එක්සත් ජනපදයේ සමාජවාදී සමානතා පක්ෂයේ (සසප) ජාතික ලේකම් ජෝශප් කිෂෝර්, සසප සහ සමාජ සමානතාව සඳහා ජාත්‍යන්තර තරුනයෝ සහ ශිෂ්‍යයෝ (සසජාතශි) ව්‍යාපාරය විසින් සංවිධානය කරනු ලබන ප්‍රසිද්ධ රැස්වීම් ඇමතීම පිනිස ශ්‍රී ලංකාවේ සංචාරයක නිරත වනු ඇත.
“ලියොන් ට්‍රොට්ස්කි සහ 21 වන සියවස තුල සමාජවාදය සදහා අරගලය” යන මැයෙන් යුක්ත රැස්වීම් දෙකක් දෙසැම්බර් 7 දා පේරාදෙනිය විශ්වවිද්‍යාලයේ දී සහ දෙසැම්බර් 10 දා කොලඹ දී පැවැත්වෙනු ඇත. ප්‍රථම රැස්වීම විශ්වවිද්‍යාලයේ දේශපාලන විද්‍යා සංගමයේ අනුග්‍රහයෙන් පැවැත්වේ. කිෂෝර් ජාත්‍යන්තර සමාජවාදයේ මූලධර්ම සදහා ට්‍රොට්ස්කිවාදී ව්‍යාපාරය ගෙන ගිය අරගලයේ සමකාලීන අර්ථභාරය සාකච්ඡා කරනු ඇත.
කිෂෝර් 2008 පටන් එක්සත් ජනපදයේ සසප ජාතික ලේකම් වන අතර හතර වන ජාත්‍යන්තරයේ ජාත්‍යන්තර කමිටුව විසින් පල කරනු ලබන ලෝක සමාජවාදී වෙබ් අඩවියට නිරන්තරව ලිපි සපයන ලේඛකයෙකි. ඔහු 2020 වසරේ දී පක්ෂයේ ජනාධිපතිවරන අපේක්ෂකයා ද විය.
ශ්‍රී ලංකාවේ පැවැත්වෙන රැස්වීම්, වී.අයි. ලෙනින් සමග 1917 රුසියානු විප්ලවයේ සම-නායකයා වූ ලියොන් ට්‍රොට්ස්කිගේ නායකත්වය යටතේ 1923 ඔක්තෝබරයේ දී සෝවියට් සංගමය තුල වාම විපාර්ශ්වය පිහිටුවීමේ 100 වන සංවත්සරය සමරනු වස් ජාත්‍යන්තර කමිටුව විසින් ගෝලීයව සංවිධානය කරනු ලබන වැඩකටයුතු මාලාවක කොටසකි.
පලස්තීනුවන්ට එරෙහිව ඊශ්‍රාලයේ සියොන්වාදී රාජ්‍යය විසින් ගෙන යනු ලබන ජනඝාතක වටලෑම ඇතුලු, අධිරාජ්‍යවාදී යුද්ධයේ පැනනැගීම, ජාත්‍යන්තර කම්කරු පන්තිය සහ තරුනයන් හමුවේ 20 වස සියවසේ සියලු නොවිසදුනු ගැටලු ප්‍රතිමුඛ කරයි.
කම්කරුවන් සහ පීඩිත මහජනතාව මුහුන දෙන සියලු දැවෙන ප්‍රශ්න – සමාජ අසමානතාව, යුද්ධය, කෝවිඩ්-19 වසංගතය, දේශගුන විපර්යාශ, රාජ්‍ය මර්දනය සහ අධිපතිවාදයේ හා පැසිස්ට්වාදයේ පැනනැගීම – ජාත්‍යන්තර ගැටලු වන අතර ඒවාට කම්කරු පන්තියේ ගෝලීය හා විප්ලවවාදී විසදුමක් අවශ්‍ය ය.
එක්සත් ජනපද අධිරාජ්‍යවාදය චිනයට එරෙහි සිය යුද සූදානම තීව්‍ර කරන තතු යටතේ, ශ්‍රී ලංකාව ඇතුලු, සමස්ත දකුනු ආසියානු කලාපය ම, භූ-දේශපාලනික ආතතීන්ගේ ගෝලීය වාසුලිය තුලට ඇද ගනු ලැබ ඇත. අවශ්‍යව ඇත්තේ කම්කරු පන්තියේ බලගතු සමාජවාදී හා ගෝලීය යුද-විරෝධී ව්‍යාපාරයකි. එලඹෙන න්‍යෂ්ටික ලෝක යුද්ධයක මෙම පසුබිම යටතේ, පසුගිය ශත වර්ෂය තුල ට්‍රොට්ස්කිවාදී ව්‍යාපාරය ගෙන ගිය අරගලයේ පාඩම් අවබෝධ කරගැනීම එවන් යුද-විරෝධී ව්‍යාපාරයක් ගොඩනැගීමෙහි ලා අත්‍යවශ්‍ය ය.
සසප සහ සසජාතශි මෙම වැදගත් රැස්වීම්වලට සහභාගි වන ලෙස කම්කරුවන්ට, තරුනයන්ට, ශිෂ්‍යයන්ට, ශාස්ත්‍රාලිකයන්ට සහ ලෝක සමාජවාදී වෙබ් අඩවියේ පාඨකයන්ට ආරාධනා කර සිටී.
දින සහ ස්ථාන
පේරාදෙනිය
දෙසැම්බර් 7 දා සවස 3
පේරාදෙනිය විශ්වවිද්‍යාලයේ දේශපාලන විද්‍යා අංශයේ ශාලා අංක 86
කොලඹ
දෙසැම්බර් 10 දා සවස 3
කොලඹ නව නගර ශාලාව.
මාරාන්තික කෝවිඩ්-19 වසංගතය තවමත් අවසන් වී නැති සහ ලෝකය පුරා ශිඝ්‍රයෙන් පැතිරෙමින් පවතින බැවින් තමන් මෙම රැස්වීම්වලට සහභාගි වන විට එන්95 හෝ කේඑන්95 මුහුනු ආවරන පලදින ලෙස ඔවුන් සියල්ලන්ගෙන් ම අපි කාරුනිකව ඉල්ලා සිටිමු.