විප්ලවයේ ජයග්‍රහනය සඳහා, යුක්රේනයේ හා රුසියාවේ කම්කරුවෝ සහෝදරයින් ලෙස අරගලයේ නියැලුන හ. ජර්මානු අධිරාජ්‍යවාදයට එරෙහි ව ඔවුහු එක් ව සටන් කල හ. ස්ටැලින්වාදී පාලන තන්ත්‍රයේ අපරාධවල දන්ඩනයට රුසියාව හා යුක්රේනය යන රටවල් දෙකේ ම කම්කරුවන් බඳුන් වූ අතර, ඔවුහු දෙපිරිසම ධනවාදය පුනස්ථාපනය කිරීමේ විපාක අත්විඳ ඇත්තාහ. රටවල් දෙක තුල ම සිටින ෆැසිස්ට්වාදී ජාතිකවාදීහු කම්කරු පන්තිය නියෝජනය කිරීමක් හෝ එහි අවශ්‍යතා වෙනුවෙන් කතා කිරීමක් හෝ නොකරති.
36. රුසියානු හා යුක්‍රේනියානු කම්කරු පන්තියේ ඉදිරි මාවතට ගෝලීය ඉදිරි දර්ශනයක් අවශ්‍ය ය. පුටින්ට විරුද්ධත්වය දැක්වීම අධිරාජ්‍යවාදය සමග පෙලගැසීමක් නොවන බව අවධාරනය කල යුතු ය. රුසියානු හා චීන “අධිරාජ්‍යවාදය” පිලිබඳ ව්‍යාජ-වාම හෙලාදැකීම්වලට, විසිවන හා විසිඑක්වන ශතවර්ෂවල ඓතිහාසික වර්ධනය සමග මෙලෝ සම්බන්ධයක් නැත. ඒ වෙනුවට ඒවා ප්‍රකාශයට පත් කරන්නේ, සුලු-ධනේශ්වර බලවේග වොෂින්ටනය සමග පෙලගැසීම යි. රුසියානු ජාතිකවාදයට අනුගත නො වෙමින් අධිරාජ්‍යවාදයට විරුද්ධ වීම හා අධිරාජ්‍යවාදයට අනුගත නො වෙමින් රුසියානු ජාතිකවාදයට විරුද්ධ වීම අවශ්‍ය ය.
37. වර්තමාන ආතතීන්ගේ ක්ෂනික ප්‍රතිඵලය කවරක් වුවත්, මෙම අර්බුදයට සාමකාමී විසඳුමක් නැත. 1914 දී පලමු ලෝක යුද්ධය හා 1939 දී දෙවන ලෝක යුද්ධය පුපුරා යාමට පෙරාතු කාලපරිච්ඡේද තුල බොහෝ “යුද භීතීන්” දැක ගන්නට ලැබින. එහෙත් එක් අර්බුදයක විසඳීම වහා තවත් එකකට ඉඩ හරින ලද අතර, අවසානයේ යුද්ධය ආවේය.
38. වර්තමාන අර්බුදය බියකරු අනතුරු ඇඟවීමකි. අධිරාජ්‍යවාදය ව්‍යසනය දෙසට ලුහුටා යමින් සිටී. යුක්රේනය තුල සූදානම් කරමින් පවතින විනාශය නැවැත්වීමට බලමුලුගැන්විය යුතු සමාජ බලවේගය වන්නේ ජාත්‍යන්තර කම්කරු පන්තිය යි. යුද්ධයට එරෙහි සටන, සූරාකෑමට හා ධනපති ආන්ඩුවල මිනීමරු රංචු ප්‍රතිශක්ති පිලිවෙත්වලට එරෙහි සටන සමග ඍජු ව බැඳී තිබේ. අධිරාජ්‍යවාදය හා මූල්‍ය ප්‍රාග්ධනය, ඔවුන්ගේ කොල්ලය හා ලාභ සුරක්ෂිත කරගැනීමට ඕනෑ ම මරන සංඛ්‍යාවක් ඉවසනු ඇත. වසංගතයෙන් මිය යන මිලියන ගනනට යුද්ධයෙන් මිය යන මිලියන ගනනක් ද එකතු නො කල යුතු ය. සමාජවාදී හා ජාත්‍යන්තරවාදී ඉදිරි දර්ශනයක පදනම මත, ස්වාධීන යුද-විරෝධී ව්‍යාපාරයක් කම්කරුවන් විසින් ගොඩනඟනු ලැබීම අතිශය හදිසි භාවයකින් යුතු ය.
