இந்த ஆவணம், சோசலிச சமத்துவக் கட்சி (இலங்கை) கொழும்பில், மே 27-29, 2011 இல் நடாத்திய மாநாட்டில் ஒருமனதாக ஏற்றுக்கொள்ளப்பட்டது. இந்திய துணைக் கண்டத்தில் புரட்சிகர இயக்கத்தின் வளர்ச்சியின் சிக்கல்களை ஆழமாகப் புரிந்துகொள்வதற்கு இந்த ஆவணம் மிக முக்கியமானதாகும். இது, தெற்காசியாவில் ட்ரொட்ஸ்கியின் நிரந்தரப் புரட்சி தத்துவத்திற்கான நான்காம் அகிலத்தின் 75 ஆண்டுகால போராட்டத்தின் முக்கியமான படிப்பினைகளை வரைகிறது.

இலங்கையில் பிரிட்டிஷ் சிறைகளில் இருந்து தப்பிய லங்கா சம சமாஜ கட்சியின் (LSSP) தலைவர்களால் 1942 ஆம் ஆண்டில் போல்ஷிவிக் லெனினிஸ்ட் கட்சி (BLPI) ஸ்தாபிக்கப்பட்டதானது, ஆசியாவில் நான்காம் அகிலத்திற்கான போராட்டத்திற்கு ஒரு தீர்க்கமான முன்னேற்றத்தைக் குறித்து நின்றது. தமிழ், சிங்கள தொழிலாள வர்க்கத்தை ஒன்றிணைப்பதற்கான போராட்டத்தை கைவிட்டு, 1983 முதல் 2009 வரையான இரத்தக்களரி 25 ஆண்டுகால உள்நாட்டுப் போருக்கான பாதையைத் திறந்துவிட்ட, 1964 ஆம் ஆண்டு திருமதி சிறிமா பண்டாரநாயக்கவின் கூட்டணி அரசாங்கத்தில் நுழைந்த LSSP யின் எழுச்சி, வீழ்ச்சி மற்றும் இறுதி துரோகம் ஆகியவற்றை இந்த ஆவணம் ஆராய்கிறது.

லங்கா சம சமாஜ கட்சியின் துரோகத்திலிருந்து அவசியமான அரசியல் படிப்பினைகளைப் பெறுவதற்கும், நான்காம் அகிலத்தின் அனைத்துலகக் குழு போராடிய ட்ரொட்ஸ்கிச வேலைத்திட்டத்தின் அடிப்படையில் தொழிலாள வர்க்கத்தை அரசியல் ரீதியாக ஆயுதபாணியாக்குவதற்கும் சோசலிச சமத்துவக் கட்சியின் முன்னோடியான புரட்சிக் கம்யூனிஸ்ட் கழகம் (RCL) 1968 இல் ஸ்தாபிக்கப்பட்டது. இந்த ஆவணம், அனைத்து வகையான தேசியவாதம் மற்றும் வகுப்புவாதத்திற்கு எதிரான RCL இன் கொள்கைப்பிடிப்பான மற்றும் தைரியம்மிக்க போராட்டத்தின் படிப்பினைகளை தொகுத்தளித்திருக்கிறது.