39. අධිරාජ්‍යවාදයට හා ලෝක යුද්ධය කරා දැරෙන ප්‍රයත්නයට එරෙහි සටනට මග පෙන්විය යුතු, 2016 දී ජාත්‍යන්තර කමිටුව නිකුත් කල ප්‍රකාශය තුල සඳහන් කරන ලද මූලධර්ම, වර්තමාන අර්බුදය තුල සුවිශාල හදිසි භාවයක් අත්කර ගනී:
- යුද්ධයට එරෙහි අරගලය, ජනගහනය තුල සිටින සියලු ප්‍රගතිශීලී බලවේග තමන් පිටුපස එකමුතු කරගන්නා, සමාජයේ ශ්‍රේෂ්ට විප්ලවවාදී බලවේගය වන කම්කරු පන්තිය මත පදනම් කල යුතුය.
- මූල්‍ය ප්‍රාග්ධනයේ ආඥාදායකත්වය අවසන් කිරීමට සහ මිලිටරිවාදයේ හා යුද්ධයේ මූලික හේතුව වන ආර්ථික පද්ධතිය අවසන් කිරීමට කෙරෙන අරගලයෙන් විනා යුද්ධයට එරෙහි බැරෑරුම් අරගලයක් නො කල හැකි හෙයින්, නව යුද-විරෝධී ව්‍යාපාරය ධනපති-විරෝධී හා සමාජවාදී විය යුතු ය.
- එම නිසා, අවශ්‍යයෙන් ම, නව යුද-විරෝධී ව්‍යාපාරය, ධනපති පන්තියේ සියලු දේශපාලන පක්ෂ හා සංවිධානවලින් මුලුමනින්ම හා සම්පූර්නයෙන් ම ස්වාධීන හා ඒවාට හතුරු විය යුතු ය.
- සියල්ලට ඉහලින්, නව යුද-විරෝධී ව්‍යාපාරය, අධිරාජ්‍යවාදයට එරෙහි ඒකාබද්ධ ගෝලීය අරගලයක් තුල, කම්කරු පන්තියේ යෝධ බලය බලමුලුගන්වන ජාත්‍යන්තර එකක් විය යුතු ය.
40. මෙම මූලධර්මවල පදනම මත යුද්ධය කරා ධාවනයට එරෙහි ව සටන් වදින ලෙස, කම්කරු පන්තියේ හා තරුනයන්ගේ සියලු කොටස්වලට ද මධ්‍යම පන්තියේ වඩාත් ම සප්‍රතිපත්තික හා ධෛර්ය සම්පන්න කොටස්වලට ද අපි ආයාචනා කරමු.
41. මෙම ප්‍රකාශය තුල ඉදිරිපත් කෙරෙන මූලධර්මවල පදනම මත, යුද්ධයට එරෙහි ව ජාත්‍යන්තර මහජන ව්‍යාපාරයක් ගොඩනැගීමේ හදිසි අවශ්‍යතාව හඳුනාගන්නා ලොව පුරා සිටින දේශපාලන ප්‍රවනතා හා පුද්ගලයන් සහෝදරාත්මක සාකච්ඡා සඳහා සාදරයෙන් පිලිගැනීමට හතරවැනි ජාත්‍යන්තර කමිටුව හා එහි ශාඛා සූදානම්ව සිටී.